"Kucri..ii..ii..iit urang amee..e..e..eng " saurang budak lalaki lucu ngageroan babaturanna di hareupeun hiji imah. Lamun ditingali saliwat mah eta budak teh sarimbag pisan jeung budak lucu botak anu sok maen film mandarin, nyaeta Bo Bo Ho tea. Sirahna gundul, awakna lintuh, kulit koneng, matana sipit. Nu matak babaturanna mah sok nyebut si Boboho wae ka manehna teh.
Budak eta teh ngarana Thai Si Rit, anakna babah Thai Ku Ciang. Engko Ciang, sebutan sapopoe babah Thai Ku Ciang, teh tatanggana si Kabayan di Babakan Linux. Engko Ciang teh cina muallaf. Manehna asup islam sanggeus kawin jeung Nyi Sarboah anakna ma Ijot. tadinamah engko Ciang teh duda boga anak hiji nyaeta si Thai Si Rit atawa si boboho tea. Pamajikan engko Ciang anu kahiji maot basa ngalahirkeun si Thai Si Rit. sanggeus sababaraha lila ngaduda, engko Ciang kapincut ku Nyi Sarboah anu montok bahenol eplok cendol, anu ahirna mah dikawin ku manehna. Kahirupan kulawarga babah Thai Ku Ciang runtut raut sauyunan.Sanajan ka anak tere, Nyi Sarbo'ah nyaaheun pisan ka Thai Si Rit teh, sabab budakna keur lucu teh bageur henteu carekkeun. Babah Thai Ku Ciang teh pakasabana dagang di Pasar Golodog. Manehna ngajualan sarupaning alat elektronik kayaning Henpon, Komputer, jeung asesorisna. "Ma, ujang rek ameng heula nya" ceuk hiji budak anu taya lain si Kucrit Persihiji, anakna Kabayan. "Enya jig, tapi uihna ulah burit teuing nya. Yeuh ema boga tomat dua, keur ujang hiji keur si Thai Si Rit hiji" walon nyi Iteung bari mikeun buah tomat dua siki nu galede ka si Kucrit. Si Kucrit umurna geus nincak 9 taun. manehna jeung Thai Si Rit sakola di SD Otodidak. Di babakan Linux aya komplek sakolaan anu ngarana Otodidak. Di Otodidak, sakola teh lengkep ti mimiti TK, SD, SMP, SMU & SMK sagala jurusan, Politeknik, nepi ka Universitas ge aya. malah anu hayang neruskeun Pasca Sarjana jeung program Doktoral oge aya. Samalah Post Doktoral oge aya. Komplek sakola Otodidak teh mimitina di wangun ku saurang guru anu linuhung anu ngarana Pa Ngalaman. Nepi ka ayeuna, Pa Ngalaman teh mangrupakeun salah sahiji guru anu gede pisan pangaruhna dina kagiatan kaelmuan di Komplek sakola Otodidak. Dina hiji poe, si Kucrit ngarenghik ka bapana hayang di pangmeulikeun komputer. Cenah di sakolana geus diajar komputer si Kucrit teh, jeung deui manehna oge resep nyoo komputer. Atuh bapana eleh deet, nya dina poe minggu si Kabayan ngajak anakna ka toko babah Thai Ku Ciang di pasar Golodog. "Assalamu'alaikum Ko." "Hayya... wa'alaikum salaam. eleu-eleu geuning aya kang Kabayang. Bade kamana kang Kabayang teh?" "Ngahaja Ko ulin ka toko engko. itu anak kuring si Kucrit, ngarenghik hayang komputer cenah. cik cik cik, komputer anu alus merek naon Ko?" "Hayya, kang Kabayang, lamun komputel beda ejeung TV. teu bisa nanya melek naon, ku sabab komputel mah lolobana dijual lakitan." "Ah si Engko mah, meuli komputer teh kawas meuli munding wae, kudu meuli sarakit. Ieuh Ko, kuring mah ngan butuh hiji komputer teh, eta we keur si Kucrit wungkul, moal meuli dua, da barina oge jang naon nu hiji deuina?" "Hayya, kang Kabayang teh kumaha, cenah rek meuli komputel, tapi kalah ngomongkeun munding. teu ngalti oe mah." "Atuh da eta geuning si engko nyaritakeun, komputer mah dijualna rakitan. Kapanan anu sok dijual rakitan mah munding lain? sarakit na teh dua." "Eleu-eleu lain lakitan dua atuh kang Kabayang, lamun komputel mah, lakitan teh haltina hiji komputer dijieun tina alat-alat anu beda-beda melekna." "Lah beuki teu ngarti kuring mah, geus lah kieu weh. urang tanya we ka budak na, hayang komputer teh anu kumaha. Cik ujang, hayang komputer teh nu kumaha ?" ***nyambung euy :D