Bi Oeti damang? Hehehe Cing Bi, sugan apal kana urusan bahan pangawet kadaharan, utamana kurupuk. Uing boga kasus jiga kieu:
Tilu poe kaliwat, aya nu ngabahanan kurupuk, mangrupa cemilan kadaharan barudak. Harita teh berewek we bungkusna dibuka. Diasaan saeutik, lumayan gurih, rasa hurang. Sanggeus diasaan, digolerkeun we jeung bungkusna dina meja. Pleng we kapopohokeun. Ari tadi tas Jumaahan, alak-ilik kana meja, geuning bungkusan kurupuk teh masih keneh aya. Eusina ge loba keneh malah. Panasaran kojengkang dicokot, am diasaan, geuning rasana teu robah, oge masih keneh beleger, taya riuk-riuk melempem, jiga ilaharna kurupuk. Uing jadi ngahuleng, naha kurupuk disimpen dina meja, bari jeung ngaboleklak bungkusna geus dibuka, teu riuk-riuk melempem. Pan ari biasana mah, kurupuk naon wae, mun kangin angin sok gancang melempem. Boa-boa yeuh, aya nanaonna, ceuk pikir uing teh. Cing Bi pangneguhkeun, kunaon eta kurupuk teu melempem? Naha aya bahan pangawet dagareun nu sakti jiga kitu? Mun tea mah aya, naon tah efekna kana kasehatan. -mh-
