Ass. Wr. Wb. Dunsanak awak minta dukungan untuak poling SMS untuak pemilihan DAI di TPI, mudah2an dimulai dari dunsanak Yani ko muncul DAI2 lain dari sumbar tamasuak DAI Cilik nan di Lativi. Ambo copy dari www.cimbuak.net
Untuak mak Bandaro Labiah, tolong lewakan pulo ciek di RRI Bogor. Salam Is. St. Marajo Mohon support untuak YANI HAMDANI Ditulis oleh Abak si Raisya Jumat, 01 September 2006 Assalamu'alaikum w. w Marabah tabang kadalam samak Balam inggok dijarami Sambah tatumpah ka nan banyak Salam tatuang ka nan rami Ampun jo maaf ambo pintak, ka bake datuak niniak mamak, nan gadang basa batuah, kayu gadang ditangah padang, kapai tampek batanyo ka pulang tampek babarito, sarato kapada kasado dunsanak nan ada di cimbuak.net ko, kok gadang indak kabaimbauan gala nan ketek indak kabasabuikan namo. Tantang barito nan ka ambo sampaikan, Tantangan diri rang gaek ambo, Inyo banamo H Yurman Dt Tumangguang, nan tingga di desa mandahiliang lawang - tabek patah batusangka. Urang tuo zaman daulu, dado panuah dek agamo, kapalo baisi jo aka janiah, mancaliak jauh ka muko, mambiak maso lalu tuak pangaja. Dek nyo susah maso daulu, sikola tagntuang, disurau ilmu nan nyo timbo. Ka jadi dandam kasumek didalam ati, nyo lapeh dandam ka anak cucu, sahinggo ndak ndak kayu janjang nyo kapiang, nan pantiang anak-anaknyo sampai sikola. Alhamdulillah barakek niaik lai elok makasuik lai ka nan elok, batigo anak nan gadang barakaik kahandak dari Alloh, lai tapijak perguruan tinggi. Tingga kini di anak nan paliang ketek, utak amuah kamauan lai, gaek malapeh jo piti sarato jo doa suci, sampai juo inyio di Universitas Syarifhidayatullah Jakarta, sambia kuliah inyo mangaji pulo di pondok pesantren. Cukuik di tahun nan ka ampek, takabua juo doa gaek, sakali mandayuang biduak duo tigo pulau talampau, sakali pai ka jakarta kok lai duo gelar sarjana nan nyo sandang. Dalam hadis nabi nyo katokan " kok nak dunia, harus jo ilmu, kok nak akiraik harus jo ilmu, tapi kok nak kaduonyo harus jo ilmu. Jadi karano kuncinyo di ilmu, nyo cubo mahadang dunia, masuak nyo seleksi untuk Dai jo Daiah di TPI untuak wilayah Jakarta. Dan kebetulan pulo, Alloh lai mambari, ilmu lai cukuik, sampai juo inyo ka seleksi terakhir dari pengetahuan. Nan tabatiak tabarito, nan mangganja di dalam hati nan manarawang dalam angan-angan, tibo di tahap nan terakhir ko, audisinyo juo minta kiriman support lewat polling SMS, kok tibo di gaek di kampuang jaleh inyo lah GATEK (gagap technology) ndak bisa manulih SMS tu do, tibo ka diri kakak-kaka nyo, lah pasti ndak ka cukuik suaronyo. Timpak nan kapado kami kakak-uni dari adiak kami nan banamo YANI HAMDANI, jo doa kami mamohon dari lubuak hati nan paliang dalam, kapado sagalo datuak niniak mamak, sanak sudaro nan di Cimbuak.net ko sarato ka dewan redaksi, kami mohon bantuannyo untuak magaiahkan supportnyo ka adiak kami tu, semoga inyobisa ka puncak cito-citonyo dan tak ado hrapan kami nan lain supayo inyo tu nanti kok lai bisa manjadi anak nan baguno, pambangkik batuang tarandam, baliak ka kampuang mambangun nagari. Terakhir ateh namo keluarga besar H YURMAN DATUAK TUMANGGAUNG / HJ. DARNIS, kami mohon support dari padao dunsanak ka sadonyo sarato tarimo kasih banyak ka cimbuak.net ko semoga jaya selalu dalam mambawokan suaro urang minang.. Wassalam yusrizal -- Is Sutan Marajo [EMAIL PROTECTED] -- http://www.fastmail.fm - Send your email first class -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
