Mejuah-juah per milis, Dua berita bas wari sendah, pemena "Petani Karo buang kentang dan tomat" iberitakan permen kami Daust i milis, encage berita detik.com: "Supporter Persija saling Timpuk" . Jelas melas labo min lit hubungenna dua berita e sekotanken duana kerna sada suki kegeluhen rayat i negaranta.
Saja teringet aku sada berita Sora Sirulo piga2 waktu silepus kerna guro-guro tomat, guro-guro sibenter-benteren tomat i Negara Spanyol. Er truk-truk tomat perjuma ibuang-buang, ibenter-benterken, sibenteren dingen tawa-tawa, jadi dedahen si meriah. Enterem anak kuta dauh si ikut atan bas acara e. (Ja kam nda Pak Dosen Advent Tambun, ma payo nge?) Adi bas Amerika enda sanga musim jambe kenca lit ka lomba mariam jambe. Jambe jadi pelor mariam, erlomba ise sindauhna tembakenna. Acara sibenter-benteren tomat ras acara lomba mariam jambe tentuna jandi penggulangen tomat ras jambe. Rempet-rempet erbicara-bicara ukur nibaba, bicara ibahan acara saling timpuk tomat i Brastagi tah ijapa pe gia i Tanah Karo, acarana igelarken alu acara "Guro-Guro Tomat" uga nge ndia nina ukurku. Tomat man adum gulen la jumpa erga, tomat man perbenter bas paksa guro-gurona tentu banci jadi lain ergana. Guna enjadiken acara guro-guro sibage rupana tentu la banci jadi bage-bage saja, perlu lit sentuhen management terpadu terikut seni, termasuk seni promosi, ras bagepe kinisertaan group2 perjuma. Alu pengaturen si merandal tek aku maka acara e jadi sada acara mehuli man penggulangen tomat ras sekaligus jadi product parawisata simbaru. Bas ngukuri sibagenda rupana, rolih-olih ersimulih man sinatang layar-layar, aturkendu min ninta ka me man bana. De enggo kenca ngerana kerna sie (sinatang layar-layar) enggo keri belas-belas, lanai bo terarapken. Kita rayat sirulo enda nari nge perlu si pe lit-lit ukurta. Eah ja kam nda anak perana singuda-nguda, aturkendu guro-guro tomatta, de gundari enggo terlat, sab tomat nda enggo ibenterken, tahun sireh lah gia yah. Anak perana singuda-nguda nari nge pengada-ngada kami orang tua. Terbayang aku bas acarana pepagi, ibenaken alu artis-artis top ibukota si sengaja reh ku Brastagi ngikuti guro-guro, suari guro-guro tomat, berngina guro-guro aron nasional/internasional. Bas jambur silima merga, istri-istri pejabat jadi juri bas acara lomba masak "Radumken Kentang". Io'oh meriah naring pagi, perjuma tomat ras kentang ergiah-giah kujuma, product parawisata ertambah-tambah, kalak si gawah-gawah kukutanta reh teremna. De enggo kenca pagi seh kel riahna, sada nari aku terbayang, ergiah-giah ka me pagi sinatang layar-layar erpidato-pidato bas kerina acara e nateku. Pidato ngogeken statistic kesuksesanna bas ngaturken parawisata daerah. Io'oh, lo dalih, salin katangku nda sinatang layar-layar lanai bo terarapken, la ia korupsi saja pe enggo me bias. Mejuah-juah salam guro-guro tomat
