[R@ntau-Net] Re: Pelok-i watak sajak ketek, dan barani mangakui kalabiahan urang lain

Wed, 26 Jul 2006 03:35:53 -0700

Waalaikumsalam w.w.
 
Ananda Hanifah Damanhuri dan para dunsanak di milis iko,
 
Sanang juo hati ambo mambaco bahaso pandapek ambo ado juo manfaatnyo bagi Ananda. Pakailah ma man elok dan buanglah nan indak katuju.
 
Tantang partanyaan Ananda manganai caro mandidik anak-anak, tantu nan paratamo mandidik mareka adolah ibunyo, nan hampia sapanjang wakatu ado jo mareka. Jadi ambo sangaik mangandalkan urang rumah. Paranan ambo adolah palangkok sajo. Itu sababnyo mako ambo sangaik mandorong dipasiapkannyuo padusi sabagai ratu rumah tanggo. Kalau indak padusi, sia lai ? Kan tangguang jawab laki-laki nan paliang penting adolah ancari nafkah di lua rumah.
 
Sasakali ambo manyampaikan pandangan ambo kapado urang rumah dan kapado anak-anak, nan ambo ambiak dari inti-inti ajaran ugamo  Islam jo budaya Minangkabau, tantu  sapanjang nan dapek dek di ambo, antaro lain tantang manusia sabagai 'khalifatullah fi'l ardhi'; tantang nasib nan di tangan kito surang, hanyo takadia di tangan Tuhan; tantang sentralnyo konsep 'amanah' dan 'shiratal mustaqim' dan nan saroman tu.
 
Sasakali ambo sampaikan nan praktis-praktis, antaro lain sawakatu anak ambo nan padusi masih kuliah dan acok tapaso pulang malam, ambo agiah tigo pagangan: 1) luluih sacapek-capeknyo; 2) nilai satinggi-tingginyo; dan 3) jan ado masalah apopun, tautamo nan ka manggaduah tacapainyo duo pagangan sabalunnyo.
 
Labiah dari itu, ambo raso nan paliang penting ambo ajakan adolah conto kulikaik ambo surang, antaro lain ambo mampraktekkan bana konsep 'amanah' Islam dalam iduik ambo, nan ambo junjuang tinggi di ateh kapalo ambo. Ambo bana-bana manjago kaparcayaan urang ka ambo, bahkan itulah modal pokok ambo dalam mangarungi lautan iduik iko. Basamoan jo itu, ambo manganuik 'positive thinking' dan indak amuah baburuak sangko ka urang lain. Dari tiok pangalaman, baiak atau buruak, ambo cari hikmah dan sisi positifnyo, dan ambo jadikan panambah baka ambo dalam iduik salanjuiknyo. Jadi apopun nan tajadi, ambo jarang patah sumangaik, karano dalam sagalo hal ado positifnyo.
 
Walau ambo acok bana kanai kicuah dek urang lain, namun ambo raso masiah labiah baiak ambo nan kanai kicuah  dari pado ambo nan mangicuah urang.  Lagi pulo, biasonyo urang nan mangicuah ambo tu hanyo bisa sakali, karano sasudah tu indak tacaliak dinyo muko ambo lai.
 
Ado hal baru nan manarik paratian ambo, dan sadang ambo cubo mampraktekkan dan mangambangkan, yaitu konsep 'jejaring' atau 'networking', nan bararti mamaliharo hubungan silaturrahmi jo  sagalo dunsanak, kawan dan kanalan sebagai 'asset' dalam iduik, Jadi kakayaan ambo bukan pitih, bukan arato bando, tapi dunsanak, kawan, jo kenalan itulah. Ambo indak ragu saketek juo untuak mambantu dunsanak, kawan,. jo kenalan ko. Ado papatah Cino nan santiang dalam soal ko, yaitu : 'saribu kawan masiah kurang, surang musuah talalu banyak' .
 
Tantang caro maatasi parmintaan anak-anak nan bajibun ? Sajak ketek ambo maaja mereka untuak manabuang, bia saketek, sasuai jo ajaran adaik: 'kalau ado jan dimakan, kalau indak ado lai, baru dimakan'. Ambo katokan, sagalo biaya nan bana-bana paralu untuak sikola sampai tingkek S1 ambo tangguang, saparati SPP, uang buku, uang transpor, uang saku harian jo bulanan dan  nan saparati itu. Pakai nan himaik, dan tabuang, walau sabenggo sasen.  Kok nio nan aneh-aneh, sarupo HP, bahimaiklah dari pitih alokasi nan ado, dan bali surang. Jan mintak tambahan juo ka urang gaek nan alah sasak angoknyo mamikua baban.
 
Sampai disiko lah dahulu Ananda Hanifah.
 
Wassalam,
Saafroedin Bahar

hanifah daman <[EMAIL PROTECTED]> wrote:
Ass Wr Wb bapaf Saaf, mamak Lembang Alam dan dunsanak kasadono yth
 
Bapak Saaf
 
Hanifah beruntung bisa berdiskusi dengan orang sekaliber bapak, dan merasa tersanjung juga. Nasehat bapak sarupo nan dibawah gon sangat bagus bagi kami nan mudo-mudo
 
karano rumah tanggo adolah unit paliang dasar dari masyarakat, mako sasungguahnyo paralu diadokan parsiapan nan sungguah-sungguah, terancana, tarpadu,  bagi tiok urang nan ka barumah tanggo baiak bagi padusi maupun bagi laki-laki. Nan paralu diajakan bukan [sajo] tantang hubuangan suami isteri, tapi juo tantang hak padusi jo hak anak, nan dilindungi dek undang-undang, dan sairiang jo itu paralu dijaniahkan kawajiban dan tangguang jawab hukum dan moral dari laki-laki salaku suami dan bapak.
 
Salain itu paralu disadiokan wakatu untuk marancanakan iduik, nan rato-rato kini panjang umua sakitar 65 tahun, maliputi kurun balita, kurun remaja, kurun pemuda, kurun dewasa. dan kurun lansia
 
Jan sampai ado pulo di antaro dunsanak kito nan lain nan bapandirian 'dima tibonyo sajolah' ko, karano ugamo kito maajakan, utang di kito adolah bausaho jo baikhtiar, karano Tuhan indak ka maubah nasib suatu kaum kalau indak kaum tu sandiri nan maubahnyo. Ambo yakin sabda Ilahi tu juo balaku untuak urang surang-surang.
 
Wawasan kamipun batambah sasudah mambaco tulisan bapak dibawahgon, nan sabalunno iyo indak tapikiakan doh.  
 
gajala nan labiah mandasar sabagai panyabab suliknyo urang awak bakarajo samo, yaitu karano masyarakat Minang memang indak dirancang untuak basatu jo bakarajo samo, tapi untuak iduik sasuku-sasuku dan sanagari-nagari, sasuai jo kato papatah: 'adaik salingka nagari'.
 
Tarimokasi  ateh ajakan bapak untuak manyilau milis ABSSBK, Insya Allah kalau nanti sudah agak lapang buliahlah.
Nasehat bapak tantang bagaul dan baraja kasia sajo juo sangat bagus. Hanifah setuju.
 
Ambo tamasuak nan condong mangakui kanyataan, dalam arati mangakui kalabihan urang lain dan kalau paralu baraja dari sia juo nan memang ado kalabiahan; dan sacaro jujur mangakui kakurangan kito dan indak ragu mamelokinyo ateh kamauan kito sandiri. Sahubuangan jo iko, ambo mambukak diri untuak basahabat jo sagalo kalangan, indak pandang ras, suku, agamo, atau jenis kalamin. Pokoknya manusia dan akhlaknyo baiak. Sikap ko barangkali sasuai jo papatah kito: 'alam takambang jadi guru'. Ambo baguru ka sia sajo dan dari mano sajo.
 
Ajakan bapak untuak sato mangarajokan karajo gadang.... kayakno hanifah indak bisa sato doh. Hanifah cuman bisa badiskusi di milis gon. Mudah-mudahan rencana bapak berjalan lancar hendaknya. Amin.
 
Mamak Lembang Alam yth
 
Hanifah guntiang tempel pulo tulisan mamak dibawah gon
 
Dulu urang manyabik mairiak tolong manolong sajo, indak ado manyabuik upah. Upah cukuiklah makan jo minum kawa di sawah, ditambah jo rokok. Salasai lampok diiriak, ditutuik jo alhamdulillah sarato tarimo kasih sajo. Salasai.
Tapi katiko itu, (sampai sakitar tahun 66), masyarakaik dalam nagari saragam sajo kahidupanno. Indak ado urang nan talabiah kayo, indak ado nan talabiah miskin. Kabutuhan hiduik indak banyak. Taun sakitu tu di kampuang ambo, urang nan punyo radio transistor sin mungkin surang baduono. Tapi sajak sasudah taun 66 tu produksi Japang muloi masuak saketek demi saketek tapi taruih batambah nan kasadoanno mangandak-i pitih. Dimuloi jo  tarompa Daimatu, atau Lily, atau baju tetoron. Indak maha-maha bana doh. Jo arago limo kilo lado dapek tarompa tu sapasang. Baransua-ansua, sudah itu tibo radio transistor nan 'sarupo' tajangkau juo baru di urang banyak. Cukuik jo arago ampek puluah kilo lado. Sudah tu tibo radio cassette. Sudah itu muloi urang nampak ba honda ciek duo. Dan itu bakataruihan sampai jaman hp nan musti dibali tiok sabanta  kiniko.
 
Mamak Lembang Alam
 
Hanifah takana juo katiko ketek-ketek, nan punyo radio indak bara. Kalau nan punyo radio pandai malagu, mako mereka akan malagu di sapanjang jalan dikampuang atau di tapi tabek gadang Suingai Tanang. Jadi nan lain tau lagu apo nan sadang populer di radio.
 
Mamak Lembang, jangankan urang kampuang nan hanyo mangandalkan hasia parak nan indak pasti, kami nan PNS pun jo gaji nan alah baagakkan satiok bulanno, kadang-kadang sulik juo mangikuti arus sarupo nan mamak caritokan di ateh. Maagiah pangaratian ka anak-anak nan jolong gadang (ABG) sangaik sulik. Kawan ba HP atau ba motor dll, awak nak iyo lo. Dibandiangkanno ortu no jo ortu kawan-kawanno misalno ...." anak tukang sayur keliling saja punya motor ".
Urangtuo dibuek sibuk maatur keuangan untuak kaluarga surang, sahinggo indak taico li mamikiakan urang lain. Basyukur kalau punyo anak nan namuah dibanai.
 
Pak Saaf, kalau bapak indak keberatan, hanifah nio tau juo baa trik bapak membesarkan anak-anak, tarutamo baa caro maagiah pangaratian ka anak-anak atau baa caro  mengatasi permintaan anak-anak yang berjibun.
 
Iko sen lu, talabiah takurang mohon maaf.
 
Wass
 
Hanifah Damanhuri
 
 


See the all-new, redesigned Yahoo.com. Check it out.
How low will we go? Check out Yahoo! Messenger’s low PC-to-Phone call rates.
--~--~---------~--~----~------------~-------~--~----~
*** Palanta RantauNet *** (cadangan)

Berhenti (unsubscribe), kirim email: [EMAIL PROTECTED]
Konfigurasi lain di: http://groups.google.com/group/RantauNet

Webmail Mailing List, daftar dulu di: https://www.google.com/accounts/NewAccount
-~----------~----~----~----~------~----~------~--~---

Kirim email ke