Ku sabab kitu, beuki naek darajat Si Setan Alas Kobar di dunya kapendekaran. Tapi parandene kitu, si Setan Alas kobar teu tengtrem hatena, lantaran masih aya nu nandingan ka na kajagoan jeung kajaduganana, nya eta pendekar Mawar Hideung. Samemeh manehna bisa ngelehkeun Mawar Hideung, keukeuh we kajaduganana masih can mantep; masih aya cucuk na tikoro. Nya di na waktu harita si Setan Alas Kobar, teu loba teuing pipilueun soal megatan para sudagar, atawa tarung jeung papada pendekar; lantaran manehna ayeuna mah leuwih loba nyepina ti batan muncul nembongkeun diri; manehna keur ngalatih elmu2 kanuragan ti guruna, bari jeung ditambahan ku rupa2 parobahan meunang nyiptakeun manehna sorangan. Lantaran Si Setan Alas Kobar teh kaasup jelema Genius oge di na hal kanuragan mah. Sanggeus kurang leuwih 8 taunan mesuh raga, manehna ngarasa geus cunduk waktuna pikeun tarung patutunggalan ngalawan Mawar Hideung; da ari ngendelkeun balad mah, bakal kasurak ku kalangan Pendekar; di na meunangna ge. Komo bari jeung ngorbankeun ratusan jiwa anak buahna. Pasti moal hade pikeun dirina. Lantaran alesan ieu; manehna omat2an pisan ka sakabeh anak buahna ulah aya nu pipilueun lamun manehna engke adu hareupan jeung si Mawar Hideung. Malah make aya ancaman, mun aya nu nyoba2 pipilueun , sarua jeung nangtang manehna. Jadi ceuk si Setan Alas Kobar; samemeh manehna merenan si Mawar Hideung, bakal ngaheulakeun merenan nu nyoba2 pipilueun !HANCA
