Assalamu’alaikum w.w.
Manolah Niniak dengan Mamak, nan Gadang Basa Batuah, Ali Ulama Suluah Bendang dalam Nagari, Cadiak Pandai Palito Alam, Bundo Kanduang Limpapeh Rumah Nan Gadang, sarato Rang Mudo pambimbiang dunia, nan ambo muliakan jo haromati,
Sabalun kato kadisabuk, sabalun ujuk rundiangan nan kadisampaikan, ambo susun jari nan sapuluh ditakuakkan jo kapalo nan satu, sarato disipuahkan kaki nan duo, ampun baribu kali ampun, ampun jo rila ambo mintak, mintak kapado sagalo Niniak dengan Mamak, nan Gadang Basa Batuah, Ali Ulama Suluah Bendang dalam Nagari, Cadiak Pandai Palito Alam, Bundo Kanduang Limpapeh Rumah Nan Gadang, sarato Rang Mudo pambimbiang dunia, nan barado dalam Sidang RN nangko.
Adopun ujuk rundiangan nan ka ambo sampaikan :
Partamo :
Apobilo kito nan basamo ado mampakatokan (barudiang) tantangan suatu Masalah (topik) nan dikamukokan dek dunsanak nan lain, mangko sarancakno (iko manuruk ambo = untuang-untuang satuju) kito indak macari kasalahan doh, tapi kito sampaikan pulo nan tampak atau nan tahu di awak, nan agak balain atau balian jo nan disampaikan dek dunsanak awak nan manyampaikan topik tu. dari sinan tampak bedono, samo awak pakatokan pulo tantangan bedono ko
Umpamono goa,
1. tantangan Gala,
kok di darek iyo kok lah barumah tanggo (Babini) anak laki-laki iyo diagiah gala, tapi kok ado pulo dunsanak awak nan lain nan indak mamakai gala, mangko kito bisa manyampaikan : "bahwasono dikampuang ambo iyo indak bagala doh", "dikampuang ambo iyo balian", ba a mangko di Nagari ambo sarupo iko ……", "Dima kito bisa dapekkan dasar pambarian gala tu ? "ba a bana katantuan gala ko nan sabanno ?". atau caro lain nan ampia samo. Caro saroman iko rasono manuruk ambo, kito tantuno akan manggali katantuan-katantuan nan balaku atau mandapekkan macam-macam katantuan nan balaku ditiok Nagari, karano bak kato papatah juo Adaik salingka Nagari"
2. tantangan Kalibrasi.
Sabagai info untuak awak nan basamo, tantuno info ko manjadi tambahan pamikiran atau informasi bagi awak, kok mampakatokan (mangomentari) sarancakno kito manambahkan supayo nan disampaikan majadi labiah baiak, umpamono, kok paralu kito sampaikan caro maukuano, atau palaksanaanno.
baitu pulo ide-ide atau tahadok topik-topik nan lain.
Kaduo.
Caro panyampaian.
Caro panyampaian sarancakno (manuruk ambo juo) jo caro indak manyingguang, umpomono, indak manunjuak ka urang no doh, tapi kapado apo nan majadi topik nan dikatangahkan, Baitu pulo dalam mamakai kato-kato "Anda" "You" , kalau dapek ko a, ito kito mamakai kato "Sanak, Mamak, Sutan, Bundo, Kamanakan" dll nan rasono awak ko labiah dakek (kok jauh dipadakek, dakek dipaampia). Jadi kito taraso badunsanak bana kasadono.
Katigo.
Sarupo jo nan partamo, tahadok topik nan katangah, iyo kito basamo-samo, maluruhkan, mancukukkan, aratino, kok jarang samo disisik, kurang samo ditukuak, kok senteng samo dibilai. Kalau kito alah saroman iko kasadono, Insyaallah indak ado nan karuah indak katajaniah-i, indak ado kusuk nan indak kasalasai doh.
Kaampek.
Dari caro awak diateh cako, kito basamo mambaco tulisan di RN ko adolah, : manuruk nan ambo tahu masalahko baiko ……, indak baitu doh, baa tu ?. atau "kalau kajadianno dinagari ambo bantuak iko …….., ba a kiro-kiro ?, atau, Baa pulo kalau pandapek nan mangatokan sarupo iko ……. ?, kok lai pulo dasar nan mangatokan sarupo itu, tolong pulo disampaiakan" dan caro lain nan ampia sarupo, sahinggo nan Bulek indak basagi, nan Picak indak sumbiang doh, sanang dinan manyampaikan, sajuak pulo di nan manarimo...
sakali lai, iyo mintak maaf, kok tasingguang kalo ka naiak, Talendo kalo katurun, bajalan indak di nan pasa, baranti indak pado titiak, nan di niaik hanyolah "mengingatkan dalam kebenaran dan dalam kesabaran"
wassalam
Bandaro Labiah
Yahoo! Plus - For a better Internet experience
