Teu cara ayeuna cukup ku sms atawa ku imél nepikeun kereteg haté téh, baheula mah salain salam témpél ogé kudu ngagutrut nyieun surat cinta, tulisana teu sirikna diukir, rerenggian kawas korsi jepara. Da mémang enya pisan, nu mimiti ditilik téh tulisana heula, nu rumasa tulisana siga cékér hayam sok ngongkon ka batur atawa diborongkeun sagala rupana ka panglayar,da wirang ari kudu ngasongkeun surat bari jeung tulisana rangkebék mah, manan dibaca boa malah dibawa ka apoték da disangka resép dokter.
Salian modél tulisana, nu teu éléh pentingna, eusi suratna kudu puguh éntép seureuhna tur kudu dibumbuan ku kecap kecap nu rada puitis. Teu mokaha, munggaran nyieun surat, méh béak sabuku salah deui salah deui, ku can biasa téa. Ilaharna nyieun surat cinta sok dimimitian ku kecap "toek" diteruskeun ku kecap "adinda" terus ngaran nu diketrék, dipungkas ku kecap "di peraduan yang sepi" saterusna mah ka poko surat anu dimimitian ku kecap salam perkenalan sok disingkat jadi "lam kenal" dipungkas ku pantun nu geus teu bireuk deui nyaéta, empat kali empat enam belas, sempat tidak sempat harus dibalas. Saméméh diasupkeun kana amplop, surat cinta kelir kayas téh dibaca heula sababaraha rintakan, bisi pahili ngaran jeung nu dikirim kamari, geus yakin jeung geus dilipet rapih, sup diasupkeun kana amplop. Kencling dibikeun ka panglayar. Sapoé tiharita panglayar méré kodeu ngacungkeun jempol saopat opat, yén surat téh cenah geus dibikeun ka nu di anjing cai. Ditunggu sapoé, dua poé, surat balesan téh can jol baé, haté tagiwur lir nunggu hasil ujian atawa kawas salaki nu keur nungguan pamajikanana ngajuru. Ditunggu dilebah péngkolan lebeng, didagoan digarduh ronda ogé sirna, beuheung gé geus teu bisa dilieukeun deui lantaran geus kaliwatan sosonggéteun. Poé katilu, panglayar séréngéh bari ngagigiwing surat, song dibikeun. Teu langsung dibuka, dirigdig ka hareupeun eunteung, sura seuri sorangan, blég wé jalma owah. Hasilna bisa ditebak lamun pas dibuka sura seurina malah tambah angot bari dulak delék gumasév, éta téh tandana ditarima, tapi mun pas dibuka jadi robah pasemon ngadadak reup beureum ray pias,éta téh tandana cau ambon dikorangan kanyéré kapipir pipir, hmm....geuning ambon sorangan, embé mah teu mikir-mikir, teuing naon nu kurang, naha surat cintana nu kurang puitis atawa beungeut nu kudu dipermak deui. syam ridwan www.keomsakedap.multiply.com