PBKS - Selebriti Balik Kampung? Ku Roni Suarsa Teu karasa ti poe ninggang minggu jeung bulan, anjong sataun, bener ceuk si pare’, kuring sabalad-balad teu pati manggih pasualan nu pabeulit, eta pedah kuring boga ageman nu sarua jeung pribumi? Wallahu a’lamu, nu jelas mah kaprofesionalan dina urusan gawe oge ngarupakeun bagean tina lumangsungna lila cicing di ieu lemah, oge urusan ageman, ieu rada nyambung oge. ****
Munggaran cuti dina nincak sataun cicing di Saudi, hate meni asa bungangang kacida, bakal panggih jeung indung bapa, kulawarga jeung nu sejenna.**** ** ** Mangsa munggaran kuring nincak deui lemah cai, teu sirikna siga selebritis nu keur meunang pancen tohaga atawa keur digosipkeun ku sababaraha media, kuring jadi sasaran pananyaan tatangga, batur jeung dulur, kumaha kahirupan salama sataun dilemah arab teh. Atuh kuring kudu rada sabar, geuning selebritis oge sok sabar, naha ari kuring teu bisa sabar kitu? Ma’lum ari hirup dilembur mah siga kitu mereun dimana-mana oge’.**** Nya teu saeutik (lolobana ketah) nu tungtungna sok punta penta, nya menta oleh-oleh has arab tea, untungna kuring rada asak ijiran, samemeh mulang ti arab teh pakipuk beberengkes babawaan oleh-oleh khas arab boh nu ilahar kayaning korma jeung kakacangan, oge nu rada-rada aneh jeung arang langka.** ** Hiji mangsa aya tatangga nganjang ka imah, nya ku kuring disuguhan kakaren arab, palebah disuguhan buah zaitun, manehna semu aneh jeung atoh sabab kakarek harita ningali bungkeleukna buah zaitun teh.**** ** ** “Kang, tah ieu buah zaitun teh, nu aya dina ayat alQur’an tea ning”, ceuk kuring muka obrolan.**** “Owh, ieu geuning bungkeleuk buah zaitun teh, geuning wangunna siga anggur nya? Atawa tegesna mah siga buah jamblang mun diurang mah, hideung lonjong”, ceuk manehna bangun nu atoh.**** “Enya kang, sok geura cobaan, sugan we saanggeus ngagayem zaitun mah langsung bisa maca qur’an” walon kuring ngabanyol.**** ** ** Teu antaparah deui, belewek weh manehna ngahuapkeun zaitun dua siki laju digayem, ngan wasa dua-tilu gayeman, tatangga kuring teu kuat ngampeuh rasa eta buah. Deuk diutahkeun mereun era da harepeun pribumi, kuring surti, bari laju ngabarakatak seuri ngeunah pisan, da heeuh geuning apan rasa buah zaitun mah peheur, teu puguh babandinganana mun jeung bubuahan di urang, mereun asa buah cangkudu atawa berenuk tea ha…ha…**** Teu kagok sial eta tatangga, sanggeus “katipo” ku rasa buah zaitun, matana masih keneh panasaran kanu oleh-oleh arab, crek nyokot kacang nu aya cangkangna, belewek dihuapkeun... ** Ana gerewek teh manehna ngajerit bari auh auhan nyepeng baham, kuring rada kaget sabab teu apal kunaon pangna manehna ngajerit, sihoreng teh manehna ngegel cangkang kacang nu teuas alahbatan batu nu akibatna salah sahiji huntuna semplak, beu karunya teuing tatangga kuring, katurug katutuh sasatna mah, deuk nyemah neang nu ngeunah, ngadong ngalaman nu aneh-aneh..
