Assalamu’alaikum w.w.
Mancaliak pado nan sudah, batuah pado nan manang, lah basuluah matohari, bagalanggang mato rang banyak.tumbuah sarupo kini nanko, tibo disawah lah indak bapimatang, samo rato kasadono, antah aia nan dari ateh, antah nan mambusek dari bawah, campua bacampau kasudahanno, tibo indak tantu agak-an, pai indak jaleh barano, lah ilang janjang bakeh naiak, lah runtuah tanggo tampek turun, limbak nan dari pado itu, raso jo pareso lah mulai punah, baitu pulo hereng dengan gendengno, mako tajadi :
- Dikacak batih lah bak batih, dikacak langan lah bak langan,
- Habih sandiang dek bagesoh, habih miang dek bagisia
- Habih biso karano biaso, habih gali dek galitiak,
Ba a to no kini ko, karano basiang di nan tumbuah, elok dipintek sabalun anyuk bana,
Kaluak paku kacang balimbiang, tampuruang lenggang-lenggangkan baok manurun ka Saruaso tanamlah siriah jo urekno
Anak dipangku kamanakan dibimbiang, urang kampuang dipetenggangkan tenggang nagari jan binaso tenggang sarato jo adaikno
mako dipakaikan juolah pituah usang :
- Pandai bakisa duduak, bakisa di lapiak nan salai, pandai bakisa tagak, bakisa di tanah nan sabingkah
- Kok tanah nan sabingkah alah bamiliak, rumpuk nan salai alah bapunyo, malu nan alun ka babagi.
- Nak urang Koto Ilalang, nak lalu kapakan Baso malu jo sopan kalaulah ilang habih lah raso jo pareso
- Jalan nan ampek nan kadikana : Jalan mandaki, jalan manurun, jalan mandata sarato jalan malereng
- Bajanjang naiak, batanggo turun
- Tagak elok alah batanyo, duduak handakno lah mintak sipaik
- Pai iyo tanpak pungguang, tibo rancak tampak muko..
sakitu nan dikamukokan, kilek baliyuang lah ka kaki, kileh camin alah ka kaniang, tingga di Saluang manyampaikan. Talabiah takurang, tasingguang kalo ka naiak, talendo jikok katurun, bajalan indak di nan pasa, baranti indak pado titiak, rila jo maaf nan dimintak.
Wassalamu’alaikum w.w.
SBL
Want to chat instantly with your online friends? Get the FREE Yahoo! Messenger
