Kuring kagiliran piket menjelang Pemilu di kantor kuring, di kampus, kalayan dibantu ku saurang anggota pulisi ti Polsekta Padasuka Bandung. Keur jongjon nulis kagiatan dina buku laporan, torojol aya nu laporan, "Pa, aya nu gelo ngamuk di palih kaler di jalan Suci," ceuk nu laporan bari nunjuk ka lebah kaler ku jempolna.
Sanggeus persiapan kuring jeung pulisi langsung ngajugjug ka tempat nu gelo ngamuk tea. Enya we nu gelo teh keur ngamang-ngamang bedog, bari keukeuleuweuhan. Keur keukeuleuweuhan si nu gelo angger teu lesot nyekel bedogna, gerewek ku pulisi ditangkeup dibongohan ti tukang, terus dibangkol. Bedogna diamankeun. Sanggeus dibangkol nu gelo dibawa ka kampus terus didiukeun dina teras kantor, bari ngarenghap panjang jiga nu ambek nyedek tanaga midek. Rek ngadug teu bisaeun da dibangkol. Ku lantaran ku pulisi dibangkolna teh leungeunna dikahareupkeun, manehna bisaeun keneh ruwal-rawel. Nya harita teh ngarawel pulpenna nu teu weleh nyolegreng dina saku bajuna. Sanggeus nyekel pulpenna gutrut weh kutrat kotret dina calana panjangna palebah pingpingna. Boh ku kuring boh ku pulisi teu dihulag. Barang diperhatikeun sihoreng nulis ngaran pulisi tea malah pangkatna ge digambar. Sanggeus beres curat-coret manehna jiga nu sadar bari terus pok nyarita: "Yu, ayeuna kuring rek dibawa ka mana? Kuring pasrah! Tapi inget! Isuk jaganing geto mun pareng urang papanggih deui, dikadek siah hulu anjeun ku kuring!" kitu ancamanana bari molotot. Mokaha katarima ku pulisi jeung kuring asa ngeundeurkeun jajantung. Harita keneh manehna diamankeun dina sel Pulisi Padasuka samemeh dibawa ka nu sok ngubaran. Sanggeus badami jeung kulawargana kakara dibawa ka ahli ngubaran. Sataun ti kajadian newak nu gelo, harita kabeneran pisan pulisi nu newak teh teu dines beurang da tas piket peuting. Aya beja, yen nu gelo nu kungsi ditewak tea nananyakeun ngaran pulisi bari teu lesot mamawa bedog cenah. Kabeneran pulisi teh harita keur ngomean motor si kukutna nu geus 'keor' di sisi jalan teu jauh ti kampus kuring. Keur ngadekul we muka busi, bari kokoprot kesang, torojol weh nu gelo tea bari teu lesot nyenyekel bedog nyampeurkeun ka nu keur ngusey ngomean motor. Atuh pulisi teh mokaha reuwaseunana. Tapi pulisi teh replek masang jurus bari ngagorowok: "Ciiiaaat!" cenah, maksudna keur nurunkeun mental lawan. Tapi nu gelo teh mugen teu lemek teu nyarek. Panon pulisi mencrong kana beungeut manehna teu pegat-pegat bari ngatur napas. Nu gelo teh ngalengkah ka hareupeun pulisi. Pulisi beuki ati-ati. "Teu kenging kitu Pa, awon! Da abdi nepangan Bapa teh sanes bade ngabudalkeun ancaman nu kapungkur, namung bade nyuhunkeun dihapunten samudaya kalepatan wirehna abdi kapungkur kantos ngaluarkeun cariosan anu garihal. Ayeuna abdi tos waras waluya sehat wal afiat sabihara-bihari deui janten jalmi sehat," kitu basana teh. Duka eleh babar, duka memang niatna kitu. Pulisi can ngajawab nanaon, kasieunan ngabobodo supaya jurusna udar. Tapi kalahka kapiheulaan nyarita deui: "Etang - etang kanggo kenang-kenangan, tampi ieu bedog nu kapungkur!" cenah bari ngasongkeun bedogna, perahna heula nu diasongkeun teh, nu gelo tea nyekel congona bari rengkuh, bari tina panonna murubut kaluar cipanon. Ningali galagat kitu mah pulisi teh percaya, yen manehna teh bener-bener geus cageur jeung hayang mulang tarima. Ku pulisi bedog teh ditarima
<<image001.gif>>