DHIRIEO (Bullfights) Ladru: Avois! Ar're Pedru, tum khuim ghelolo? Pedru: Khuim ghelolo? Hanv gerrak ghelolom! Ladru: Gerrak? Mhunnchem kitem re? Pedru: Gerrak mhunnchem zuzak ghelolom. Ladru: Konnam lagim zuz manddunk ghelolo tor tum? Pedru: Ar're, hanv zuzonk vochonk naslom, punn mhozo paddo ani reddo zuzonk ghelelet. Ladru: Ham, tum sangonk sodtai mista tum dhiriank ghelolo! Pedru: Hoi; hanv dhiriank ghelolom. Ladru: Khuim re? Pedru: Bannale. Ladru: Bannale? Saxttint dhirio bond keleat mur're – dhirio lailear pulis dhortat, hi khobor nam mista tuka? Pedru: Saxttint dhirio bond keleat? Oxem mhunnon tuka konnem sanglam? Amcho Francisco Bab Sardinha pasun dhirio kaidexi kortolo oxem porjek sangon nivllun eila ani tum Saxttint dhirio bond zaleot mhunntta? Ar're ‘paisa feko aur tamasha dekho’. Sunneanchea fuddean ek haddacho kuddko uddoi ani titlean tem sunnem dhadoxi; uprant tuka zai toxem kor. Ladru: Tor tum sangonk sodtai ki pulisank poixe dhilear vo khavoilear dhirio korunk zata? Pedru: Tum boro kapaz mur're! ‘Samazne valeko ishara kafi’! Ladru: Toxem zalear, dhirio khuim ani kednam zatat tor? Pedru: Khuim zatat? Sogle Saxttint zatat – Bannale zatat; Coleam zatat; Bettpatte zatat, adi. Kednam zatat? Sokallim zizunttear zatat, dha horar zatat; bara horar zatat ani toxeoch tinsancheo. Gimant soglleo mellon disak panch pasun dhirio zatat. Ladru: Rav re. Hea dhiriank lok hajir asta? Pedru: Hajir asta! Ar're ubo ravonk suat asonam. Ladru: Punn dhirio asat mhunn lokak koxem gomta re? Pedru: Koxem gomta - hem poi, hem asa amche kollovnechem hathiar – Mobile! Ek mobile call mar ani tujea ixttak sang; to magir aplea ixttak sangta ani to tachea ixttak ani he porim thu mhuntta mhunnosor dhiriechi kollovnni sogott lamb-rund Saxttint porgott zata ani lok aplo kam'-dondo soddun gerr pollovnk ieta. Ladru: Tor tum sangonk sodta ki dhirio pollovn lok aplem pott bhortat, oxem nhoi? Pedru: Albot – karann lok apost martat. Ladru: Kitlem pasun apost martat? Pedru: Aiz-kal lok xemboreanim apost marinant bogor ozaranim ani lakanim. Ladru: Tuvem kednam tori apost marlam re? Pedru: Marlam tor; hanv antrea-poirean apost jiktanch. Ladru: Tum kitle pavtti jiktai tor? Pedru: Three-to-one (3-1)! Ladru: Tuka paddeancheo vo reddeancheo dhirieo boreo lagtat? Pedru: Mhaka dogaimcheoi dhirio boreo lagtat, karann dogaimcherui poixe zoddunk zata. Hanvenui atam ek boroso gerracho reddo vinkto ghevnk chintla. Ladru: Ekdom bori aidiar tuji. Mhakai ek reddo nam zalear paddo mevta zalear polloi. Dogui dhirieo lavpachem business korumiea ani soglleank pattim kaddumiea! Pedru: Hoi tor! Chol faleam ami Belganv vochomiea! Pedru: Rab re, tumchea Bardezant dhirio-bhirio kaim zainant kitem? Ladru: Adim zataleot re; atam zainant; atam amkam tosle dakttule vis (vice) nant. Pedru: Hanvem kednanch aikonk nam Bardezan dhirieo zatat oxem. Ladru: Tumi mur’re sodanch makdda baxen ‘mojench tambddem’ mhunnttat! Pedru: Dhirieo Khuimsor zataleot tor? Ladru: Amchea Honnunant (Anjunant) dhirieo Tembier zataleot ani toxeoch igorje lagim xetant. Tech porim dhirieo zataleot Badean (Badem), Asgoam (Assagao), Siole (Siolim) Porra (Parra), Oddfoddeam (Arpora), Congotte (Calangute), Candoe (Candolim), adi. Eka tempar ami sogottt xet-kamti vortovn soglleam lagim gorvam aslint. Zanche lagim gorvam aslint tanche lagim ek tori dhiriancho paddo/reddo astaloch. Adlea temparui dhiriancher apost martalet punn nhoi atanche porim ozaranim ani lakanim. Ladru: Azun pasun tuvem zoddlaim tem tuka favlem. Hea fuddem anik dhirieo ascheo nam munnchem ascheonam. Pedru: Dhirieo ascheonant! Ani kiteak? Ladru: Tum dispottem ‘Herald’ khobranchem kagot ba vachinam kitem? Pedru: Dispottem kagot vachunk mhaka vell nam. Tuvem kitem vachlam zalear mhaka sang. Ladru: Tor aik. Gelea Budvaradis pulisanim dhirieo laitelea dog zannank Bannale Montir (Benaulim Monte) sampddailet. Zonn eklo pondra ozar rupianchi zamin dhivn suttlo. Sampddaiteleanchi beporva korun dusrea disa (Berestaradis) sokallim portun teach dogaim zannanim Bettpatte (Betalbatim) dhirieo laileot ani hea porim adikareancho kirod vaddoilo. Uprant, Agostache poiler Bombay High Court-an Moddgovchea Director of Panchayats ani Deputy Superintendent of Police hankam kollovnni dhaddli ani tanchea lagim vinonti kelam Ostomti Goyant (South Goa) dhirieo lavpachem bond korunk. Pedru: Ar’re amcho Francisco Bab Sardinha astannam ami koxech bhienant. To koslo tori upai kaddttolo ani dhirieo chalu dovortolo. Mhaka zalear tachi khatri asa. Ladru: Polloviea Francisco Bab Sardinha tumkam lagon kitlo pasun zuzta, vo ‘kam’ zalem voiz melo’ oxem chintun hath kovllun bosta zalear! Moi-mogan, Domnic Fernandes Gaumvaddy, Anjuna _________________________________________________________________ Searching for the best deals on travel? Visit MSN Travel. http://msn.coxandkings.co.in/cnk/cnk.do