Assalamu'alaikum wr.wb., Sato - sato jauah pulo ambo ciek. Ado nan batanyo kaambo pakaro batunangan atau biaso juo disabuik batimbang tando atau batuka cincin. Nan sabanano tujuanno adolah malamar. Baa hukumno? Sapanjang nan ambo tau, malamar itu adolah buliah-buliah sajo (alah dibahas dek Rahima). Malamar itu sah, dan manuruik kabiasoan umum kacuali di nagari awak di Minangkabau, pihak laki-laki nan datang malamar ka pihak padusi. Pakaro sasudah itu lamaran itu di agiah tando (batimbang tando, batuka cincin) iko alah tambahan sajo (budayo), indaklah nan sarupo iko marupokan nan dicontohkan dalam agamo. Manuruik kayakinan ambo pulo, hal iko buliah-buliah sajo (mubah) sabagai tando bahaso lamaran tadi sungguah-sunguah. Maingek pulo, sajak diajukanno lamaran sampai ka baralek, tantu paralu wakatu, paralu parsiapan, jadi indak baa doh 'ditandoi' lamaran tadi tu. Nan indak elok, iko nan paralu bana diingekkan, adolah anggapan samantaro urang mudo, nan bahaso kalau alah batunangan, alah batuka tando atau batuka cincin tu mareka lah bebas. Lah ampia sarupo jo jadi suami - istri. Iko jaleh salah, karano lamaran, atau tunangan, atau tuka tando itu bukanlah parnikahan. Dek karano itu ado pulo ambo mandanga ustad nan manyampaikan bahaso batuka tando tu ado pulo sisi negatifno, sainggo sarancakno indak usah sajo. Kalau kamalamar, rancak dakek-dakek ka bajadi sajo, indak paralu lai maso-maso batunangan, nan baresiko untuk calon anak daro jo calon marapulai kalau indak mangarati jo 'ugamo'. Ado pulo nan batanyo pakaro mahar dalam panikahan. Baa mangko banyak urang kini maagiahan mahar saparangkaik alat sholat, atau sebuah al quran. Apokah itu buliah, atau memang disyariatkan, atau ado alasanno nan khusus mangko sarupo itu. Ambo dapek katarangan dari surang ustad, bahaso mahar nan sarupo itu dari sisi barangno buliah-buliah sajo. Kapado surang anak mudo miskin nan ka manikah, Rasulullah SAW manasihatkan untuak maagiahan mahar, walaupu hanyo sabantuak cincin basi. Kecek ustad nan ambo danga tadi tu, urang kurang faham ma'na dari mahar sahinggo manganggap nan bahaso mahar itu hanyolah simbol sajo. Padahal bukan, kecek baliau, malainkan mahar itu adolah sarupo jaminan (barang) bagi istri. Calon anak daro buliah mamintak mahar nan bapatutan ka calon suamino, dan calon suami buliah maagiahkan mahar nan labiah baharago kapado calon istri dari sekedar seperangkat alat shalat. Sabab kecek baliau, bisa sajo tajadi, sasudah balangsuang akad nikah, alah iduik sabagai suami istri, Allah Ta'ala bakahandak, singkek umua nan laki-laki. Nan padusi alah muloi manganduang anak. Mako mahar cakolah sabagai panolong biayo hiduik untuak nan padusi. Jadi aratino bana, mahar itu samustino labiah dari sakadar simbol. Itulah sakadar ka panambah-nambah sajo dari ambo. Wassalamu'alaikum wr.wb., Lembang Alam
Bandaro Labiah <[EMAIL PROTECTED]> wrote: Assalamu'alaykum Wr.Wb. Rangkayo Rahima Rahim sarato sidang RN. Alhamdulillah wa syukurillah. nan pintak alah buliah, nan kandak alah balaku pulo, iyo lah sanang di ati sajuak dalam kiro-kiro. indak tatampuang jo tapak tangan, jo niru ambo "taangan" (tampuang), tarimokasi banyak ambo sampaikan ka Rangkayo Rahima Rahim nan alah maluangkan wakatu untuak mambariakan jawaban. __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
