Lebih doeloe kaizer soedah panggil Sijh Pi menghadep ia bilang: Diantara kami poenja panglima perang tjoema ada sedikit sekali jang boleh di pertjaja, dari itoe akoe prentahken padamoe boeat kepalaken ini expeditie. Sijh Pi lantas menjaoet: Kaizer jang prentah bagimana hamba bisa simpen rasa takoet boeat badan sendiri! Waktoe Sijh Pi dengen doea kepala perang jang laen dateng menghadep pada kaizer boeat pengabisan kali, kaizer pesen pada mereka: Kaloe kaoe orang soedah dateng di poelo Djawa, lantas moesti kasih taoe pada balatentara dan pada pendoedoek dari itoe negri, bahwa antara poelo Djawa dan Tiongkok doeloe kala ada persobatan jang kekel sekali, tetapi oetoesan Tiongkok jang paling belakang dateng di itoe negri soedah di aniaja dan di seksa seperti binatang dan bahwa sekarang kaoe orang dateng disana boeat kasih hoekoeman pada itoe Radja, boekan oentoek memoesoehi pendoedoek di ini Negri. Lantas radja moeda dari Foeh Kien dikasih prentah boeat koempoel dari ia poenja provencie dan dari doea provencie jang paling deket, dengen bilangan 20.000 serdadoe boeat angkat satoe kepala perang boeat bagian kiri dan satoe boeat bagian kanan, serta 4 panglima boeat kepalaken 10.000 serdadoe. Djoega boeat siapken 1000 kapal jang moesti dikasih rangsoem goena terpake satoe taon poenja lama dan 40.000 potongan perak. Dalem boelan pertama dari taon 1293, itoe expeditie berlaboeh di Billiton. Disana orang gergadji papan boeat bikin perahoe² ketjil, aken bisa teroes masoek di soengei² di poelo Djawa. Dan panglima² perang bermoefakatan satoe dengen laen'nja tentang atoeran ia orang moesti poekoel poelo Djawa. (*sampe disini kita moesti kagoem di taon terseboet bangsa Tionghoa soedah mengerti betoel teknik penjerboean setjara militair) Dalem boelan ke doea. Ike Mese, di ikoetin oleh satoe panglima, beberapa secretaris (penasehat) dan 3 offcier dari Raad Perdamaian berangkat ke poloe Djawa, boeat teroesken kaizer poenja prentah. Roepa'nja ia orang ada niat boeat tjoba bikin taloek orang Djawa dengen djalan damai. Sementara itoe bagian jang laen dari itoe expeditie pergi ke poelo² Karimon Djawa dan dari sana teroes ke Toeban, di pesisir Rembang jang menoeroet satoe kabaran Tionghoa dari taon 1418, ada satoe tempat dagang besar, dengen lebih dari 1000 roemah², antara mana ada banjak orang Tionghoa poenja. Di Toeban Sjih Pi dan Kaoe Hsing ketemoe lagi pada Ike Mese. Ike Mese poenja icthiar boeat bikin orang Djawa menakloek dengen djalan damai tida berhasil, dan oleh itoe tiga pimpinan perang diambil poetoesan boeat kasih naek separoh dari ia orang poenja balatentara kedarat. Sjih Pi teroes dengen kapal²nja pergi dimoeara'nja kali Sedajoe (kali Solo) dan dari sana teroes masoek di kali Mas atawa kali Soerabaia. Kaoe Hsing dan Ike Mese dengen balatentara jang di kasih naek di darat dari Toeban teroes masoek ke dalem negri; satoe kepala dari 10.000 sedadoe djadi kepala'nja barisan jang berdjalan di moeka. Dari Sedajoe jang soedah djatoh dalem tangan'nja orang Tionghoa, di kirim 3 panglima perang dengen prentah boeat rampas djembatan Madjapahit.
