Harita, jam 5:18 isuk-isuk poe salasa, awal bulan Muharam 1400H (20 November 1979), sabudeureun 100 rewu jamaah keur khusuk sholat ngurilingan Ka'bah, wangunan kuno nu dibungkus ku sutra hideung disulam emas. Tapi kakara ge rengse Iman nutup do'a menta katengtreman, ujug-ujug beledag aya sora bedil ngabeledug, sorana bergema ka buruan masjid. Para Jamaah panik nempo saurang nonoman nyenyekel bedil dileungeunna, rurusuhan nuju Ka'bah. Nu sejenna nembakan kumpulan japati nu biasana ngagorombol di wangunan plaza di luar Masjidil Haram.
Aya naon ieu? Aya naon ieu? Aya kaributan naon? Para jamaah ting harewos. Engke meureun bakal aya penjelasan, ceuk nu saurang,. Ah meureun jalma-jalma nu mamawa pakarang teh pangawal saurang pangeran karajaan, atawa malah Raja Khaled sorangan?. Nu lain urang Saudi malah nyangka, meureun ieu salah sahaji cara urang Arab Saudi dina ngarayakeun Tahun Baru....(Islam). Para Jamaah anu paham ngarasa teu panuju. Keur maranehna, tumbuk-tembak di Masjidil Haram hiji pagawean kacida gorengna. Teu kungsi dina sajarah aya kajadian siga kieu di tempat anu suci ieu.Para Jamaah bari hariwang nempokeun jalma-jalma nu mamawa pakarang beuki ngadeukeutan Ka'bah. Pulisi Masjid Haram sorangan nu ukur mamawa tongkat keur nyieuhkeun jamaah ti luar negri anu nyieun onar, lalaunan ngajauhan sanggeus dua urang panjaga nu nyoba ngalawan, perlaya dideukeut tembok. Di tengah kaributan, Juhaiman al-Utaibi, pamimpin nu borontak, mucunghul ti jero masjid. Manehna saurang khatib Badui nu umurna 43 taun. Panonna hideung, biwirna sensual, buukna tepikana taktak jeung janggotna nu "berombak". Make jubah tradisional Saudi warna bodas, nu dipotong pondok tepi kana mumuncangan, simbol tina penolakan kana kakayaan materi. Beda jeung anak buahna nu mamawa pakarang, manehna teu make panutup sirah, ukur make pita bulao dibeulitkeun dina sirah, bari dipasang asal-asalan. Diapit ku tilu urang anak buahna nu mawa pakarang Juhaiman norobos kurumunan di pelataran, nuju ka Ka'bah nu suci jeung Imam Masjid. Sang Imam, Ulama Syekh Muhammad bin Subail nu tadina nyanghareup ka Ka'bah ngalieuk nempo kaributan diantara para jammah. Tapi manehna mere isyarat yen manehna nangtung digigireun peti mati. Peti mati eta eusina mayit beneran, mayit budak leutik. Kulawarga budak anu maot, ngaharepkeun do'a keur mayit, teu malire keur aya kaributan. Sang Ulama nurut pamenta macakeun do'a-doa suci panghormatan keur mayit. Diwaktu eta manehna sadar Juhaiman jeung jalma2 nu mawa pakarang teh geuning jalma-jalma nu sok ngadengekeun kuliah-kuliah Islamna di Mekkah. Rasa sieun mucunghul waktu Juhaiman, bari teu hormat pisan, ngadorong sang Ulama kagigir, sakaligus ngarebut mikrofon. Waktu sang Iman teu mikeun, salah saurang perusuh nyabut balati jeung ngagogorowok tarik pisan, siap-siap arek nubles. Bari ngajaringjing sapatu, rewuan jalma lalumpatan nuju kana tembok pager, ngan 51 urang kakurung. Jalma-jalma nu mawa pakarang beuki "beringas", ngahalangan jamaah anu rek kaluar. Teu nyaho kudu kumaha, para jamaah miimiti ngagorowokkeun takbir "Allahu Akbar" - "Allah Maha Besar" - doa kapercayaan Muslim lamun ngalaman kasusah. Jalma-jalma nu mawa pakarang teh, teu disangka sarua ngiluan takbir, nu nyababkeun tambah ngaguruh ku sora takbir ka juru-juru masjid. Waktu sora ngaguruh mimiti eureun, Juhaiman ngagorowokeun intruksi militer dina mikrofon. Kontan anak buahna nu geus kalatih ngabeulah kuruman, masang bedil mesin di tujuh puncak menara tempat suci ieu. Jammah nu ditewak sina mantuan. Sababaraha urang sina ngagulung rewuan karpet terus dijejerkeun dipelataran. Nu paling pikahariwangeun, jamaah nu dipaksa ditodong pestol sina naek taraje ka puncak menara, mawa cai sakaligus amunisi. Proses "ambil-alih" tempat Suci ngan sakeudeung jeung sampurna sukses ......
