Assalamu'alaikum Wr.Wb.
Syahril Bakri sarato Sidang RN.
Sabalun rundiangan kadisabuk, kato sapatah kadisampaikan, elok dicari tampaik tagak, rancak diparek tampaik pacik, nan isino bana, sado nan ka mabo sampaikan, iyo sakadar nan ambo tau, Disampiang itu paralu pulo, apa kaji dek baulang, pasa jalan dek batampuah
Kalalawa dipulau rimbang
anak ruso mati tadabiah
kalau gawa mintak ditimbang
kok salah ampun nan labiah
Sabalun tatangan gala nan kadikamukan, paralu kito paratikan papatah nan tuo-tuo, lain padang lain bilalang, lain lubuak lain ikanno, adat nan salingka nagari, kok kampuang salingka aua.
mungkin di nagari nan ciek jo nagari nan lain babedo-bedo adat dan istiadat nan balaku, umpamo kok di luhak Agam jo di Rantau, mungkin balain undang nan bapakai. kacontoh nan dicaliak diawak kini, kok di Luhak Agam, nan ketek diagiah namo, bilo lah gadang babari gala, baitu pulo di Pariaman, tapi saketek ado bedono.
+ Di Luhak Agam, nan gala ko ado tigo asano, :
1. gala pusako, yaitu gala nan ado dalam pasukuan nan kadibari gala. iko nan disabukkan "biriak biriak tabang kasamak, dari samak turun ka halaman, dari niniak ka mamak, dari mamak ka kamanakan.
2. gala Limbago, adolah gala nan ado alam pasukuan apak, disabuk juo gala bako.
3. gala nagari, ata gala rantau, atau gal lauk, satiok urang laki-laki buliah mamakai gala ko, contohno adolah St. Makmur, St. Djamarih dll.
+ Di Pariaman, biasono gala nan lakek adolah gala apak, gala no adolah Sidi, Sutan, Bagindo. Kalau apak no Sidi, mako anakno Sidi pulo.
Gala nan sarupo diateh cako tu adolah gala untuak marak pulai, bukan untuak Gala Datuak / Panghulu.
Dilain Nagari ado pulo nan indak babari gala, atau ado nan basabuk Katik, Malin sajo, makono dalam RN ko, kok dapek kito nan barasa dari nagari nan balain-lain ko , rancak mangamukokan adat dan istiadat nan balaku di nagari surang-surang.
Khusus untuak gala Panghulu / Datuak nan malalui babagai prosesi iyo hanyo anak kamanakan dalam pasukuan itu sajo nan buliah mamakai.
Gala, bagi laki-laki (nan mamakai gala) di Minangkabau adolah hak mutlak laki-laki, karano nan mamakai gala ko hanyolah laki-laki, indak ado nan padusi doh. Kalau harato pusako bagai iyo indak bulek ka lalki-laki doh, babagi jo nan padusi. Dek karano sarupo itu, mako dalam satiok kasampatan acok ambo mananyokan gala.
ado kajadian tahadok diri ambo (kan indak baa bacarito saketek doh ? kok rancak samo diambiak, kok buruak samo dipaelok-i,) Kajadian tu sarupo iko :
Sabalun ambo nikah jo urang rumah, ambo alah kenal jo dunsanakno, baiak nan padusi maupun nan laki-laki. Mamak rumah ambo tu banamo Zul, saroman pulo jo namo ambo. Katiko ambo alah diantakan karumah anak daro malam, mako pagi bisuakno ambo iyo paralu ka rumah urang gaek talabiah dahulu sabalun basandiang di alek Pasumandan. katiko ambo ka barangkek ka rumah urang gaek, maimbau malah uni urang rumah ambo nan palian tuo, ba a kecek baliau : " Zul (sakali) Zul (lah duo kali), Zul (nan ka tigo kali)" tapi ambo indak mayauk doh, ambo anggap sajo Uni tu maimbau adiakno nan banamo Zul (mamak rumah), Dek ambo indak manyauk juo, mungkin takana bana dek baliau, kalau ambo alah bagala, mangko Uni tu maimbau gala ambo, Bandaro ...!. tadanga ambo diimbau jo gala, langsuang ambo manyauk, : "apo Ni ? jan lamo bana diateh karano Bandaro paralu pulo dilakekkan baju Marak Pulai kecek baliau, tantu ambo jawek ; " jadih ni. ambo sugirokan.
Diskikolah ambo mulai macubo malatakkan sasuatu pado tampaikno, aitu pulo, kok sabalunno ambo maimbau da Zul ka mamak rumah ambo tu, mako sajak alah barumah tanggo, imbauan ambo gati jo Da Kayo (kabatulan gala no Rangkayo Gadang).
ndak taraso lah panjang amek, bisuak disambuang baliak.
Wassalamu'alaikum Wr.Wb.
Bandaro Labiah
+ awak dibari gala kutiko sudah nikah, sabalun diantakan ka rumah anak daro, hadir dalam karapantu adolah Niniak Mamak, kaum bapak, Bako dan urang kampuang dlsb.
[EMAIL PROTECTED] wrote:
Assalamu'alaikum Wr. Wb.,
Mak Bandaro, taruih tarang ambo indak punyo gala do, karano satahu ambo gala ko turun temurun dari datuak awak masiang2, kebetulan datuak ambo bagala Imbang Jayo, beliau alah wafat dan manurunkan gala ko ka keponakannyo yang menetap di pdg, dengan sagalo prosesinyo, jadi awak ko sampai kini indak punyo gala do, atau urang ta buang?, he he, kadang awak suko iri juo dengan mamak2 yg lain ko.
Baitu kiro2 mak Bandaro, tapi dalam ka sampatan ko ambo juo ingin batanyo, baa sabananyo fungsi, proses, kedudukan dll. tentang gala ko, mohon pencerahan dari mamak.
Tarimo kasih, wassalam, syahril.
Yahoo! Messenger - Communicate instantly..."Ping" your friends today! Download Messenger Now
____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ___________________________________________________
