Teuing kumaha rasana beuleum lauk model Jimbaran Bali teh, da kuring acan kungsi ngasaan, maklum sanajan kungsi sababraha kali ka Bali (lain ulin tapi ku pagawean), tara ngahajakeun jajan di tempat parawisata, sieun mahal ....hehehe. Tah poe saptu kamari kuring jeung pamajikan neangan bibit bubuahan di Sukahaji Rajagaluh majalengka keur pelakeun di buruan. Kulantaran lieur ku pamajikan nu palah-pilih wae bibit, kuring rarat-reret sugan aya tempat keur diuk nungguan pamajikan balanja pepelakan, breh katempo aya Rumah Makan nu make merek "Ikan Bakar Ala Jimbaran". Ah teu dipikir deui, kuring ngajak budak, ninggalkeun indungna nu keur paciweuh padungdengan jeung nu jualan bibit, asup ka Rumah Makan eta.
Rada kaget oge, kakara oge rentang-rentang rek asup, si pelayan geus tuturubun siap-siap nyambut. Kuring asup bari tempa-tempo dituturkeun ku pelayan. Geuningan tempat daharna mangrupakeun saung-saung "lesehan". Kuring jeung budak milih salah sahiji saung. Si pelayan ngasongkeun menu nu eusina rupa-rupa lauk nu dibeuleum atawa digoreng. Aya lauk laut aya oge gurame. Hanjakal dina menuna teh teu aya hargana. Sieun mahal ....sabab biasana ari kadaharan "seafood" mah hargana sok leuwih onjoy, kuring nanya ieu teh sabarahaan. Si Pelayan kalahka cengar-cengir, teu terang cenah. Jadi rada bingung, untung ibu-ibu dicindung nu nanggeuy baki mawa gelas inuman, manehna ngilu nembalan: "Aduh punten Bapa, nembe buka ngawitan dinten ieu, sadayana masih panik, teu puguh cabak. Langkung sae bapa ningalian wae, mana lauk nu dipilih, tuh dina boks" Sigana si Ibu teh nu bogana. Kuring nurut nempoan lauk dina boks bari dibarengan ku saurang lalaki didinya (singhoreng si Bapa teh salakina si Ibu) Laukna Kakap bodas, gurame jeung nila. Kakap bodasna cenah meunang hese neangan ti Indramayu. Kuring rada ngahuleng, sabab biasana lauk laut nu ngeunah dibeuleum mah lain kakap, tapi baronang atawa bawal. Tapi kulantaran euweuh, nya teu nananon lah kakap bodas oge. Sanggeus nungguan ampir satengah jam, pesenan kuring datang. Barang diasaan ....luar biasa, maknyus alias nikmat. Bumbuna beda jeung lauk beuleum di Bandung, nu biasana ukur kecap dicabean. Bisaan si Bapa (atawa si Ibu) masakna, ngan hanjakal pisan ku lila nungguanana. Waktu mayar, si Bapa teh menta kritik ti kuring. Ceuk kuring teh lauk beuleumna mah luar biasa ngeunahna, ngan hanjakal pelayanana lila jeung jiga mani pabaliut kitu. Si Bapa nu boga teh menta dihampura, maklum kakara buka poe ieu. Ku kuring teh ditanya: "Lami Pa ngumbara di Bali?' "13 taun, bisnis batu, mung ayeuna nuju lesu, nya nyobian muka rumah makan di lembur", cenah. Duka batu naon, ngan waktu ditempo bon makan, geningan si bapa teh make bon CV di bali, nu aya kecap-kecap "carving" ...... Tah baraya upami ngalangkung ka Sukahaji- Rajagaluh Majalengka, di tempat nu ngajualan bibit bubuahan, mangga geura cobian, beuleum lauk lautna. Promosi saeutik, keur ngahargaan si Bapa jeung si Ibu nu geus wani nandonkeun muka usaha anyar. Kawani muka usaha pan perlu dihargaan sanes? Baktos, WALUYA