Para wargi, Hiji tulisan dina yahoo tembong jujur ngahargaan, tumarima, jeung ngaku kana fungsi agama, khususna Islam. Eta warta oge atra - lamun arek dihubung-hubungkeun - ngarupakeun pangaku kana thesisna kang Prof Ahmad Mansur Suryanagara dina bukuna, "Api Sajarah", anu nyodorkeun peran penting umat Islam dina ngawangun NKRI ieu. Eta warta / seratan tiasa ditoong di dieu: http://id.news.yahoo.com/kmps/20100908/tpl-terima-kasih-islam-81d2141.html
Wilujeng (mapag) boboran shiam 1 Syawal 1431 H, tina fitrah, balik deui kana fitrah, hapunten samudaya kalepatan, mugia urang kenging barokah, rahmah sareng magfirah dina sasih Ramadhan anu sakeudeung deui baris ninggalkeun urang sadaya. Mugia ku kasilihna sasih shiam ku sasih sawal jeung saterusna urang nyangking tujuan utama ngalakukeun shaum, nyaeta: pikeun syukuran jeung ngagungkeun (ngageungkeun) ukur Alloh swt. Teu aya anu ageung atawa teu aya anu leuwih penting iwal ti Alloh. Syukur hartina ngamanfaatkeun sakabeh nikmat ti Gusti pikeun ibadah ka anjeun-Na. Buahna ibadah - ceuk hiji katerangan - nyoko kana tilu hal: 1) Nyibukkeun diri ku aib atawa kakurangan sorangan tinimbang nyibukkeun diri ku nguruskeun kakurangan atawa aeb anu lian. Kukituna, dirina jadi sibuk ku memener pagawean sorangananna jeung nambahan pangabdiana ka Pangeranna. 2) henteu ngarasa mibanda atawa ngabogaan da sadayana oge hakekatna mah kagungan Alloh, sakitu rupa nepi ka enteng dina ngalakukeun zakat, infak, jeung amal jariyah atawa mere maweh atawa tutulung ka nu lian; 3) henteu milu ngatur kana urusan Gusti Alloh sakitu rupa nepi ka dirina tawekal dina nandangan cocoba, musibah atawa kailangan sarta toleran alias bisa ngahargaan ka anu lian. Ngagungkeun Pangeran, hartina: yen mumusuhan eta leutik, yen teu boga pakaya eta leutik jadi henteu kudu korupsi, jeung sajabana pangabutuh anu nepi ka ngorbankeun atawa nganggap teu aya panitenan ti Gusti eta sakabehna satemenna leutik dibanding kaagungan Pangeran anu sakuduna dipikasieun. Lamun sababaraha persen wae korupsi di Indonesia turun ti simet ayeuna ka hareup, eta hartina puasa sacara sagemblengna masyarakat Indonesia geus ngabuahkeun hasil. manar