Kumalayang (Bag. Ka-1) Ku Kebo Hideung/Mang Utas #28/02/2009 Sapanjang jalan Tasik Kuningan angin sareupna ngagelebug neumbrag kaca beus anu ku kuring ditumpakan, diwuwuh kusora tonggeret pacampuh jeung sora cihcir nganteur lamunan kuring ka alam katukang. Ngalayang kakalayangan mapay-mapay kajadian basa keur budak.
Sakapeung mah kuring nyerengeh seuri sorangan sok inget ka babaturan baheula. Heueuh kapanan harita si Rukmana diudag-udag ku Mang Ajo, pedah buahna anu hareupeun imah Mang Ajo ditenggoran ku si Rukmana. Da eta si Rukmana diuber saleuleusna lumpat ka galengan sawah tugujubar duanana..lamokot tah ku leutak. Anu akhirna si Mang Ajo anu sakitu geus kolot beakeun napas ngahegak teu bisa hudang.. atuh ku Si Rukmana ditulungan, gek duanana dariuk sisi galengan bari papelong-pelong. Kalayang deui lamunan kuring entreup ka suhunan imah bapa kuring, dina luhur dipan Bapa kuring keur ngajepat bangun anu teu walakaya, cindekna mah harita teh Bapa kuring keur gering galingging panas tiris, tunjangeuna Mimih kuring ngarancetan suku Bapa kuring. Tina luhur suhunan kuring ngadenge Mimih kuring ngagerendeng, "Pa..si Ujang wayah kieu can mulang keneh jaba rek hujan." "Jeung saha atuh ngaritna?" tembal Bapa kuring bari rada humarurung. "Tadi mah jeung si Daswa..ceunah mah ngaritna rada jauh." tembal mimih kuring "Kamana ceunah ka Gunung Sarongge ?" tanya si Bapa "Kaditu..ka Ciburial ceunah, paur ka pegat caah we budak teh." tembal si Mimih bari rada carindakdak. Di luhur suhunan kuring nyurucudkeun cai mata, duh..geuning kanyaah Indung Bapa kuring teu aya watesna..tileuleutik tug ka ayeuna geus boga budak angger kanyaah kolot kuring teu luntur ku waktu teu laas ku kaayaan. Sok ras inget kuring boga tulisan ngeunaan kanyaah indung Bapa anu unina kieu : Kanyaah Indung Bapa Gubrag ka alam dunya, koceak dengekna jentre meupeuskeun jemplingna peuting. Disanggap ku cireumbay kabungah nu jadi kolot. Renghap-ranjugna indung nu ngalahirkeun, Kahariwangna Bapa anu teu aya watesna Kaubaran ku ngagoakna ceurik kuring. Belenyehna seuri kuring matak gumbira anu jadi kolot, Rengkak polahna kuring jadi bahan gogonjakan anu jadi kolot. Waktu kuring nandangan lara kolot kuring bingung anu teu aya hinggana, Teu kuat ngabendung kabingung indung kuring nyegruk ceurik. Ningali kuring kasampak gering bapa kuring ngahelas bangun nalangsa, nalangsa pinuh ku kanyaah. Basa kuring geus jadi nonoman, teu saeutik kuring boga masalah Kasaha deui mun teu ka kolot kuring, kuring ngadu Bapa kuring anu ngabeberes masalah kuring Indung kuring anu ngupahan rasa kasedih kuring Ayeuna kuring geus gede Ayeuna kolot kuring geus rarempo Asa can pernah kuring mulang tarima Nu aya ngan ngaririweuh jeung mere kapusing anu jadi kolot Boh indung kuring atawa bapa kuring Dugi kaayeuna kanyaahna teu pegat-pegat Kajeun jauh ditungtung lembur Kajeun anggang ti pakarangan Kanyaah indung bapa kuring tetep pageuh teu aya watesna Duh...Ema, Bapa hampura kuring kuring teu acan tiasa mulang tarima kanu jadi kolot----------------------------------------------- Sakitu heula..Insya Allah disambung deui Salam Mang Utas New Email names for you! Get the Email name you've always wanted on the new @ymail and @rocketmail. Hurry before someone else does! http://mail.promotions.yahoo.com/newdomains/sg/