Assalamualaikum w.w. para dunsanak sa palanta,
Manjalang rapek paratamo kito hari Jumaik nan ka datang mudah-mudahan indak
banjir pulo baliak di Jakarta izinkan ambo maringkas situasi paling akhir
sakadar sabagai bahan.
1. Persiapan rapek tanggal 2 Februari nan lalu.
a. Pak Chaidir ma-SMS ambo bahaso baliau alah ado di Jakarta, tapi
dapek talipon dari Banduang supayo baliak karano ado urusan nan paralu baliau
salasaikan, jadi baliau tapaso pulang dahulu. Walau baitu baliau bapasan supayo
apo nan alah kito karajokan tatap tapaliharo. Mudah-mudahan Jumaik muko baliau
sabagai pangulu pucuak kito bisa hadir.
b. Tampek jo sakadar teh jo kopi alah disiapkan dek staf ambo, Budhy
Latif, S.E. Salain tu Pop Mie nan mudah mamasaknyo jo aia angek alah dipasan.
Proyektor LCD nan dimintak dek Dunsanak kito Ketua II MPKAS Ir Kurnia Chalik
untuak presentasi baliau alah pulo ambo sadiokan.
2. Persiapan rapek tanggal 9 Februari nan ka datang.
a. Raso-rasonyo patukar-fikiran kito malalui bantuan si imel ko makin
lamo makin langkok dan makin jaleh, sahinggo manuruik pandangan ambo bisa jadi
bahan untuak mampalancar kito dalam pambuatan kaputusan. Memang sabalun iko ado
saketek masalah, tapi insya Allah alah mulai dapek kito duduakkan, walau sacaro
informal, sahinggo indak paralu kito papanjang. Sahubuangan jo itu, ambo
harokkan sagalo masalah nan taraso agak mangganja salamo ko kito salasaikan
sampai di siko sajo malalui saling maaf-memaafkan. Kan indak paralu manunggu
Hari Rayo Idul Fitrie untuak itu. Ambo nan labiah dahulu maminta maaf kalau ado
nan tasingguang dek kato-kato ambo.
b. Dari para dunsanak kito nan mangikuti baik makitam@yahoogroups.com
maupun [EMAIL PROTECTED] alah ado masuakan untuk kito manganai masalah-masalah
sosial budaya nan paralu kito paratikan. Dari Dunsanak Zulharbi Salim ado
anjuran supayo diadokan Kongres Minangkabau Internasional sarato seminar untuak
mambahas masalah-masalah aspek budaya ko. Anjuran baliau alah ambo respons,
sakadar sabagai tanggapan awal nan paralu kito samparonokan nantik.
c. Sacaro khusus tantang hubuangan antaro MPKAS dan MAPPAS nan
kadatang, alah nampak samacam jalan kalua nan elok, yaitu MAPPAS dibantuak dek
MPKAS untuak manangani hal-hal nan indak langsuang manganai kareta api,
sahinggo MPKAS dapek mamusatkan paratian ka sagalo hal nan manganai kareta api
itu sandiri; koordinasi antaro MPKAS dan MAPPAS tatap kito picayokan ka pak
Chaidir Nien Latief SH,M.Si nan manjadi .pangulu pucuak kito. Ringkasnyo dalam
kagiatannyo nanti, MPKAS dan MAPPAS sarupo aue jo tabiang, sanda manyanda
kaduonyo
d. Kalau kito satuju, agenda rapek kito nan kadatang, kiro-kiro sarupo
iko:
1) Pembukaan a la kadarnyo dari ambo salaku tuan rumah,
maringkas apo nan alah kito bahas, dan apo nan paralu kito putuihkan.
2) Pandangan umum dari sagalo nan hadir tantang apo nan akan
kito karajokan untuak manyukseskan baiak Pulang Basamo 2008 sacaro khusus
maupun untuak memanfaatkan program pariwisata sacaro umum, sarato baa rancaknyo
hubuanngan antaro MPKAS kito jo MAPPAS nan akan kito bantuak.
3) Pandalaman kito lakukan dalam duo kalompok, yaitu:
a) Kalompok 1 manghimpun hal-hal nan paralu kito
paratikan, kito karajokan, dan kito mintak paratian para dunsanak kito di
Ranah, baiak Pamarentah tingkek provinsi, kabupaten, dan kota; maupun
tokoh-tokoh masyarakat, dan dari anggota PHRI, ASITA, sarato bisnis wisata
lainnyo..
b) Kalompok 2 mambahas baa hubuangan antaro
MPKAS jo MAPPAS, tamasuak mandaftar para dunsanak nan basadio untuak duduak
sabagai panguruihnyo. Usahokan tampilnyo muko-muko baru, sahinggo indak
manggaduah susunan MPKAS nan alah ado.
4) Rapek langkok, untuak malaporkan hasil rapek Kalompok 1
dan 2, dan mamiliah panguruih MAPPAS. Supayo lancar, pamiliahan kito lakukan
dalam duo tahap. Tahap 1, mandaftar para calon nan basadio. Kalau calon banyak,
kito adokan voting untuak mambuek short list agak limo urang. Tahap duo,
mamiliah dari short list tu, sia nan kajadi Katua, Wakil Katua, dan Sekjen..
5) Panutupan, nan tadiri dari pambacoan kasimpulan rapek,
sarato manyatokan tabantuaknyo MAPPAS sabagai anak kanduang MPKAS, sarato
mangumumkan susunan panguruih MAPPAS. Diakhiri jo doa.
Sampai di siko daulu para dunsanak.
Wassalam,
Saafroedin Bahar
---------------------------------
Need Mail bonding?
Go to the Yahoo! Mail Q&A for great tips from Yahoo! Answers users.
Sukseskan Pulang Basamo se Dunia, Juni 2008.
-----------------------------------------------------------------
Website: http://www.rantaunet.org
============================================================
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Email dengan attachment, tidak dianjurkan.
- Posting email, DITOLAK atau DIMODERASI oleh system, jika:
1. Email ukuran besar dari >500KB.
2. Email dikirim untuk banyak penerima.
--------------------------------------------------------------
* Berhenti (unsubscribe), berhenti sementara (nomail) dan konfigurasi
keanggotaan, silahkan ke: http://rantaunet.org/palanta-setting
* Membaca dan Posting email lewat web, bisa melalui mirror mailing list di:
http://groups.yahoo.com/group/RantauNet/messages
http://groups.google.com/group/RantauNet?gvc=2
dengan mendaftarkan juga email anda disini dan kedua mirror diatas.
============================================================
