Prezados responsábeis da política tecnolóxica da Xunta: O Goberno galego aprobou no seu Consello do pasado 9 de xullo un conxunto de medidas que conforman a política tecnolóxica da Xunta ata o ano 2010. Para a miña sorpresa, comprobo que neste plan non aparece referenciada ningunha iniciativa de promoción do software libre ou de continuidade das existentes (como as Oficinas de Software Libre Universitarias ou Mancomún) nin tampouco compromiso algún para implantar estándares abertos na administración electrónica da Xunta.
O uso de software libre na Xunta suporía aforrar millóns de euros que actualmente se gastan en licenzas para usar programas que poderían ser substituídos polos seus equivalentes libres e gratuítos, igual que fixeron outras administracións públicas de toda Europa. A este respecto debo lembrarlle que durante a pasada campaña electoral o Partido Popular que actualmente goberna na Xunta prometeu literalmente: «Impulso da implantación de software libre e uso de estándares abertos na Administración Autonómica, compartindo e reutilizando o software que fose creado con diñeiro público, sen posicións dogmáticas fronte a catro anos de bipartito de impulso teórico e enchido de adxudicacións de software privativo» Como cidadán consciente da transcendencia que teñen as novas tecnoloxías da información e da comunicación para o futuro deste pais e o da súa lingua, quero manifestarlle a miña fonda preocupación pola ausencia total de compromiso neste sentido que está manifestando o actual goberno coas tecnoloxías libres, identificadas pola Comisión Europea como únicos garantes de interoperabilidade así como polo Goberno do Estado español. Galiza non pode quedar illada das autopistas internacionais da información e o software libre pode contribuír manternos conectados. Como poderá comprobar, son moitas as persoas que comparten comigo estas preocupacións que están levantando unha considerábel alarma social posto que afectan a proxectos da Xunta que teñen unha grande aceptación. Por este motivo considero conveniente e necesario que se posicione vostede con urxencia publicamente para aclarar o futuro de Mancomún así como o resto das iniciativas de promoción do software libre existentes. Finalmente, quero convidalo a potenciar as positivas actividades do Centro de Referencia e Servizos de Software Libre (Mancomún) posto que grazas a esa iniciativa dispoñemos hoxe en día no noso idioma dos programas informáticos máis populares como o navegador Firefox ou a ofimática OpenOffice. Sen máis, despídese atentamente. Marcelino Villarino Aguiar