|
- Fausto V. Da Costa Goeant Tiatrancho Pavs… Goeant astana Maiachea mhoineant Goeant Tiatr, khell-tiatr vo Non-Stop Show koxe kat choltat te vixim zannun gheunk iotn kelo. Khub kallan (sumar 15 vorsamni) Goenchea Gomant Vidya Niketan vosreant boson tiatr ani non-stop show pollele. Hea vosreant khub kitem bodol’lam. Ani tantun vixex mhollear ho vosro “air-conditioned” kela. Tori tantli AC Mumbointlea vosreamni thonddai dita toxi diunk xokona. Punn ek mhotvachi vost bodlonk nam; ti mhollear vosreant khavop ani pivop, ani tiatr chalu astana vosreant gozali korop. Hem amam Goenkaranchem ‘trade-mark’ dista. Karonn Mumboint sud’dam vosreamni khavpa ani pivpak mona asa, torui tea vosreamni Konknni tiatr zatat ten’na prekxok vosreant khavpacheo vostu gheun ietat ani khatat; itlem ki ushers’-ank hem khavop pivop bond korpak vhodd ratti kaddcheo poddttat. Hem hangach soddun mukhel vixoiacher ietam. Vosreant bhitor sorchea poilim vosreachea compound-achea darvonttea lagim ubo ravon pollelear dha-ek tiatranche posters nodrek zhollkotat. Mumboint reilgaddiechea plettform-ancher hindi cholchitranche posters umkollttat toxe hanga Konknni tiatranche posters umkollttat. Satolleant komi-komich dha-ek tori tiatr vo khell-tiatr kivam Non-stop show hanga zatatuch. Adlea kallar fokt Son’vara ani Aitarak tiatr zatale toxem nam. Kamachea disamni sud’dam tiatr zatat ani vosreant 60 tok’ke voir prekxok distat. Hanv pollounk gel’lea tiatrank tori hanvem 60 tok’ke voir lok pollela. He babtin pollelear Konknni tiatr Goeant ek udeog koso cholta mhunn sangpak kainch horkot nam. Ani he toren Konknni tiatr chol’le zalear Konknni tiatrank kivam khell-tiatrank boro fuddar asa, hatunt kosloch dubhav nam. Hem onnbhovun kuddint xer bhor rogot choddtta. Hem Konknni bhaxeche ani sonkrutaieche progotik faideachem. Dusrem ek tokhnnai korpachem pavl mhollear tiatr just vellar suru zata; adle porim ordhea vora uprant nhoi. Vellar suru zaun vellar sompta. Hi obhinondon korpachi gozal. Matr hem fokt vosreantuch ghoddtta. Ugtea moidanacher zatat te show apleak zai ten’na suru zaun zai ten’na somptat, ani intervalui apleak zai tedo ditat, lokachea vellak koslench mhotv naslolea porim. Mahiti mell’llea te pormonnem vosreamni show tharail’lea vellar kobar zaina zalear dondd bhorcho lagta khoim. Ami Bharoti “adot se mojbur”, amkam dondd lagu korop gorjechem. Punn ek lhan vichear mhollear zori vosreamni show vellar suru korum ieta zalear ugtea moidanarui show vellar suru korum ieta. Adlo ekloch digdorspi J. P. Souzalin vellar tiatr suru korpi direktor mhunn tiatr itihasant riglolo asa. Konknni palkar tokhnnai korpachi anik ek goxtt mhollear novim-novim kolakaram ani kantoristam, odhik korun lhan-san umedichim bhurgim. Aichea tiatristanchim bhurgim tonddant mamer ghevn legit Konknni palkar ietat ti obhinondon korpachi gozal. Adlea kallar tinch mukhamollam ani tech ‘talent’ distale. 50 vorsam voir aslele legit naieokachi mhonnje ‘hero’chi bhumika kortale. Punn aiz puskoll novim-tal’l (refreshing) mukhamollam ani protibhavont novoditam (talented newcomers) amkam pollovpak mellttat. (Mumboint mat mellonant). Odhik korun xabaski favo tea digdorspeank je lhan bhurgeank machier ievpachi vatt dakhoitat ani bori talim’ ditat. Udharonnak Young Chico-n dakhounk nam tem tacho put Jr. Chico aiz palkar korun dakhoita. He torechi sort (competition) palkar chol’li zalear Konknni palk jerul fuddem ttanch martolo ani tacho dorzo vaddttolo, hatunt bilkul dubhav nam. Ani atam hanvem pollel’lea kaim tiatrancher kivam non-stop show-ancher ek dhanvti nodor bhonvddaitam: Dhir, Adar, Bhorvonso Anthony Sylvestre hannem boroun digdorxit kel’lea hea tiatrachi kanni zori eka hindi cholchitrak sor zata tori ti vhodd hikmotin machier manddlea ani dor ek kolakar apli bhumika nizachi korun tiatr ukllun dovorta. Meena ani Joe Rose avoi-bapaiche bhumikent khub porzollttat zalear Aliston putachi bhumika besbori korta. Vhodd xabaski favo tea lhan cheddvak jem ek utor ucharinastana aple khol nizachea obhinoiean pollennaranchim kallzam jikhun gheta. Premanand Sangodkar ani Bushan mukhel patrank aplo boro palov ditat. Tiatrantlo vinod sadharonn asa ani Comedian Selvy, C. D’Silva ani mukhel vinodi nott aplim sovongam borim kortat ani lokak pott futtosor hansoitat. Eka tiatracho mhotvacho bhag mhollear side-show. Solo, duet, duo, trio oslea jin’savar kantaramni vinnlolo hea tiatracho side-show boro asa ani gitam moralachim asat. Rocky Dias ani sangateamni borim-borim kantaram aikunk dilim. Kherit ulekh korunk favo Joe Rose-achea ‘poder’ kantaracho. Hem kantar aikotana adlea kirtivont tiatranchea disanchi iad zali ani ten’nachem chitr dolleam somor ubem zalem. Bhurgea trio-n gailele donui trio bes bore asle. GORV Roseferns hacho Non-stop show GORV borea moralache kanniecher ghoddun haddla ani vinchun kaddlelea sonvadamni ani mon-bhulgaitea gitamni vinnla. He kannientlean borovpi sondex diunk sodta to khub mhotvacho asa. Sotacho rosto tanktolo jivitant ken’nach sanddona, ho borovpeacho nirop kannientlean ani sonvadantlean pollennarank spoxtponnim melltta, xivai modim-modim anikui kaim mhotvachea totvancher lokx voddta. Peter de Benaulim chikanner bhattkarache bhumikent zalear Roshan avoiche bhumikent, Ulhas Tari ani Victor putanche bhumikent ani khasa Roseferns bapaiche bhumikent borim porzollttat. Peter de Benaulim aplo sobhav-gunn boro surngaita. Ulhas Tari ek ovghodd obhinoi korun aplea rogtantli nizachi kola dakhoita. Vinodant comedian Sally ani comedian Seby hancho vinod boro asa ani pollovpeank borem monoronjon dita. Punn mukhel patrank vinodant misol keleat te vorvim matr mukhi obhinoiachem gombhirponn vota. MOG - FULAM VO KANTTE? Hea Non-Stop tiatracho vimorso gele khepek Gulab-acher dila. Hea tiatrantlem tokhnnai korpache bhag mhollear kanni, gitam ani Rosy Alvares ani Mario Menezes hanchem ektting. Tech porim comedian Augustine ani comedian Ambe hancho vinod. ARGAM TUKA DHONIA Tony Dias hannem borovn digdorxit kel’lea hea tiatrant lhan bhurgim akhkhea side-show-achim kantaram gaitat zalear mhalgodde (senior) kolakar partint bhag ghetat. Tiatrachi kanni sumarachi asa ani Jessie ani Sylvester Vaz aplea nizachea obhinoian ho tiatr ukllun dhortat. Menino Mario ani Mario de Vasco hevui apli bhumika favo te porim kortat. Philip Almeida ghoviacho obhinoi korta to tokhnnai korpa sarko asa. Machi nettovop nazuk asa. Vinod sumaracho asa, punn side-show adlea tiatranchea side-show-am porim ekdom’ mozbut asa, vixex korun hea side-show-antlim chovdai kantaram bhurgim kolakaram gaitat dekun. Ek-don gitam soddlim zalear her gitam vingodd-vingodd vixoiancher ani moralachim aslim. Jr. Chico hannem gailelea donui gitank valor favo. Bhurgeancho trio pollennaranchim kallzam jikhun gheta. Ekach utran him tornnim bhurgim amchea tiatrancho fuddar, ani hich umed tannim fuddarakui dakhoili zalear amchea tiatrank khonddit boro fuddar asa. Sonvsar Sudhorlo Tiatr prokar tokli voir kaddunk lagla mhonn anik ek puravo amkam mell’lo jen’na hanv he khepek Goeam ailom ten’na Padmashree M. Boyer hacho 1976 vorsa lovkik zalo tiatr SONVSAR SUDHORLO novean atam novea kolakaram ghalun dakhoitat to pollelo. Anil Kumar hannem aiojit kel’lea hea tiatran amkam 25 vorsam fattim vele ani tea kallachea tiatristanchem ani tiatranchem chitr dolleam somor dovorlem. Ho tiatr aichea kallarui mhotvacho mhonnun lok upott ghalun ho tiatr polleunk dhanvta tachea velean thavem zata. Tech borobor Goencho tiatr prokar mornnache tonnir nhoi bogor apleak odhik boro fuddar sthaponn korpache bhonvdder asa mhonn anik ek jivi govai melltta. Tea kallailea tiatristank monant dovrun boroil’lo ho tiatr aichea tiatristamnim odhik nhoi zalear titloch tori porzollit korpak pavlak marlelim onnbhovan jivak khos bhogta. Kaim kolakaramnim adlea kolakaram poros odhik bore obhinoi kele mhonn sanglear hanv khoincheanuch otitai korta so mhaka disonam. Ani oxem mhunnonk dista ki favo te kolakar nant mhunnon Boyerbaban aplo novo tiatr palkar haddinastnam dovorla to-ui veginch hea kolakaranche svadin korcho mhonn. Konknni palk fulon vochom! Hea tiatrachi kanni amchea adlea chintop naslelea kaideancher ani vagnnukecher ek koddok chabuk marta ani sudhorlolea sonvsarant ami monis koxe jieunk apovnnem korta hem sogott zannant karann choddan chodd lokammnim ho tiatr adim pollela ani toch lok atam novean to polleta. Hea tiatrantlem tokhnnai korpa sarkhem mhonnlear sogott kolakaranchem nizache obhinoi. Dor ek kolakar ap-aple bhumikent porzolltat. Sabina ani Anil Kumar cheddeanche avoi-bapaiche bhumikent pozolltat zalear Mathew Araujo, Anthony San ani Aniceto tanchea cheddeanche bhumikent bore sobhtat. Roshan ani Peter gorib cheddvache ani bapaiche bhumikent ‘fine performance’ ditat. Joe Rose zababdari bhavache ani Fatima ani Maria tachea bhoinnanchea obhinoiant borim porzolltat. Punn hea tiatracho ‘star performer’ mhollear Ben Evangelisto zo sorgest Jacint Vazachi bhumika 99 tok’ke tachech porim korta. Eka-eka vellar machier asa to Jacint Vaz nhoi, punn Ben mhunnon sotmandpak kotthin lagta. Hanv pott futtosor hanslam to Benak kai Jacintak oso prosn mhaka vosreantlo bhair sortana upzolo. Ek matr, mhojea bejeant sodanch rombon aslolo somzut aiz sarko asa mhonn mhaka odmas mell’llo. Khell-tiatramnim ektting zaum komeddi bobatt marun ani kaim pavtti be-moriadik joks ghalun kortat toxem hanga dislem na, zori tech khell-tiatrache kolakar hea tiatrant bhag ghetat. Hem sot khasa Benan ani tachea vangdda herui kolakaramnim sud’dam onnbhovlam astolench. Tiatracho side-show sadharonn asa, ani vingodd-vingodd nog zoxe solo duet, duo, trio chouko ghalpache proitn keleat. Khub kallan adlo tiatr prokar amkam bhogunk dil’lea bodol Anil Kumar ani tachea sangataeanchem obhinondon. BHOGSONNEM Samuel Carvalho hannem boroun digdorxit kel’lo ‘Ladies Show’ BOGSONNEM zantun fokot ostoreo bhag ghetat to pollovpak soeg gavlo. Tiatr mollar tiatruch nhoi bogor atam ‘Ladies Show’ legit palkar ailo hi tiatr-mogiank ek anondachi gozal. BHOGSONNEM tiatrachi kanni eka borea moralachea vixoiacher vinnlea ani tantlean pollovpeank mhotvacho nirop dinvcho proitn kela. Thoddkeant sangtolo zalear Kevin ho mog-kornnar aple poilea mogiak avoiponnachea bhesar soddtta ani uprant Melba lagim logn zata. Melbachem chukin pavl vankddem poddtta ani tea avoiponnachea bhesar pavta. Punn sot tem Melba Kevinak visvasan sangta ani bhogsonnem magta, punn to taka bhogsunk toiar asona ani taka ghorantlem bhair ghalta. Uprant poilem mogi Roma, Kevinak tachem bhurgem diunk ieta ten’na kitem ghoddtta ani xevott kitem zata tem tiatrak vochon khas pollonvchem. Tiatracho xevott bore ikmotin dakhoila. Hea tiatrantlem dor ek patr vhodd huxarkaien apli bhumika korta. Aplon tor ‘hero’-chea obhinoiant chokmokta zalear Felcy mukhel nottiche bhumikent borem porzolltta. Fatima, Kevinachea bapaiche bhumikent ani Meena avoiche bhumikent khub nizachem ektting kortat. Roma, Betty Ferns ani Betty Naz tankam boro palov ditat. Vinodi bhumikent Janet, Anju ani Clara pollennarank boro manoranjan ditat, ani pott futtosor hansoitat odhik korun Janet aplea svogant ani sonvad ucharpant bhov ‘natural’ asa. Novench palkar ail’lem cheddum jem don-tin dakhtte ‘role’ korta tantun tem borem porzollta. Tachean palkar boro fuddar apekxum ieta. Side-show-ant don-tin kantaram soddlim zalear urlelim kantaram borea-borea vixoiacher asun ani svadik tallean tim gailelean vorto divirtiment ditat odik korun xabaski favo Roshan-Clara-Roma hannim gailelea Konknni palkachea ‘Trio King’ hea tiktteachea svongant gailelea trio-k, Felcy zannem M. Boyer-achem svong korun gailelea gitak ani Janet hannem William de Curtorim hachem svong korun gailelea poilitical gitak. Meena-chem git, Roshan-chem ‘Dhoko’ Betty Ferns ani Roshan-achem duet ‘Avoi’ Felcy-Aplon-acho duo ‘Roam Tony’, Roma-cho solo ani suvatek novea cheddvan gailelim ‘Ostori’ him gitam side-show-achi svad vaddoitat. Anikui Tiatr Ani Khell-tiatr... Xivai Konknni palkar anikui tiatr ani non-stop show choltale ani kaim azunui choltat: A. M. Pacheco hannem sogest Bab Peter-achea kuttumba sangatak palkar haddlolo TUKACH RAVTALI zantun Bai Ophelia hinnem khub kallan novean machier paim dovorlo ani apleant azunui adli kola asa mhunn spoxtt kelem. Hea tiatrant Peter-achi dhuv Babli ani zanvoi Sameer hannim bhag ghetla. Bablin somplelea aplea bapaicher hea tiatrant ek kherit git gailem. Tech porim Goencheam xaramnim chol’lo John D’Silva hacho tiatr VANN zantun adle lovkik tiatrist Prem Kumar ani Remmie Colaso hannim bhag ghetlo. Double Century King Menino de Bandar dakhoita JIVIT OSTORECHEM zo Maiache 2rer suru korun sumar 23 proiog keleat. William de Curtorim hea show-ant don rajkaronnacher adharlolim (political) gitam gaita khoim. Junache 19ver thavn suru zala Mariano Fernandes hacho tiatr SOGLE BHAGIVONT zaka khand marun asat ostad partist ani kantorist. Prince Jacob hannem ‘Padri’ hea Konknni cholchitracho vavr sompoilea uprant atam Junache 26ver thavn suru kela aplo novo Tiatr RODDO NAKA zatunt 12 kantarancho aspav asa jim gaitat F X Pereira, Bonny Alvim ani Connie M. Ho tiatr Julai mhoineant Mumbai ani Agost mhoineant Kuwait, London, Canada, France ani Purtugalak zanvcho asa. Anikui tiatr ani non-stop show choltat te Menino Mario hacho JIVITACHO SANGATI, Junior Shakespeare Maxcy Pereira hacho TUM FATTIM ASA, zatunt Dona Maria trompett vazoun songitak sad dita. Domnic Carvalho hacho TEM EK SOPON. Julai mhoineant bhair sorche asat: Goenchea palkacho Nana Patekar Donald dakhovpacho asa aplo tiatr PALLAM, Comedian Sally ani Melody Prince Lawry sangatan dakhoitat tiatr HEA GHORACHER NODOR MAR. Oso tiatrancho pavs poddot asa... Tiatrancho pavs Goeant vont’toch asa…
| |
|
Copyright 2004 Gulab. All Rights Reserved
|
This first of its kind Gulf-Goans e-newsletter is dedicated to Goans around the Globe. http://www.goa-world.com/ Team, moderated by Almeida Gaspar since 1994, and presented by Ulysses Menezes, owner of http://www.goa-world.com website. Any and all postings from Goans are welcomed - be it a Goan business enterprise, a Goan event/programme of cultural heritage, or of a personal nature. Thanks for the support to Goa and Goans.
Support the less fortunate: http://www.goa-world.com/goa/smtmem/
Upcoming Shows in Kuwait:
Navelim Youth Centre-Kuwait will hold their traditional grand gala 'NYC Nite' on 1st September 2005 at Hotel Crowne Plaza starting 8.00 pm.
Comedian Philip's "TUM VHOIR AUM SOKOL" on 16th Sept. 2005. Remember it's P.V. Production's second musical show with talented guest artistes/singers/ musicians from Goa and London and a JUMBO cast from Kuwait.
__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com
http://www.goa-world.com
http://www.live365.com/stations/61664 Live Konkani Music
http://www.mahableshwar.com/
Addresses:
Post message: [email protected]
Subscribe: [EMAIL PROTECTED]
Unsubscribe: [EMAIL PROTECTED]
List owner: [EMAIL PROTECTED]
URL to this page:
http://www.yahoogroups.com/group/gulf-goans
| Gulf coast real estate | Gulf shore al real estate | Gulf shores condo |
| Gulf shores real estate | Asian manufacturer | Gulf coast condo |
YAHOO! GROUPS LINKS
- Visit your group "gulf-goans" on the web.
- To unsubscribe from this group, send an email to:
[EMAIL PROTECTED]
- Your use of Yahoo! Groups is subject to the Yahoo! Terms of Service.
