I love you pul....Nini! Kocap kacarita tahu kecap dicampur kareta, dilembur singkur bujur demplu kacaritakeun aya sapasang aki aki jeung nini nini, siaki katelahna aki Jumhari mun kenalan jeung wanoja sok ngaku hari, ari sinini wastana nini ijot ngan sok embung dicalukan ijot hayangna cathrine wae. Maranehna geus tujuh puluh taun ngarumahtangga kalayan pul romantis. Ngan kabehdieukeun sikep aki Jumhari ngadadak robah duaratus darojat, jadi senseu gampang nyeuneu jeung gampang kasinggung, malah mindeng teu balik sagala. Wah boa aki Jumhari boga WIL eh NIL ketah Nini nini Idaman Lain. Padahal naon kurangna nini Ijot, ruruntuk kageulisanana masih ngadalis, kawantu baheulana kungsi jadi model iklan jamu rapet pisan.
"Nini.....nini...kamana nya? Sikasebelan teh ari keur perelu mah sok ngiles!" aki Jumhari gura gero ti tengah imah. Nu digeroanana mah jongjon we camegoh dihareupeun hawu, teuing lengle teuing geus kurang denge, atawa boa pundung pedah ngagenjleh menta dipangmeulikeun lejing teu digugu. Panggerona teu diwaro aki Jumhari terus cengkat tina korsi goyangna, gap kana iteuk, rampeol ngalengkah, getruk iteukna nete kana palupuh, leumpang muru dapur. Ningali nini ijot aya dihareupeun hawu, aki jumhari mudigdig. "Ijot....ijot geus torek meureunnya!" Bari nek sabek-bekeun iteukna diteunggeulkeun kana tonggong nini ijot, untung teu jadi, mun tea mah jadi, aki Jumhari bakal keuna pasal KDRT tur bakal riweuh sabab bakal diuber uber wartawan infotaintmen, beritana bakal heboh "Mantan Model Tahun Enampuluhan Dianiyaya Suaminya" jadi headline diunggal media. Nini ijot ngarenjag lantaran bujurna aya nu noel, pas ditingali horeng aya iteuk ulang ulangan palebah dinya. "Wawadukan atuh aki, make ngarojok bujur kami!" nini ijot muncereng. "Yeuh ijot nya teu kadenge dewek gura gero titatadi!" "Naon....ngomong naon?" "Leuh bener geus torek, kobet geura ceulina!" Ngomongna leuwih tarik tur disongokeun kana ceuli nini ijot. "Naha da ceuli kami mah beresih!" bari terus curukna dikobetkeun kana ceuli kenca katuhu, geclik ara nu murag, ngaguruntul hideung. "Tuh nya tara ngaku, geuning ieu yeuh buktina!" ceuk aki jumhari bari nyoeran nu ngaruntul ku iteuk. "Euleuh naha sisig bet nalaktak kana ceuli sagala, paingan ceuli asa mepeg!" "Lain nalaktak nini, dasar nini nini geus kurang deuleu, samarukna earphone hape, der sisig didedetkeun kana ceuli!" "Ma'lum atuh hirup geus dalapan puluh taun, dibere nyawa keneh ge untung, aya naon atuh make gura gero?" "Puguh aki teh titatadi kutatang koteteng neangan padudan,poho teuing dimana sokna, cik sugan nini nempo!" "Leuh ari eta naon?" ceuk nini ijot bari nunjuk ka irung aki jumhari. "Astagfirulloh..Lailahailalloh...panyana kami nu ngampleh na irung teh bulu irung poho neukteuk singhoreng padudan geuning!" "Nyao ah...teu hayang seuri...tadina mah moal nembalan, sebel...sebel..sebel deuleu!" "Baruk keur sebel..sebel kunaon nini, boa keur nyiram?" "Nyiram tai pedut...nu puguh mah sebel ka aki, saban usik sok ngaladog jeung poho kabalik, sok ngaku pasti aya nu dianjing cai nya?!" "Heueuh hampura..nini! teu balik soteh lain aya nu diheroan, kanu kitu mah geus insap deuleu...!" "Geus insap tujuhpuluh..geuning basa panggih jeung nu bahenol paroman aki jadi mupeng kitu!" "Heueuh insap soteh ka nini nini da ari kanu bahenol mah lebar atuh ari teu ditempo mah nini!" "Waduk!" "Jadi kamari teu balik dua poe dua peuting nempoan nu bahenol kitu?" "Sweer nini! henteu..! Teu balik soteh kieu...basa keur digardu ronda panggih jeung anatoli karvov, der ngajak catur, duapoe dua peuting catur remis wae!" "Teuing ah..pokona mun can dipanghariringkeun moal cageur ngambekna!" "Euleuh jadi hayang dipanghariringkeun? Okeh ready...Nini!" ceuk aki jumhari bari regeyeng ngagandong nini ijot terus ngahaleuang. "Ta' gendong.....kemana mana....ta' gendong kemana mana..enak toh..asik toh....ay lap yu pul Nini.....ha ha ha...!"(sr)