Fikmin #Lebaran Teu Kérok Deui#
Buka puasa karék lekasan. Hanaang sirna kaséréd cientéh haneut. Guk gék! Saréréa mendeko hareupeun TV. "Hasil sidang isbat 18 Agustus 2012 mutuskeun, yén numutkeun hasil hisab ogé rukyah saréréa sapuk, 1 Syawal 1433H ninggang dina poé Ahad, 19 Agustus 2012." Kitu numutkeun biantara Bapa Ageung nu disiarkeun dina TV. "Horééé! Siiik, Asyiik!" nu mendeko sarurak panuju. Dulur cikal nu Muhamaddiyah nyéréngéh. Lanceuk kadua nu Nahdiyin kéom. Kapi adi nu Persis ngahéhéh. Mitoha jigrah, ngagigiwing panci. Duméh laksana lebaran bareng sakulawarga. Nu rupa-rupa pamadeganana. "Bréng-bréng-bréng, bréng-bréng-bréng!" Sora panci brang-bréng-brong, ditakolan gagang sapu. "Peuncit hayamna dak! Kulub kupatna! Teruskeun popolahna!" Mitoha babagi tugas. "Alhamdulillah lebaran teu kerok deui!" Pokna mungkas carita.
