Aha pembatja moengkin soedah banjak jang taoe, siapa itoe siansing jang di maksoedken dari ini djoedoel, kali ini saja moengkin berbeda dengen kebanjakan pembatja dalem menjikapi seorang bernama Atjin, biar ini kali soedoet laen jang pandang itoe siansing, satoe pemoeda Tionghoa jang sanget , ditambah, barangkali ia poenja njali ada 10x dari oekoeran njali orang biasa. Di sini saja moelai dari ia poenja kedjahatan jakni pemboenoehan berentjana, maka otomatis pasal 340 KUHP moesti ia pikoel, ditambah poetoesan jang tida bisa di goegat oleh siapapoen, di sebabken paloe hakim telah ketok itoe medja oentoek selesaiken" djiwa'nja Atjin. Boeat Atjin sendiri tida poenja pilihan laen katjoeali pertahanken ia poenja napas jang tjoema satoe kali ia bisa rasaken di ini doenia jang di beriken oleh Allah tampa orang laen boeat ikoet tjampoer. Bermoela ia mampoe kaboer dari pendjara di Tjirebon, selang beberapa lama roepa'nja bintang'nja Atjin sedeng redoep, hingga ia ketangkep (hm! saja liat pembatja keroetken moeka apa perloenja ini siansing di bitjaraken di ini toelisan). Tapi ini lakon belon berachir pembatja! Kali ini oesaha Atjin belon soeroet, di waktoe ia di besoek oleh ia poenja mama'nja setaoe gimana satoe pestol berhasil di seloendoepken oentoek anak'nja jang kandoeng selama 9 boelan wah ! Maka sewaktoe ia selesai persidangan, ia bikin pertjobaan lariken via auto boewi tjilaka itoe, tapi sajang itoe oesaha belon berhasil, lebih tjilakanja itoe pestol mengenai ia poenja kaki sendiri. Baroe taon laloe 2006, dengen setaoe tjara apa di tambah dengen Atjin poenja ketjerdikan hingga ia bisa bikin kontji palsoe dan tjoema dengen keloearken oewang 2,5 djoeta roepia, Atjin sambil berdjingkrak-djingkrak tinggalken itoe roemah boewi tjilaka. Di sini moesti diakoe ini siansing keloearken ia poenja ketjerdikan di tambah ia poenja njali jang besar'nja 10x dari njali orang biasa dan biar saja tambahken bahwa rasa tida kapok atawa djera tida pernah terdapet dalem otak pikiran Atjin. Sekarang saja maoe tjoba roendingken pada pembatja, satoe bekas boeroenan jang pernah lariken diri (boekan boeroenan jang belon pernah rasaken boewi) pasti aken di djaga sanget ketat djoega boekan perlakoean istimewa" jang ia dapetken seperti oepamanja satoe orang koroeptor jang tida kenjang²nja makan doewit ia poenja Negara diperlakoeken seperti kandjeng toean kendati ia berstatus Narapidana. Malah saja kadang denger satoe Tjongtiepo" kakap setelah ia djalanken hoekoeman jang tida seberapa lama, langsoeng bikin boekoe pengalaman jang ia pikir bisa apoes dan minta belas kasian pada masjarakat jang ia soedah pernah rampas doewit'nja. Hm pembatja bisa pikir sedirilah. Streeet ! stop saja tida maoe pandjang lebar roendingken itoe Tjongtiepo" karena boekan ia jang pantes di bitjaraken di toelisan ini. Dan sekarang kita kombali ke tokoh kita jalah Atjin. Setaoen berlaloe kombali bintang'nja Atjin goerem lagi, belon lama ini ia ketangkep lagi di satoe poesat perbelandjaan termodern di Djakarta. Sementara toenggoe meledaknja pelor di dada'nja Atjin, kira² apa jang ada di dalem batok kepala'nja Atjin??? Tjoema boeat orang jang pertjaja hidoep manoesia boekan berada di tangan satoe machloek jang bernama manoesia, tetapi ada di tangan jang Maha Koeasa aken liat apa Toehan Allah maoe tjaboet goenoengan atawa ini masih dalem goro-goro dalem penghidoepan seorang jang sedari ketjil di panggil sama ia poenja mama'nja bernama Atjin. Kaloe nanti telah poetoes njawa'nja seorang jang bernama Atjin. Rasanja segala manoar para pedjabat jang djelas-djelas di mata rakjat ini terlihat sanget terang belon lebih pantes, dan moengkin sanget mendjemoeken djika di bandingken kisahnja seorang pemoeda Tionghoa bernama Atjin, ini ada l00x lebih menarik boeat di bikinken toelisan beroepa boekoe. Sajang saja tida kenal dan tida poenja data djelas, dan rasa'nja di perloeken satoe penoelis jang maoe dan berpikiran djelek baek toch masih kita poenja kaoem oentoek boeatken kisah'nja sedari Atjin ketjil hingga (The study of mankind is man dan boekan maksoed saja boeat kesampingken perasaan korban jang telah di roegiken oleh Atjin, kerna itoe soal laen lagi) atawa itoe penoelis moesti toeggoe lebih lama lagi (red siapa taoe).
Hoedjin Tjamboek Berdoeri
