Assalamu'alaikum wr.wb., Mohon maoh, kapatang takirim baulang-ulang nan jilid ciek, dek bendi di rumah agak 'lelet' Wassalamu'alaikum wr.wb.,
Lembang Alam Pangajian di musajik Gurun (2) Lah tibo pulo baliak maso wirid jo Buya Abidin. Lah bakumpua urang sajak sabalun sumbayang isya di musajik Gurun. Batambah juo banyakno pado nan taralah. Kalau pado wirid nan biaso jamaah apak-apak labiah saketek pado duo saf, kini alah ampek saf panuah. Baitu pulo jamaah induak-induak. Mudah-mudahan dek karano lai yakin jo pangajian nan disampaikan dek buya tu mangko urang batambah ramiko. Nan mudo-mudo bagai alah baransua amuah kini datang mandangai kaji. Mungkin dek banyak nan ma-amakan langsuang pituah buya Abidin, ma-ajak sacaro santun ka dunsanak, ka kamanakan, ka urang sabalah manyabalah. Kaji sakaliko pakaro patuah ka Allah. Karano manuruik buya sarupo nan basuo dalam Quran manusia ko diparintah untuak patuah manyambah Allah sarato ikhlas dalam manjalankan ugamo. Lawan dari patuah adolah malawan, indak patuah, ingkar. Iko adolah doso nan mulo-mulo di karajoan dek setan, indak amuah patuah katiko di suruah ma-agiah horomaik ka Adam, manusia partamu bana nan di jadikan dek Tuhan Allah. Apo sabab setan indak amuah patuah cako adolah dek takabua, dek sombong, dek ongeh, dek tinggi sangkuik-an. Dek maraso awak labiah pado urang. Dek awak labiah senior, labiah dulu di jadikan Tuhan Allah, dek asa usua awak konon labiah elok dari asa usua Adam. Dek awak santiang, dek awak hebaik. Mako jadi ingkar, jadi indak patuah, jadi malawan kapado Allah sampai tausia dari adok-an Allah. Setan kudian turun ka bumi jadi tukang dayo anak manusia. Jadi tukang provokasi bak kecek urang kini. Supayo anak manusia amuah jadi pangikuik setan, jadi takabua, jadi sombong, jadi ongeh, jadi palawan. Malawanko kasia sajo, tamasuak tantu sajo ka Allah nan alah manjadian awak sandiri. Allah mamarintahkan manusia untuak manyambah Allah salamo iduik di ateh bumiko, untuak bajalan di muko bumiko jo santun, indak sombong, indak babuek binaso, indak marusak. Allah ma-utuih nabi-nabi untuak manyampaikan pasan Allah, untuak manjadi contoh ka umaik nan banyak caro ba-ibadaik manyambah Tuhan, caro manjalani hiduik supayo indak sasek supayo indak salah. Manunjuak-an nan maa nan buliah dikarajokan, nan maa nan indak buliah. Lawan dari pituah-pituah nabi tadi adolah bisiak rayu setan. Nan ma-indakkan sado nan di kecekkan nabi. Nan manjadian tampak rancak sagalo nan dilarang agamo. Padohal sabanano kalau di turuik-an apo-apo nan diparentah agamo itu bukanlah barek. Indak ado parentah Allah tu nan sarik untuak dikarajoan. Disampiang Allah maagiah banyak pulo kamudahan-kamudahan. Sumbayang misalno, indak takao jo tagak buliah sambia duduak, indak talok duduak buliah sambia tidua tabariang. Nan pokok lai dikarajoan, jo ikhlas, samato-mato karano patuah kapado Allah. Itulah labiah kurang isi pangajian buya Abidin. Nan mandanga tampak tamanuang. Ado pulo nan maangguak-angguak faham. Sudah itu tibo pulo giliran tanyo jawab, bamacam-macam pulo tanyo, dari nan sabana tanyo sampai tanyo palamak-an kaji, tanyo nan asa lai batanyo. Malin Ameh tamasuak nan karitis, nan badacak tanyono. “Batanyo ambo ciek buya. Awak disuruah Tuhan Allah patuah kapado apo-apo sajo nan diparintahan Allah, maantian sagalo nan dilarang Allah sarato ikhlas dalam baagamoko. Baa tandono nan ikhlas karano Allah ko buya? Sabab mungkin ado juo urang nan parentah lai dikarajoan, nan larangan lai di antian, tapi antahlah kalau ikhlas atau indakno. Baa kiro-kiro tu Buya?” “Jadi baramal lai, baibadah lai, parentah dikarajoan, larangan diantian tapi indak jaleh antah lai ikhlas karano Allah antah indak, baitu tanyo Malin? Walaupun awak baramal jo ba-ibadah, nan setan tantu indak kasanang diam sajo. Makin ba-ibadah urang makin gadang pulo usaho setan nak manggaduah. Ado pulokoh urang nan alah bausao mangarajoan sarupo itu tadi kanai juo dek rayuan setan? Ado. Urang ba-ibadah tapi indak ikhlas ado. Tando indak ikhlas nampak di caro urangtu ba-ibadah nan sakadar palapeh sasak sajo, indak jo kasadaran, indak jo pangaratian, indak tampak bahaso awakno basungguah-sungguah, indak ado kayakinan di hatino nan bahaso nan dikarajoan tu untuak mamanuahi parintah Allah. Sumbayang lai, tapi sarupo sipatuang mancacah aia. Puaso lai, tapi panuah jo kaluah kasah, dek angek, dek auih, dek litak. Urang sarupo iko indak yakin awak nan bahaso ano lai ikhlas. Manah ka dikarajoan juo eloklah dikarajoan sacaro elok-elok, sacaro taratik, sacaro sungguah-sungguah. Dek ka mancari ridha Allah, tantu dikarajoan jo caro nan kiro-kiro katuju dek Allah, bukan jo caro nan kalamak di awak surang, asa sasak lapeh. Disampiang itu ado pulo urang nan baramal ko karano maarokan pujian dari urang lain. Ado urang nan tampak baramal juo, baibadah juo, tapi indak ikhlas karano Allah. Urang sarupo iko nan dimasuiki dek setan. Baramalno jadi ria, sidakahno jadi ria, manolongno jadi ria, sumbayangno jadi ria. Nan paralu dino panilaian urang banyak. Supayo urang banyak takagum-kagum, mandaceh, mangecekan bahaso awakno iyo santiang. Kambang hiduangno dapek puji sarupo itu. Iko indak katuju dek Tuhan Allah. Amalan sarupo iko bukan amalan karano Allah. Disinan paraluno ikhlas taditu. Sumbayang karano Allah, baragiah karano ingin dapek ridha Allah, bakato-kato karano ingin dapek ridha Allah, babuek, baparangai, mangecek, bakato-kato jo caro nan di ridhai Allah. Lai sasuai Malin kiro-kiro tu?” “Lai buya, nan ambo sasuai sajo.” jawek Malin Ameh. “Di ambo ado pulo nan taraso ko mah buya. Kalau di etong-etong tampak raso indak kasarik bana manjalankan parintah agamo ko. Tapi nan tajadi balain sangaik. Sagalo barek, sagalo sarik rasono. Mungkin juo dek karano hasutan jo rayuan setan cako. Nan kaambo tanyoan baa carono, malawan bujuak rayu setan ko, sabab awakno indak nampak di awak” tanyo Sutan Mantari. “Iko iyo sarik manjawabno. Baa carono awak kamalawan setan, sadang setanko indak nampak di awak. Sadang nan nampak sin kadang-kadang indak talawan di awak doh. Jadi baa lai carono? Caro untuak manolong diri awak adolah banyak-banyak zikir, mangana Tuhan Allah. Indak bosan-bosan mamintak palindungan kapado Allah dari satiok bujuak rayu setan. Indak katiko ka mambaco Quran sajo awak minta palindungan Allah tu. Awak sadari nan bahaso musuah awakko iyo barek. Baa indak ka barek. Ano indak nampak. Tapi awakno dapek masuak kasatiok suduik di badan awak. Bisa masuak ka hati, ka mato, ka paruik, ka tangan, ka kaki. Kama sajo. Baa kamalawan. Jadi untuak malawanno iyo paralu bana tolong Tuhan Allah, sabab kalau indak jo tolong Tuhan, indak katalok di awak doh. Di sampiang itu paralu pulo kahidupan bajamaah. Basatu padu maadoki bujuak rayu setan tu jo marapekan barisan dalam jamaah. Awak paralu saliang ingek maingekan. Paralu saliang jago manjagoi. Nan tau mangana-an ka nan indak tau. Baitu pulo hati awak masiang-masiang di bukak untuak amuah manarimo pitunjuak. Katiko awak talongsoang salah ado urang manganaan, di latiah diri supayo amuah manarimo nan di sampaian urang. Mungkin katiko sadang di dayo setan indak langsuang amuah awak manarimo kabanaran. Tapi katiko urang manyuruah awak ba-istighfar, mamintak ampun pado Allah, mandanga di sabuik namo Allah tu andakno capek awak sadar. Dan iko baru mungkin kalau hati awak alah dilatiah untuak patuah jo taat kapado Allah. Namono sabagai manusia ado sajo kutikono awak salah, awak kaliru, awak tadorong. Tapi jo latihan banyak mangana Allah mudah-mudahan capek pulo awak sadar jo kakaliruan awaktu. Baa, lai kamungkin nan baitu rasono Mantari?” Sutan Mantari maangguak-angguak ketek. “Lai rasono, buya” jano. __________________________________________________ Do You Yahoo!? Yahoo! Movies - coverage of the 74th Academy Awards® http://movies.yahoo.com/ RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================