Lapau Mak Kari : Elok Diambiak jo Mufakaik,Buruak Dibuang jo Hetongan. By padangekspresSenin, 12-April-2004, 04:46:46 WIB
Tahun batuka, musim baganti. Sakali aia gadang, sakali tapian barubah. Baitu pulo pamarentah Padang Kota tacinto. Lah pacah kaba ka urang banyak, pamarentah Kota ka mamindahkan toke sayua jo toke buah-buahan dari Pasa Jao, Pasa Raya kato rang kini, iyo ka Terminal Regional Bingkuang atau Te Er Be, Aia Pacah. Lah disadiokan saratuih duo puluah tampek manggaleh one-one tadi. Indak tangguang-tangguang, Walikota manyadiokan kepeang Limo puluah juta, nan diambiak dari dana taktis walikota, untuak mambali sayua jo buah-buahan nan indak laku. Walikota Padang, angku Fauzi Bahar, anak kamanakan urang Padang, sadang basumangaik bana "manata ulang" ibukota propinsi Sumatera Barat nangko. Maluruihkan nan bengkok, manyiangi nan basamak, mambarasiahkan nan baleak. Bak kecek urang, usang-usang dipabaharui, lapuak-lapuak dikajangi. Elok diambiak jo mufakaik, buruak dibuang jo etongan, disinan nagari mangko saleso. "Kito ansua balambek-lambek manata kota nan kito cinto nangko, supayo tasusun nan bak Siriah, balirik nan bak Pinang. Awak baliak-an Pinang ka tampuaknyo, kito pulangkan siriah ka gagangnyo." baitu kecek Insinyur Indra Catri, rang mudo nan sadang manyandang pangkek Asisten Duo Walikota Padang, di Lapau Mak Kari, hari Jumaik kapatang ko. Di hari nan sahari nantun, ado pulo Angku Yuhirman, anak mudo nan jadi dosen sambia mauruih LSM Pemberdayaan Perekonomian Rakyat Kecil di nagari awak ko. Si Mira jo Mak Kari tantu sanang hati, dek karano jarang bana Pak jabat, e..e..mungkasuik ambo Pejabat pamarentah sarato wakia rakyaik kito nan namuah mahota di lapau. Antah dek tampek duduaknyo nan indak ba-kasua, antah talingonyo nan indak biaso lai mandanga kato bakieh dari rakyaik badarai. Atau baliau tu malu mancaliak, dek lah banyak Lapau nan manjadi tampek main domino sarato mancari nomor buntuik dek anak kamanakannyo surang-surang. Mungkin juo dek karano lah ado Café nan manjadi gaya hiduik dek urang tingkek tinggi. Antah lah, Allah sajo nan ka tahu. "Baa kok one-one tukang sayua jo tukang buah nan ka dipindahan ka Te Er Be Aia pacah tu Pak In. Samantaro oto bus nan patuik masuak terminal, dipadiakan sajo mambuek terminal bayangan di tapi jalan?" tanyo Angku Yuhirman langsuang ka assisten duo walikota nan sadang mahiruik kopi angek. "Iyo tu Wan." si Mira nan mantiak mayolo dari dapua. Nan ditanyo tagalak sengeang, matonyo nan tarang sarupo bola saratuih tambah bakilek. Inyo madok tapek-tapek ka kawan lamonyo nan bakaniang laweh sampai ka ubun-ubun alias tambah sulah nantun. Sudah tu nyo mulai manjawek, "Nyo bantuak itu mah angku In.Kato sapatah dipikiri, baretong indak sakali jadi, pangana indak sakali tumbuah. Tantu diansua balambek-lambek, asa lago lai ka manang." "Kalau baitu kato sanak, ba-a kok one-one tu nan bakaca, manga indak oto oplet jo oto tambangan nan disalasaikan dulu.. Lai sakiro di barih makan paek tu, lai ditakuak makan tabang tu Pak In?" kato Mak Kari sato sa kaki. Mancaliak urang sa Lapau lah mahadok-an etongan sarupo itu, Asisten Duo nan sadang jadi koordinator untuak mamindahan urang manggaleh ka Te-Er-Be tu mamelok-an duduak. Inyo lipek kakinyo suok kida, baselo di balai-balai batuang tampeknyo duduak. "Kalau indak dimulai kini, bilo juo lai. Pamarentah mamindahan one-one ka Te Er Be sarangkek jo mambaliak-an oto tambangan nan mambuek terminal bayangan salamoko. Untuak itu pamarentah alah manyadiokan sagalo kaparaluannyo. Banyak karajo gadang nan ka kito hadang basamo, supayo kota nan awak cintoi ko samakin maju, indak tatingga dek nan lain, " kecek Pak asisten manjalehan. "Ambo raso niaik pamarentah lai rancak." uleh Mak Kari. "Indak itu sajo doh Mak Kari, Pamarentah ka ma-"evaluasi" sagalo karajo nan dikakok-ko, Insya' Allah limo baleh hari sasudah kito karajokan. Sudah tu kito paiyokan basamo. Untuak mancari bulek nan sagolong, pipiah nan salayang, lamak dek pamarentah, katuju pulo dek urang banyak" sambuang Pak asisten nan lah gadang di Lapau juo. "Bana tu Pak asisten.Manuruik pangajaran niniak muyang kito baitu juo, duduak surang basampik-sampik, duduak basamo ba lapang-lapang. Kato surang dipikiri, kato basamo dipaiyokan. Lai banyak juo urang nan cadiak candokio di nagari awak-ko nan ka manjadi kawan baiyo dek Pamarentah. Ado nan ahli komunikasi, ado ahli di bidang ekonomi kerakyatan bagai, ado pulo nan ahli sosial budayo, sarato ahli nan lainnyo. Tantu lai ka mambantu pamarentah kalau lai dibaok sato. Kami di Lapau ko lupo-lupo maingek-an, kok takalok manjagokan. Tando kota Padang punyo awak basamo." Pak Indra Catri nan umpamo sadang manyandang lamang angek dalam karajo-ko, ma-angguak-angguak tando lai paham dibayang kato sampai, nan dikamukokan dek Mak Kari tadi Indak ado karuah nan indak ka janiah. Indak ado kusuik nan indak ka sasalai. Asa lai dibaok raso jo pariso, alua nan jo patuik. Asa lai dalam adaik nan kewi, manuruik barih jo balabeh nan lah dibuek. Kapado Allah sajo kito bado' a, supayo nagari awak ko samakin maju, pamarentah nan samakin bijak, sarato wakia rakyaik nan samakin arif, tau di dahan nan ka maimpok, tau di batu nan kamanaruang. Kapado Allah kito kumbalikan, rencana iyo lai di tangan kito, tapi Allah juo nan kuaso.Amiin. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisher&op=viewarticle&artid=2476 8 ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
