Assalamu’alaikum w.w.
Kapado Niniak Mamak, Alim Ulamo, cadiak Pandak, Bundo Kanduang sarato Rang Mudo, sarapek papeknolah kapado Sidang RN nan ambo mulyakan !
Kok pai tantu lai batanyo, kok pulang paralu babarito. Karano lah dilapeh kami jo mupakaik, pai manyilau dunsanak kito nan dapek musibah gampo di Kampuang, mako tantu paralu pulo kami mambarikan barito nan dialami di sinan.
Sunguahpun barito alah disampaikan Mamak Z St. Mangkuto kapado Sidang RN, kirono indak ado pulo salahno kalau ambo sampaikan sakatek banyakno pandangan mato wakatu manyilau dunsanak kito tu.
Sabalun ka barangkek, ambo alah bakoordinasi jo Mak Darul St. Parpatiah sarato jo Mamak Z St. Mangkuto, tantangan ba a caro palaksanaan penyerahan sumbangan.
ambo barangkek hari Sabtu tgl 28 /2 jam 10 45, tibo di Padang jam 12.00, langsuang ambo mahubuangi Mak Z. St. Mangkuito, dapek kato sapakaik, kami batamu sajo di lokasi gampo, sasudah salasai maisi "kampuang tangah" akhiano kami batamo di muko kantua "Kubu Kerambil", jam 15.00. partamuan ko iyo basajarah bana, ba a dek baitu, lewaik HP. kami saliang manunjuakkan ragi masiang-masing, Alhamdulillah, baru sajo turun dari Garobak Japang, nampak lah Mak Z. Mangkuto mancaliak ilia mudiak. nan ambo baitu pulo, malengoh suok kida, mungkin dek lah samo-samo baniaik, tatumbuak pandangan ka Mak Z. St. Mangkuto, ambo langsuang sajo manyabuk : Mak Mangkuto yo ?, indak tarago bajawek bagai doh, kami lah langsuang bajamboan tangan, Indak disangko sarupo iko, batamu juo badan jadino,
Indak banyak nan kami pakatokan, tapi langsuang sajo kapado niaik diawa, yaitu ka manyalurkan bantuan ka dunsanak nan mamndapek musibah,
elok kato jo mupakaik, buruak kato diluano, karano kami lai baduo batigo wakatu itu, mako dicari kato sabuah, akhiano kami sapakaik manyalurkan sumbangan ka jorong Guguak Nyariang talabiah dahulu, karano wakatu itu ambo lai batahuan jo urang Pitalah Bungo Tanjuang, dimano baliauko alah ma-survey kaadaan disinan, Basamo jo E Dt. Nan kodo Basa, sarato inyiak wali Taluak 4 Suku sarato bundo kanduang kami manuju ka rumah Dt. Basa Itam, dirumah baliau ko lah kajadian dunsanak kito jo anakno manjadi korban gampo. Disiko kami manyampaikan bela sungkawa sarato sumbangan, baiak nan barasa dari RN maupun nan ambo kumpuakan di Bogor.
Bacarito saketek kajadian dirumah ko " Urang Rumah (Almarhumah) Dt. Basa Itam ko, wakatu kajadian gampo, sadang lalok jo anakno nan ba umua 2 th jo 4 th., wakatu mulo tajadi Gampo, Almarhumah bausaho maangkek anakno nan umua 2 th kalua rumah, salasai maantakan anak kalua rumah, baliau bausaho maambiak anakno nan 4 th. alun sampai baliau kalua rumah, baliau ditimpo bangunan rumah, sahinggo baliau maningga basarato anak nan ba umu 4 th ko. Anak nan umua 2 th lai salamaik, tapi paralu perawatan di RS
Dari labuah gadang manuju Guguak Nyariang, sabagian dapek ditampuah jo naiak oto, tapi jalanno rusak bana, ba aspal alun lai, kok lai nan batembok, iyo saketek pulo no, lah sampai diujuang jalan, tapaso oto dilatakkan dakek Posko, sataruhno kami bajalan malalui Pimatang Sawah, atau di palambahan rumah, baitu pulo jalan satapak basamak pulo, manyubarang banda, naiak turun bukik ketek. pokokno saluang sajo nan manyampaikan.
Di Guguak nyariang ko, lai pulo disaratoi dek Wali jorong, angku Labai, sarato masyarakaik. Sasuia jo nan dilaporkan Mamak Z. St. Mangkuto, sado itulah nan kami sampaikan sumbangan dari RN, tapi paralu pulo dunsanak katahui, disampiang nan dari RN, sumbangan babarikan pulo dari sumbangan nan alah ambo kumpuakan di Bogor lewaik Masyrakat Peduli Budaya Minangkabau. Jadi ado duo ampolok nan baagiahkan .
Karano hari alah barembang patang, dan rumah nan dituju alah cukuk rasono sarato nan dari RN alah baagiahkan kasadono, mangko kami bapisah untuak samantaro. Mamak Z. Mangkto baliak ka Banuhampu, nan ambo tingga.
Hari akaik pagi, ambo muloi baliak bakuliliang, pai ka Ateh Guguak, Balai Gadang, Gunuang Rajo, Kubang, Kapuah dlsb. Ditampaik tu, Alhamdulillah alah basarahkan pulo sumbangan, dan batimbang tarimokan jo nan patuik jo berhak, jadi indak malalui Posko doh, kacuali di Kapuah, iyo kami sarahkan malalui Posko, tapi jo catatan bahwasono sumbangan dibarikan ka urang nan alah batantukan, sasauai jo data nan ado.
Di posko Kapuah ko, sagalo sumbangan di catat, baiak dalam buku ketek maupun di karateh karton gadang, Ado. nan manjadi tando tanyo ciek diambo wakatu mancaliak catatan nan manyumbang jo nan disumbangkanno, yaitu tulisan dalam kolom "penyumbang" ado tulisan "Bapak Bupati", dalam kolom sumbangan tatulih 3 dus Mi.
Bukanno indak basyukur jo sumbangan urang, tapi iyo agak manggalitiak saketek, mako ambo tanyo bana, " apokoh bana nan manyumbang ko iyo Bapak Bupati ? batua baliau manyumbang 3 dus mi ? apokoh batua nan Bapak Bupati adolah Bupati … ?, baliau manyatokan IYO.
sasudah tu, tantangan sumbangan nan dari pamarintah pusek, untuk rumah nan rusak Rp. 5 juta. iyo alun turun lai, sasudah itu, alah jaleh pulo ka kanai potong, Ba a kok kanai potong pulo ? jawaban ko kalua dari Wakia Bupati sandiri, balaiau mangatokan : satiok sumbangan tu, harus kanai PPN.
Ambo baliak hari Sinayan, langsung dari Pitalah,
Baitulah nan ambo dapek dan tarimo di Lapangan, Malalui RN ko pulo, ambo manyampaik ucapan tarimokasi nan sagadang-gadangnyo dari Dunsanak awak nan alah manarimo sumbangan kapado Sidang RN nan alah manyumbang.
Sabanano bayak nan ka disampaikan, tapi ka ba a lah, elok disimpan sajo dahulu, pado panjang amek. nan paralu ujuikno kan lah jaleh.
Partamo : Dunsanak alah basilau
Kaduo : Sumbangan alah batimbang tarimo jo nan patuik dan berhak
katigo : Sumbangan salajukkno masih diparalukan, kok dapek dalam wakatu dakek ko.
Sakitu sajo dari ambo, labiah kurangno mintak dimaafkan
Wassalamu’alaikum w.w.
Bandaro Labiah
++ Mak Mangkuto ! mintak maaf ambo, karano indak bisa singgah wakatu kapulang, karano wakatu juo, Insya Allah, bisuak ko ambo singgah
+++ ado pulo ciek nan mambuek sasak angok. yaitu : ado dari partai nan manyumbang, babaok ilia mudiak, pakai sirine, sudah itu masuak karumah urang, bapakai juo supatu Lars tu, indak babukak bagai doh, kaco mato itam lakek pulo, untuang sajo indak talakak kapalo tu. Tooooooobaaaaaaaik ambo
Yahoo! Messenger - Communicate instantly..."Ping" your friends today! Download Messenger Now
____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
