[Goanet]KHUXEALBORIT NATALANCHI POROB!

[domnic fernandes]

Khuimcheanuch ek voros kabar zalem ani anik ek Natalanchi porob ievun amchea 
fuddean ubi ravli.  Aiz ami ugddass kortanv sabar vorsam adim ghoddlele eke 
ghoddnencho - Ballok Jezuchea ieannancho.  Hoi, koddkoddeanchem inv 
poddlelem Belea xaran.  Osle eke invache rati Jose ani Maria zoddpotalint 
ani sodtalint ek suat zolm divunk aplea putak.  Khuimchoruch tankam zago 
mevonam zavn, xekim tannem eka gorvanchea gottean rig getli ani thuimsor 
sonvsaracho sorvonddar zolmolo.  Povitr Purannan Devan amkam bassailelem eka 
dissak oxem ghoddon ietelem ki ballok kalloki sonvsarak uzvadd haddtolo - 
tem Devachem utor tea dissak purem zalem.

Tech invanche modiean rati, mendre raknne aplea xelliank choloitalet.  
Okosmat tannem pois thavn ek suadik avaz aikolo and teach barabor soglench 
ontroll uzvaddan bhorlem ani Devdut tachea fuddean ube ravon oxem gaitat tem 
tannem aikolem:  “Moima Devak unch sorgim ani xanti borea munxeank 
sonvsari.”

Tech modiean rati, udenti vatten teg vidvan aplea unttancher boson vetannam 
tannim avchit ontrollar ek kherit noketr pollelem jem ghoddien thambo ani 
ghoddien cholon voitalem.  Tea noketrak pollovn he teg vidvan thottakle ani 
takach pollovnk urlet - tem noketr tankam kitem tori sangonk sodtalem.

Te mendre raknne Devdutanim sanglelea pormonnem ap-apleo bhetto ghevun Belea 
xaran vochonk laglet.  Dusre vatten tem noketr, zacho te teg vidvan pattlav 
kortalet, ievun justuch Belea xaran eka gorvanchea gottea voir thamblem.  
Tor tea gottean tannem kitem pollelem zait?  Gorvanche khauddechi khatt 
korun nidlolo, potranim guttlailolo, Dev Putr amurkoch hanstalo ani taka 
sangat divunk sorbonvtim zonvaram aslint ani tosoch tacho posko bapui Jose 
ani avoi Maria.

Aiz sogott ami Jezuchea zolmancho dis monoitanv.  Devan aplea ekleach putak, 
Jezu Kristak, munxeakullachi soddvonn korunk hea sonvsarant pattoilo.  Hoi, 
to raza razancho ani asro patkeancho eka gorvanchea gottean zolmolo 
nastannam ek punn angostr tache kuddir, torui tachea tonddar hanso 
khelltalo.  Razanchea razan amchea passot khaltikai bhogli ani tech 
khaltikaien ami jieonk ani tacho pattlav korunk To amchea laguim vinoti 
korta.  Tor cholat bhava-bhoinnanim aichea dissa sogott ami umedin bhoron 
ballka Jezuk nomoskar korum-iea ani tache porim nitoll ani nirmoll zavunk 
bhasavnni diun hea sokoilem gaionn gavum-iea:

Ontroll pettlam noketranim
Uzvadd atvech torecho
Boddve gaitat gaionnam
Sorv thavn sorgincho
Sondes dita sogott munxeak
Sondes khuxealkaiecho
Moronn nhoi amcho xevott
Punn oromb sasnnanchea jivitacho
Glo-oh-oh-oh-oh, Oh-oh-oh-oh-oh, Oh-oh-oh-oh-oh-ria
In excelcis Deo
Glo-oh-oh-oh-oh, Oh-oh-oh-oh-oh, Oh-oh-oh-oh-oh-ria
In excelcis Deo
Anvddetam sogott Kristi kuttombak khuxealborit Natalanchi porob!
Moi-mogan,
Domnic Fernandes
Anjuna/Dhahran, KSA
_________________________________________________________________
Express yourself instantly with MSN Messenger! Download today it's FREE! 
http://messenger.msn.click-url.com/go/onm00200471ave/direct/01/