Assalamu'alaikum wr.wb., Kiro-kiro duo baleh tahun nan lapeh, di suatu ta'lim (pangajian) di lingkungan tampek ambo bakarajo di Balikpapan, kami mambahas pakaro bungo bank. Ustad nan maagiahan pangajiantu bacarito pakaro 'riba' atau praktek 'rente'. Banyak ayat-ayat al Quran nan manarangkan pakaro riba tu diantarono, surah Ali Imran ayat 130, nan aratino labiah kurang, 'Wahai orang-orang yang beriman! Janganlah kamu memakan riba yang berlipat ganda. Bertaqwalah kepada Allah agar kamu menjadi orang yang menang'. Ramilah bahasan kami katiko itu. Tamasuak ambo batanyo pakaro sistim bungo bank. Ustad nan maagiah ta'lim ko agak sulik manjawab. Dibaono agak balenong-lenong, baputa-puta. Kiniko, kecek baliau, ambia indak mungkin awak iduik indak mampagunoan jasa bank, kecek baliau. Samantaro bank maagiahan kauntuangan dari tabungan nan disabuik bungo. Mako bungoko............ Tasulik baliau manjawab katiko itu. Ambo patageh tanyo. Jadi baa ustad, sabanano halal atau haram bungo bank tu? Kalau di caliak definisino, sasuai sabanano bungo bank tu jo ayat nan awak sabuik di ateh. Bungo bank tu balipek gando, bungo babungo pulo. Labiah padiah rasono kalau awak di posisi nan manyalang pitih ka bank. Awak musti mambayia bungo. Dan kalau talambek, mako bungotu pun babungo pulo. Dari contoh sarupo itu.......... Tasulik juo baru baliau manaruihkan. Mungkin dek sabagian gadang jamaah nan mangaji, dari hasia diskusi katiko itu agak anti, kalau dikecek-an bungo bank itu haram. Ambo sasak-an taruih. Kini mangko sajo ustad, manuruik pandapek ustad paribadi baa? Hala atau haramkoh bungo bank ko. Agak tapaso baliau mangecek nan bahso bungo bank tu manuruik kayakinan baliau 'haram'. Hebohlah jamaah pangajian. Jadi....baa dong? Indak buliah awak manyimpan pitih lai di bank? Ustad itu capek manambah panjelasan. Itu pandapek baliau pribadi. Dan indak paralu pulo awak baranti manggunoan jaso bank, manyimpan di bank, bakirim pitih malalui bank dan sabagaino. Tapi nan bungo pitih cako, dek awak manyimpan juo di sinan saelokno indak usah diambiak untuak awak pribadi. Agiahan ka urang miskin, ka anak yatim, ka panti jompo dsb. Itu kecek baliau. Alhamdulillah, sajak itu, iyo mantap bana ambo jo pandapektu. Walaupun gaji ambo dibayiakan langsuang ka BDK (katiko itu) ambo hetong surang tiok bulan, bara nan bungo tabik dari pitih itu, ambo kaluaan capek-capek. Dan iko bukanambo anggap sabagai zakat, tapi sabana sabagai bukan punyo ambo sajo. Nan zakat, dihetong biko baliak dari nan barasiah dilua bungo bank. Sajak pindah ka Batawi akhir tahun 94, sanang bana hati ambo dek disiko ado Bank Muamalat. Alhamdulillah sajak itu jadilah ambo panabuang satai dari Bank Muamalat sampai kini. Katiko Bank konvensional maagiah bungo sampai 60% di tahun 90an akhir, sabalun angku Suharto turun, ambo tatap indak sato-sato doh. Dasarno diambo insya Allah janji Tuhan Allah di ujuang ayat di ateh itu tadi saja. Mudah-mudahan ambo dimasuak-an Allah kadalam golongan na dimanangkan dek Allah. Rasono ambo iyo indak kabatambah kayo bagai jo bungo pitih di Bank tu doh. Banyak pulo urang nan mangecek-an, toh Bank Muamalat pandukuangno tatap juo BI. Bank Konvensional. Itu iyo indak abeh dek ambo doh. Paliang tidak awak bausaho mamiliah nan agak lumayan di antaro nan indak atau kurang rancak. Kecek mak Syamsu Maarif pulo katiko diwawancara dek radio Elshinta, toh Bank Muamalat mangaluakan kartu kredit nan bisa dipagunoan di Bank lain, baa tuh? Ambo tasengeang sajo mandanga panjalehan mamak awak ko. Baliau mangecek, manuruik baliau ateh namo pribadi, maraso masih prematur untuak mangecek-an nan bahaso bungo bank itu haram, sabab alternatif no alun cukuik. Bank-bank Syariah nan ado kini baru punyo omzet kurang dari 1% kecek baliau. Tambah tasengeang ambo mandanga. Kalau masih prematur tu barati suatu saat kan ka mature tuh. Kalau baitu. tatap sajolah ambo sarupo duo baleh tahun nan lapeh tu, manganggap nan bahaso bungo bank itu, untuak diri ambo iyo haram. Batanyo pulo saurang kanti. tapi angku mamakai pulo kartu BCA? Jawek ambo iyo, untuak kamudahan ambo pakai pulo kartu BCA sabab kartuko bamanfaat. Tapi nan bungo pitih tatap indak ambo tuai doh. Jadi kalau paralu manggunoan kartu BCA ko, ambo transfer dulu dari Bank Muamalat ka BCA baru ambo pagunoan. Kan batele-tele namo no duh? Mampasulik-sulik kaji? Baa mangko indak sato bana sin langsunag manyimpan di BCA? jano. Indak sulik bagai di ambo doh. Kecek ambo pulo. Jadi kasudahanno bana, tapulang kapado kayakinan awak masiang-masiang. Wassalamu'alaikum wr.wb., Lembang Alam
mulyadi <[EMAIL PROTECTED]> wrote: Ass, wr, wb. (di hapuih) indak haram. Liau kecekan MUI terlalu tergesa-gesa mengeluarkan fatwa tersebut. oi sanak...........! maa nan bana ko. tolong komentar angku mudo, jo alim ulama setek ah.....! Wassalam, M.St.Bangsawan __________________________________ Do you Yahoo!? New Yahoo! Photos - easier uploading and sharing. http://photos.yahoo.com/ _______________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/listinfo/rantau-net _______________________________________________
