Demi batik Sunda, tangtu bae, budayawan jugala cara Pa Ajip, oge kanca-kancana nu ngiring nyalerat Ensiklopedi Sunda, teu nyabit-nyabit kakait batik Sunda jeung Majapahit. Sanajan, “dokumen-dokumen resmi” nu nyampak, keukeuh mertelakeun pakait eta karajaan jeung batik. Lian ti kitu, sawatara ahli, paling heunteu nu narulis sawatara buku ngeunaan batik, nyebutkeun yen batik teh aya pakaitna jeung Islamisasi di Pulo Jawa. Malah, pan kadieunakeun, ieu industri teh pagiling-gisik jeung gerakan Islam (jeung nasionalisme). Sakadar nyebut inohong jeung dokumentasi (sajarah) nu nyampak, salah sahiji gegedug Sarekat Islam, H.Samanhudi, lain bae sodagar batik tapi – sakumaha disebut -- oge miboga gelar haji. Demi gelar ieu, ku khusnuzdon urang, lain bae kadar nembongkeun status ekonomi jeung sosial. Tapi oge mertelakeun maqom kaimanan. Sanajan, ceuk Parakitri, inohong-inohong SI/SDI satemenna teu boga niat ngadegkeun eta pakumpulan. Aranjeunna kadar katempuhan buntut maung ku kaayaan nu nyampak harita. Perkara Islam jeung batik eta, oge nyampak di Tatar Sunda. Kaasup di Garut, Tasik, oge Ciamis, nu jadi puseur The Dancing Peacock. Malah, salah sahiji sodagar batik di Garut, ngagaduhan putra nu engke icikibung – mun lain mere wanda – dina dunya kreatif Indonesia, bari teu weleh liket jeung ka-Islam-an: Ahmad Sadali dina widang seni lukis, Ahmad Noe’man dina widang arsitektur. Pan dua inohong ieu nepi ka kiwari jadi trademark pikeun senilukis kaligrafi jeung arstektur masigit? Balik deui ka Pa Ajip jeung Ensiklopedi Sunda, batik di urang paling heunteu geus disebut-sebut ku Siksa Kanda Ng Karesian. Hartina, paling heunteu geus nyampak ti abad 16 keneh. (Ari Majapahit abad ka sabaraha, nya?). Ceuk Pa Ajip saparakanca, harita urang Sunda geus boga istilah sorangan pikeun lawon: samping jeung batik. Demi corak atawa motif nu nyampak harita, di antarana: pupujengan, hihinggulan, kekembangan, alas-alasan, sisirangan, toruk hata, kembang tarate. Lian ti eta, aya oge corak kembang muncang, gagang senggang, anyam cayut, poleng rengganis, surat awi dan hujan riris. Satutasna Sultan Agung ngalurug Batawi (1628 jeung 1629), ieu mah pangwawaas kuring dumasar kana sawatara pamanggih pakait jeung batik Sunda, kitu ge bari ngaaminan yen pasukan Mataram harita teh api-apina malulu urang Jawa, pasukan Sumedang jeung Banyumas dianggap euweuh, sawatara urang Jawa ngadon bumen-bumen di tatar Sunda. Teu baralik deui ka lemburna. Di antarana, nya ngilu ngahirupkeun batik di urang. Sakumaha tilu pangeran Sumedang ngadon ngababakan di tempat nu kiwari disebut Tiga Raksa, Tangerang. Ngeunaan urang Jawa dina batik Sunda teh, nerap deui satutas jeung salila campuhna Perang Diponegoro. Ceuk sawatara artikel, teu saeutik urang Jawa (Yogya jeung sabudeureunana) ngadon ngarungsi ka Tatar Sunda – boh ka Banyumas, Pakalongan, Tegal, Brebes, Cirebon, Tasik, Ciamis, Garut, jeung Cianjur. Sakumaha veteran pasukan Sultan Agung, para veteran Perang Diponegoro ieu ge ngilu aub dina perkara batik. Nya ti harita, ti zaman Mataram eta, corak batik urang kapangaruhan ku corak batik nu nyampak di Jawa. Di antarana, motif sidomukti, rereng, jeung parang. Malah, ceuk sawatara kolot, boh urang Jawa boh urang Sunda, nu ngamimitian ngarahayatkeun motif rereng teh nya urang Sunda. Sabab, mangsa di Mataram mah, cenah, ieu motif teh mutlak anggoeun Sultan sareng kulawargana. Sanajan di Sunda ge, harita, can sangarahayat cara nu nyampak kiwari. Nu dimaksud ngarahayat teh ukur teu diangge Sultan wungkul, geus turun ka pangkat adipati, patih jeung wadana. Prah dipake umum atawa cacah somah mah, geus kadieunakeun. Sanggeus revolusi kamerdekaan. Ari Aki Endang? Sanajan tepang sareng anjeunna di Pakalongan, disambung di Kebon Jeruk, Jakarta, 1981-2002, si Aki teh pituin urang Manonjaya, Tasik. Mun nyekel kana kasauran anjeunna, yen taun 1981 harita yuswana tos 62, hartina anjeunna teh kalahiran taun 1919. (Pupus taun 2002, dina yuswa 83. Yuswana nu kalintang panjang keur ukuran kiwari). Alatan rama sareng eyangna ngiring ilubiung dina dunya perbatikan, di antarana garaduheun studio batik di Sukapura sareng Mangkubumi, Tasik, atuh anjeunna apal pisan zaman kajayaan batik Sunda umumna, batik Tasik khususna. Malah, anjeunna apal kumaha Bung Hatta sumping ka Tasik seja muka Kongres Koperasi Indonesia ka-Hiji sakaligus ngainpeksi kaayaan industri batik di Tasikmalaya harita, kaasup kayaaan Koperasi Mitra Batik (12 Juli 1947). Sakumakaha geus jadi kaweruh urang sarerea, Mitra Batik, nu diadegkeun taun 1939, ngarupakeun koperasi batik munggaran di Indonesia. Koperasi ieu nu engke jadi motor GKBI (Gabungan Koperasi Batik Indonesia), nu gedongna di Jakarta kiwari geus obah jadi Bursa Efek Jakarta jeung Pacific Place Jakarta. Tapak jeung titinggal pabrik batik urang Sunda nu kungsi aya di Jakarta, burantak mangsa Bung Karno jeung Ir.Sutami nyieun Jembatan Semanggi samemeh Ganefo, taun 60-an. Maman Gantra Jalan Salemba Tengah 51, Jakarta 10440. 0812-940-5441