Assalamu’alaikum wr.wb.,
(Evi)
Mamak Lembang yang terhormat,
Sebelum meneruskan diskusi ada baiknya saya minta kejelasan atas statemen Mamak yang
berbunyi, " Adaik basandi syarak, syarak basandi kitabullah ko iyo bana dipakai sarupo
urang mangaji, diansua dari alif, ba, ta sabalun sampai kaujuang kaji. Dimuloi
saketek-saketek malatakan di barihno, dimuloi mansajalankan adaik cako jo syarak."
(SLA)
Ado sabutan, awak kecekan sajo baitu, di nagari awak tantang hubungan mamak jo
kamanakan dalam pantun
Kaluak paku kacang balimbiang
Di tampuruang lenggang-lenggangkan
Anak dipangku kamanakan dibimbiang
Urang di kampuang patenggangkan
Iko kapanjawab tanyo Rangkayo nan tadaulu tantangan hubungan mamak jo kamanakan nan
saelokno di Minagkabau. Rancak bana “cito-cito” dari pantun tu. Sabab salamoko, kalau
disandaan kaadaik sajo, dima saisuak hubungan antaro mamak jo kamanakan adolah
hubungan tangguang jawab materil jo moril, karano mamak adolah nan pai manaruko sawah,
nan pai marancah, mamangkua, mananam, barangkuik pulang, manaikan padi kaateh kapuak.
Kasadoanno itu dilakukan mamak untuak kamanakan. Bapak bukan nan mangarajoan sarupo
itu sabab tangguang jawab baliau adolah di rumah dunsanak baliau pulo, untuk kamanakan
baliau pulo. Bapak baru paralu untuak diagiah tau jo rundingan saketek katiko si Gadih
lah elok dicarikan junjunganno. Mako figure Bapak di rumah gadang jo caro saisuak itu
adolah figure misterius, pulangno malam, katiko anak-anak alah abih lalok, paino pagi
katiko paja-paja alun jago lai.
Katiko “adaik basandi syarak, syarak basandi kitabullah” dicanangkan, didanguangkanlah
posisi urang laki-laki sarupo pantun diateh. Posisiko jaleh balain jo posisi mamak
sabagai panangguang jawab materil sacaro utuah di rumah kamanakan cako. Laki-laki kini
harus mamangku anakno, harus “manggiloi” bana anakno cako. Kalau dikecekan mamangku
tantu indak sakadar mamangku baitu sajo, tapi langkok jo manyuoki, manggadangkan,
batangguang jawab panuah. Sudah itu nan kamanakan dibimbiang pulo. Di pacikan
tanganno, dijago jan sampai no jatuah, di bao katampek nan salamaik. Aratino tantu
mamak handakno urang nan kuaik, nan nyalang matono tau manyisiahan nan elok jo nan
buruak, aluih tanganno sainggo si kamanakan indak maraso disakiki salamo ano
dibimbiang, salamo tanganno dipacikan. Labiah jauh pulo lai urang di kampuang di
patenggangkan. Disilau bana kaadan urang suok kida, kadang-kadang ado nan paralu di
tolong, ado nan paralu diingekan, ado nan paralu dijago, ado nan paralu diluruihk!
an. Aratino pulo laki-lakiko musti bana urang nan arif bijaksano, urang nan ringan
tangan dalam manolong, urang nan indak egois, bitulah singkekno.
Mako laki-laki nan mamangku anak, sambia mambimbiang kamanakan, sambia
mampatenggangkan pulo urang kampuang iyolah bana saurang “God Father”, kayu gadang di
tangah padang, batangno tampek rang basanda, daunno rimbun tampek rang bataduah,
buahno buliah kok kadimakan urang. Iko basuo bana jo fiil nan jadi acuan bagi urang
nan bariman. Urang nan bariman di sisi Allah, mandasarkan satiok amal parbuatanno
katigo tali nan kasadoanno tu dikabekanno ka Allah. Tiok karajono salalu, billahi,
lillahi, illallahi.
Satiok karajo dimuloi jo bismillah, jo namo Allah. Indak cukuik jo itu sajo tapi musti
pulo LILLAHI, samato-mato karano Allah. Disamparonoan pulo jo ILLALLAHI, untuak
mancari ridha Allah.
Kalau ciek nan partamu sajo nan dipakai, kadang-kadang kamain domino bisa juo diawali
jo mambaco bismillah. Tapi main domino tantu indak mungkin dikarajoan samato-mato
karano Allah. Kalau duo nan partamu sajo nan dipakai, urang kamangarajoan nan
wajib-wajib sajo, sambayang nan wajib, puaso nan wajib sudah itu cukuik sajo. Tapi
apobilo katigoanno dibao satali, jadi amuah pulo urang untuak mambuek ama kabajikan
nan lain.
Bagi laki-laki Minang, kalau cuma pandai mambaco bismillah sajo, mungkin alun basisiah
amek dino nama nan paralu, nama nan wajib, nama nan musti. Bialah kok batangguang
jawab untuak kamanakan bana den asa den karajoan jo bismillah. Padohal bakaluarga
paralu pulo, badunsanak paralu pulo, bamasarakat paralu pulo.
Kalau paham jo bismillah sarato lillahi sajo, awakno katapauik maadoki nan yobana
wajib sajo. Mungkin urangko kamaasuah anak-anakno elok-elok karano kawajibanno, tapi
nan lain indak amuah tauno lai. Indak amuah tau didunsanak, indak mau tau di
kamanakan, apo lai di urang sakampuang.
Tapi bagi urang nan basaratoan mangarajoanno jo mancari ridha Allah, alunlah no pueh
kalau alun bisa pulo manolong untuak baibadaik nan sunaik-sunaik.
A kan iyo rancak tu. Ikolah nan paralu disosialisasikan kini. Supayo satiok laki-laki
Minangko adolah urang nan amuah
Mamangku anak, mambimbiang kamanakan, mampatenggangkan urang sakampuang.
Sakitulah dulu Rangkayo, insya Allah biko-biko disambuang pulo
Wassalamu’alaikum wr wb.,
Lembang Alam
------------------------------------------------------------
Free Web-email ---> http://mail.rantaunet.web.id
Minangkabau WebPortal ---> http://www.rantaunet.web.id
LAPAU RantauNet di http://lapau.rantaunet.web.id
Isi Database ke anggotaan RantauNet:
http://www.egroups.com/database/rantaunet?method=addRecord&tbl=1
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
