Patung Putri Duyung Mang Jamal
Dina salah sahiji kaléng biskuit nu katelah biskuit Dénmark sok aya gambar patung Putri Duyung. Nu ngaran putri duyung téh cenah mangrupa mahluk nu kaluhurna wanoja, kahandap lauk, kumplit jeung sisit oge buntut. Ari patungna, ditempatkeun sina anéprok luhureun batu, di sisi basisir kota Kopenhagen, persisna di wewengkon Langelinie, Kopenhagen Kalér. Di éta nagara, Putri Duyung disebutna Den lille Havrue, basa Inggrisna mah Little Mermaid tea. Munggaran ditempatkeun di dinya jeung diresmikeun tanggal 23 Agustus 1913. Bahan patung teh tina perunggu. Leutik Unggal turis nu ngahaja datang ke tempat patung Putri Duyung éta, sanggeus jonghok, biasana karagét. Ucapan kaget nu umum biasana mah, Geuning leutik? Enya, sanajan kakoncara kamana-mana, sabenerna patung Putri Duyung téh kaitung leutik, ngan ukur 1,25 meter jangkungna (da keur anéprok tea) jeung beuratna 175 kg. Make batu pangdiukan sangkan rada jangkung méh gampang katenjo ti kajauhan. Perenahna rada anggang ti jalan, kudu turun ka basisir nu diamparan batu. Soal leutik mah nya meureun nyaluyukeun karep jeung nagara Denmark nu teu kaitung gede, boh legana nu sigana ngan sagede propinsi di nagara urang, oge populasi wargana nu ngan ukur 5,5 juta jiwa. Ngan kubisana promosi kamana mendi, patung leutik kitu patut jadi kakoncara jadi tangara kota Kopenhagen jeung malah jadi tangara nagara Denmark. Teu éléh ku patung nu baradag di dunya cara patung Liberty di New York, munara Eiffel di Paris komo jeung Monas di Jakarta atawa patung panglima Angkatan Laut di Surabaya nu teu kadengé promosina pikeun jadi tempat jugjugeun piknik alias wisata téa. Nu nyieun patung Putri Duyung éta, seniman patung Edvard Eriksen, make model penari ballet Ellen Prince, nu kabeneran keur milu minton dina opera di gedong opera Kopenhagen. Patung éta téh pesenan Carl Jacobsen, juragan pabrik bir Carlsberg, pikeun ngahias kota Kopenhagen. Putri Duyung nu ieu mah lain ti mitos atawa legenda kota Kopenhagen atawa Denmark, tapi estuning ti carita karangan Hans Christian Andersen, tukang ngarang carita barudak nu bukuna geus disalin ka ratusan basa di dunya. Ibur Sanagara Patung Putri Duyung sok aya nu ngaheureuyan ku cara deleka nu ngabalukarkeun ibur sanagara. Sababaraha kali kajadian, patung Putri Duyung teh euweuh sirahan, alatan aya nu motong. Kajadian kitu matak ibur sanagara, dimuat di koran jeung tv sagala. Sirah patung eta aya nu terus disumputkeun bari teu kapanggih, aya oge nu mulangkeun deui malah aya nu mulangkeun teh hareupeun stasion televisi. Sigana sangkan langsung dibejakan dina tivi sangkan masarakat teu terus lengiteun sirah patung Putri Duyung. Cenah mah kajadian kitu teh geus aya kana opat kalina. Palebah sirah patung teu kapanggih atawa teu dibalikkeun ku anu ngarusakna, pemkot Kopenhagen menta ka seniman patung sangkan nyieun deui sirah patung Putri Duyung, tuluy dipasangkeun deui. Aya-aya wae! (MJ) Dimuat majalah basa Sunda Cupumanik. Poho deui nu nomer sabaraha :-)