Assamualikum wr.wb.
Sato pulo sakaki wan Pemi Mangkuto, sabalunnyo banyak ma'af.
Ambo cubo pulo mauleh carito wan Pemi, mungkin ulehnyo ko talalu
dangka sarato sampik, maklumlah umua alun satahun jaguang, darah alun
satampuak pinang, pangana baru sapanjang badan. Walaupun ulehan iko indak
sistimatis dan agak jauh panggang dari api, tapi hati kapingin juo
manyampaikannyo.
Dulu ado Gebuminang (Gerakan Seribu Minang) nan hebat, mungkin alah
batambah maju. Kalo ndak salah kapatang ko lai sakitar 40 milyar pitihnyo
baputa di Batu Sangka (hanyo satu setengah tahun mangumpukan modal),
Alhamdullilah, lai nampak kiprahnyo untuak kampuang. Mudah-mudahan Minang
Inc. bisa pulo maju sarangkek jo Gebuminang. Tapi kecek wan Pemi injan
sampai "angek-angek cirik ayam". Satantangan iko ambo cubo mauleh sangenek.
Mudahan-mudah nan ambo sampaikan iko indak balaku pado generasi minang nan
kini jo maso katibo. Masalahnyo ado nan bapandapek, kito urang minang pado
umumnyo sulik untuak berkolaborasi. Nan santiang berkolaborasi ko iyolah
urang Japang. Tapi sacaro individu urang minang tu bisa manonjol (iko kecek
urang goeh).
Banyak usaho-usaho swasta nan ado, rato-rato masih punyo
surang-surang baru. Alun bara bana lai pangusaho minang nan dari hasia
gabuangan babarapo urang (kalompok) nan lai exist. Kalo namuahlah urang
minang ko bakalompok, mungkin sacaro ekonomi akan sangat kuek untuak maju.
Babarapo pengusaha individu malakukan merger, tantu modal samakin kuek. Tapi
hal lain nan sangaik barek, yaitu haruih ditumbuahkan saliang picayo, jujur,
management nan transparan. Mungkin iko hanyo bisa sakadar wacana sajo,
untuak marealisasikannyo sangaiklah barek. Sabok kabanyakan kultur urang
awak susah diatur. Tapi kalo ado apak-apak dipalanta ko nan lai punyo power
untuak iko, mudahan-mudahan indak ado salahnyo dicubo, sabok injan sampai
"alun pai alah babaliak". Baa pulo kanyataan itu bisa ado, sadangkan bamimpi
sajo indak pernah. Ambo mangecek sajo nyo nan bisa, kamampuan indak ado
(kabanyakan urang awak hanyo banyak sabagai konseptor, jarang nan bisa
manjadi aplikator jo executor.. he..he..).Tapi kalau jadi pasuruah ambo
bisa, sasuai jo kamampuan nan ado diambo (urang ketek).
Orientasi pamikiran ambo ba'a caronyo supayo ekonomi dikampuang bisa
batambah maju. Ba'a supayo pandatang tu balajo dinagari maraso puas. Contoh
Singapura, barangnyo sagalo maha tapi dek sagalunyo taratur, urang suko
balajo disinan. Ba'a supayo kampuang awak tu bisa manjadi pasa nan modern.
Contoh dibueklah sabuah parusahan nan modalnyo dikumpuakan dari system
saham. Sahamnyo dibali satiok padagang konvensional/tradisional saroman nan
dipasa ateh Bukik Tinggi tu a (contoh). Injan lai super market, kapa tabang
pun bisa dibali. Jujur sajo, ambo prediksi untuak nan katibo urang alah
mulai maleh balanjo jo urang awak, sabok balanjo indak pakai tarif, apo lai
dikaki limo (bagaregak bagai), kalo lai santiang maago lai bisa tabali nan
cocok barang jo haragonyo. Jadi iko paralu dicermati bana untuak maso nan
katibo, urang alah banyak nan cadiak jo nan effesien. Bisa-bisa system pasa
tradisional makin lamo makin kalah jo super market nan taratur, capek, indak
njelimet . Urang kiniko banyak nan dikaja wakatu, suko nan efisien, kalo
balanjo iyo main praktis sajo.
Kalo mambuek pasa modern indak bisa, tantu ado pilihan lain,
dibidang industri misalnyo. Apo nan bisa dibuek dikampuang, pabrik kuaci
sajo lah misalnyo. Ka mancari lahan sajo lah tahambek jo tanah ulayat.
Kenyataan kini ko nan banyak dikampuang hanyo home industri nan sulik pulo
diajak bakalompok. Jadi samakin suliklah untuak mambuek lapangan karajo
dikampuang awak. Mangkonyo banyak nan marantau, padahal dirantau indak
sadonyo banasib elok. Ado juo nan labiah parah dari pado inyo tatap
dikampuang.
Ciek lai, dalam SDM kito salalu katinggalan. Contohnyo sajo dibidang
agamo, kito bangga mambuek musajik nan gadang, pakai batu pualam
dindiangnyo, keramik lantainyo, tapi jarang mamikiakan ba'a caronyo bisa
mambarikan besiswa kapado pemuda terbaik minang untuak basikola tantang
ugamo satinggi-tingginyo. Kapatangko sajo dibulan puaso ado musajik nan
indak ado pancaramah santapan rohani, lansuang sajo sambayang tarawiah.
Adopun ustad lah banyak pulo pai marantau. sabok lahan penghidupan
dikampuang agak sulik. Banyak pemuda terbaik minang nan indak bisa
mengaktualisasikan dirinyo dikampuang awak, baik dibidang agamo, industri,
pendidikan. Pado dasarnyo urang minang tu banyak nan santiang-santiang, tapi
sampilik, kalo indak ado untuang sacaro lansuang kainyo, inyo bapikia duo
kali. Kalo pitihnyo kakalua, nan tapikia partamo apo untuangnyo diambo
(sesaat), bukan jangko panjangnyo nan manjadi prioritasnyo. Mungkin karano
kulturnyo kabanyakn urang panggaleh, sagalonyo diliek apo untuangnyo. Injan
berang pak, iko tamasuak ambo juo lho.... Contohnyo sajo, kauangan rantau
net sajo baru sakitar duo jutaan, padohal anggotanyo hebaik-hebaik. Ado nan
di ujuang dunia, pitihnyo ado nan dollar bagai (ma'af sakali lai....).
Baliak ka topik urang awak susah bakalompok, sulik manumbuahkan saliang
picayo, sampilik, baragiah gadang ka awak. Dek karano urang minang hanyo
bisa manonjol sacaro individu, mangko sarancaknyo lahannyo adolah sarana
pendidikan tinggi di kampuang awak. Sabok pendidikan iko indak paralu bana
bakalompok do. Nan paralu bakalompok yaitu pangalolanyo, sadang hasianyo
tatap individu. Kalau inyo santiang, kan bisa maju surang sampai sakola
kalua nagari. Alah banyak contoh sabalun ko nan sampai S3 bagai. Itu
buktinyo urang awak ko banyak nan santiang. Lah banyak pandahulu kito nan
manekuni dunia pendidikan (skill nan indak mambutuahkan kolaborasi),
rato-rato maju. Disagalo panjuru dunia baliau ado, saroman nan kito danga di
netter ko. Adopun multi effek dari adonyo sarana pendidikan tinggiko
sangaiklah banyak. Diantaronyo:
1. Adonyo tampek bagi pemuda terbaik minang untuak mengaktulisasikan dirinyo
dikampuang (lapangan karajo).
2. Akan banyak pandatang, sahinggo bisa tabantuak partumbuhan pasa (ekonomi
maningkek).Contoh Depok dengan adanya UI sekarang makin ramai, Jogja &
Bandung.
3. SDM akan maningkek (bermartabat).
Samantaro sakian sajo dulu,banyak ma'af. Kapasitas ambopun hanyo baru samapi
panciloteh (suliknyo mancari dukungan nan real), mudah-mudahan anak cucu
kito nanti bisa manaruihkan cito-cito nan pernah digoreskan oleh pandahulu
kito. Tapi kalo Allah mangizinkan, indak ado nan mustahia. Nan paralu karajo
samo, kayakinan nan taguah untuak bisa barasia (indak angek-angek cirik
ayam), saliang picayo, namuah bakorban demi maso depan pandidikan anak cucu
nan dikampuang (talalu klise ya....).
Wassalam,
Anak ketek (kamampuan ketek pulo) nan paduli jo pandidikan urang kampuang.
Amrizal.
-----Original Message-----
From: Pemi M. [mailto:[EMAIL PROTECTED]]
Sent: Saturday, December 21, 2002 1:47 PM
To: [EMAIL PROTECTED]
Cc: mailto:[EMAIL PROTECTED]
Subject: RE: [RantauNet.Com] thank Da Wis,,,,, parasain pulang mudiak ,,
Ambo manumpang agak surang !
Sallam dulu untuak pak Darul , salagi hari masih siang di bulan Syawal 1423H
Minal 'aidhin wal fa 'idhin untuak dunsanak dima sajo barado.
Sampai dima kini pak Darul ' Minang Inc ' ?
Indak mungkin Minang tun sa arah djo pamikiran pak Nasyoe Chas / businisnyo
makasuik no ?
Dek takana, karano alah indak ado muncul posting tantang Minang Inc di
palanta ko atau urang awak sarupo nan dulu djuwo baru angek samba lado /
tapek no taik ayam 'kecek urang awak djuwo '
Maaf dulu manjalang pulang !
Wass
PMMA
RantauNet http://www.rantaunet.com
Isikan data keanggotaan anda di http://www.rantaunet.com/register.php3
===============================================
Tanpa mengembalikan KETERANGAN PENDAFTAR ketika subscribe,
anda tidak dapat posting ke Palanta RantauNet ini.
Mendaftar atau berhenti menerima RantauNet Mailing List di:
http://www.rantaunet.com/subscribe.php3
===============================================
