Nya Lasmini nuju ka nu dituduhkeun; sanggeus sawatara lilana, katempo ti kajauhan aya imah, nenggang, ah eta meureun tukang kareta teh; nya manehna ka dinya. Barang manehna ngadatangan ka dinya; manehna ditarima ku nu boga imah kalawan daria pisan. Lasmini rada kaget oge lantaran ieu tukang kareta teh, masih ngora pisan, nya saluhureun manehna meueusan. Rupana gagah, tur kacirina sigep pisan. Manehna nyuguhan Lasmini terus nanyakeun maksud kadatangan Lasmini. Lasmini nerangkeun rek nuju ka lembur hareup samemeh ka Cirebon; sugan aya sado atawa dokar, nu bisa mawa manehna. Memeh ngajawab, manehna ngenalkeun yen ngaranna Ki Rangga ; lain urang dinya pituin tapi asalna ti Madiun; di dieu geus aya tilu taunna; ari nu jadi usaha utamana tatanen, melak cabe jsjb, tapi diluar eta, manehna boga kareta jeung kudana nu alus; manehna mun aya nu nyewa sok narik; malah ka Cirebon ge kungsi cenah. Nya Lasmini ge nerangkeun manehna anak Nini Anti; ti lembur singkur, ayeuna rek ka Cirebon neangan barayana. Wah geuning wani pisan nyorangan? Nalek eta ki Rangga. Da kumaha atuh kuring teh teu boga dulur deui; ibu geus rek pikun inget wae ka dulurna; nya saha deui nu bela ari lain kuring mah. Ki Rangga ngarti, jeung narima katerangan Lasmini. Tapi terus nanyakeun soal bayaran lantaran mahal ka Cirebon mah, cenah moal kurang ti 10 Gulden. HANCA
