[R@ntau-Net] Re: Pelok-i watak >>>

Thu, 27 Jul 2006 02:49:54 -0700

Waalaikumsalam w.w.
 
Ananda Hanifah, sakali lai ambo basyukur bahaso pangalaman ambo tanyato ado juo gunonyo bagi nan mudo-mudo.
 
Ambo satuju sakali jo gagasan Ananda supayo jan nan padusi sajo nan disiapkan, tapi juo nan laki-laki nan ka jadi suami, bapak 'dan akhirnyo ka jadi kakek. Suatu hal nan salamo ko ambo paratikan adolah indak sadonyo laki-laki urang awak nan alah manyiapkan diri untuak manjadi kapalo rumah tanggo. Banyak nan manyiapkan diri jadi 'urang sumando' sajo. Sabagian dari laki-laki nan saroman nantun karano bapandapek bahaso kalau panghasilannyo kurang, mako adolah kawajiban para mamak untuak manambah kakurangannyo. Ambo raso, sikap iko mau sanang sajo, kurang batangguang jawab.
 
Ambo indak panah manganuik paham sarupo tu. Sasuai jo akad nikah, ambo batangguang jawab panuah taradok kaluargo ambo. Indak paranah ambo manggaduah ipa bisan ambo soal kaparaluan rumah tanggo.
 
Kok sasakali ambo tapaso manyalang pitih, baiak ka sanak sudaro maupun ka urang lain, baitu dapek pitih, mambayia utang ko nan ambo dahulukan. Kalau paralu bana yo dipinjam baliak, tapi pinjamannyo kan pinjaman baru. Sairiang jo ajaran ambo ka anak-anak supayo manabuang, ambo ajakan supoyo jan bautang. Surang kawan ambo baru-baru ko maaja ambo supayo jan bapiutang, karano pangalaman manunjuakkan bahaso sabana sulik managiah piutang. Indak jarang pitih awak indak baliak, awak inyo dibangihi pulo dek nan barutang tu. Jadi baa jalan kaluanyo ? Kalau ado nan ingin barutang ka ambo kini, ambo sumbang sajo sabanyak  10% dari jumlah nan ingin dihutangnyo. Jadi kalau inyo nak manyalang sajuta, ambo sumbang sajo saratuih ribu. Indak ado utang, indak ado piutang. Pikiran tanang. [Tantu iko indak bararti kalau inyo nak manyalang sapuluh juta ambo sumbang sajuta. Jumlah sagadang tu indak talulua di ambo]
 
Baa kok sakali baduo suami isteri bakarajo ? Tantu rancak juo. Hanyo labiah rancak, kalau nan padusi mamiliah karajo nan bisa dkarajokan di rumah sajo atau nan dakek dari rumah, sahinggo indak manggaduah bana. Labiah rancak lai kalau nan laki-laki sajo nan bakarajo, dan nan padusi jadi ratu rumah tanggo sampai anak alah bisa ditinggakan jo neneknyo.  Jadi paralu ditimbang-timbang ma nan labiah penting untuak suatu saat: manggadangkan anak atau mancari pitih. Kalau tahun-tahun paratamo parkawinan, ambo raso anak tantu labiah penting.
 
Manjago kautuhan rumah tanggo haruihlah manjadi prioritas satu dalam iduik iko, karano bagi laki-laki, rumah tanggo adolah pangkalan tampek barangkek dan tampek pulang, bagi anak-anak, rumah tanggo adolah wahana penggemblengan watak dan kepribadian, dan bagi padusi, rumah tanggo adolah karajaannyo. Tantu ado kalonyo suami isteri basalisiah, tapi kalau di ambo bialah ambo mangalah saketek, karano kalau kalah bana pun, ibarat kuah tatunggang ka nasi, nasi ka dimakan juo.
 
Itu nan dapek di ambo nyo.
 
Wassalam,
Saafroedin Bahar.


hanifah daman <[EMAIL PROTECTED]> wrote:
Ass Wr Wb bapak Saafroedin Bahar dan dunsanak kasadono yth
 
Alhamdulillah, hanifah diagiah kesempatan atau ditamukan jo urang sahebat bapak. Caro hiduik nan bapak jalani sarupo nan bapak tulih di bawah gon pantas untuak ditiru.
 
ambo mampraktekkan bana konsep 'amanah' Islam dalam iduik ambo, nan ambo junjuang tinggi di ateh kapalo ambo. Ambo bana-bana manjago kaparcayaan urang ka ambo, bahkan itulah modal pokok ambo dalam mangarungi lautan iduik iko. Basamoan jo itu, ambo manganuik 'positive thinking' dan indak amuah baburuak sangko ka urang lain. Dari tiok pangalaman, baiak atau buruak, ambo cari hikmah dan sisi positifnyo, dan ambo jadikan panambah baka ambo dalam iduik salanjuiknyo. Jadi apopun nan tajadi, ambo jarang patah sumangaik, karano dalam sagalo hal ado positifnyo.
 
Pak saaf, nan agak susah bagi kami nan mudo gon manjalani no adolah bapaham “ positive thinking”. Apo li dek banyak urang nan bipangicuah disakaliliang kami. Alun manga-manga alah curiga dulu. Kasudahanno tantu bapangaruah ka kinerja.. mambuek awak jadi maleh bakarajo.
Nio no dapek atasan / kawan  nan baprinsip sarupo bapak
 
manusia sabagai 'khalifatullah fi'l ardhi'; tantang nasib nan di tangan kito surang, hanyo takadia di tangan Tuhan; tantang sentralnyo konsep 'amanah' dan 'shiratal mustaqim'
 
Kato kenek biskota dulu di padang sambia mancari panumpang     “ LURUS KURUS”.  
Wakatu mambaco tulisan bapak dibawah gon, tasirah sirah muko hanifah dek malu. Soalno hanifah suko ceplas ceplos kayak Nyit Sungut, jadi banyak nan bangih. Atau kalau indak katuju dek hanifah sipaik kawan, hanifah tinggakan sen kawan dun, daripado sakik hati bakapanjangan.
 
Ado hal baru nan manarik paratian ambo, dan sadang ambo cubo mampraktekkan dan mangambangkan, yaitu konsep 'jejaring' atau 'networking', nan bararti mamaliharo hubungan silaturrahmi jo  sagalo dunsanak, kawan dan kanalan sebagai 'asset' dalam iduik, Jadi kakayaan ambo bukan pitih, bukan arato bando, tapi dunsanak, kawan, jo kenalan itulah. Ambo indak ragu saketek juo untuak mambantu dunsanak, kawan,. jo kenalan ko. Ado papatah Cino nan santiang dalam soal ko, yaitu : 'saribu kawan masiah kurang, surang musuah talalu banyak' .
 
Kalau dicaliak tulisan bapak dibawah gon, bisa ditebak bapak indak mangalami masalah dalam keuangan tapi indak salalu manuruikkan apo nan dimintak anak, dan bapakpun dianugerahi anak-anak yang pintar dan patuh. Bapak hebat. Disiplin. Biasono bapak-bapak indak tahan kalau anak-anak alah marengek rengek mamintak sasuatu.
 
Sajak ketek ambo maaja mereka untuak manabuang, bia saketek, sasuai jo ajaran adaik: 'kalau ado jan dimakan, kalau indak ado lai, baru dimakan'. Ambo katokan, sagalo biaya nan bana-bana paralu untuak sikola sampai tingkek S1 ambo tangguang, saparati SPP, uang buku, uang transpor, uang saku harian jo bulanan dan  nan saparati itu. Pakai nan himaik, dan tabuang, walau sabenggo sasen.  Kok nio nan aneh-aneh, sarupo HP, bahimaiklah dari pitih alokasi nan ado, dan bali surang. Jan mintak tambahan juo ka urang gaek nan alah sasak angoknyo mamikua baban.
 
Oh iyo bapak, karano hanifah bukan tamasuak ratu rumah tangga nan ideal dek acok maninggakan anak-anak dan suami, hanifah sarankan ka bapak supayo isi dari karajo gadang nan kabapak karajokan bukan hanyo ditujukan untuak calon-calon ratu rumah tangga sen, dimano suami sebagai panyangga utama di bidang keuangan, istri nan manjago anak-anak. Tapi bapak mesti manyiapkan laki-laki Minang untuak sato pulo mambantu maurus rumah tangga  kalau sang istri sato kalua rumah. Jadi baban induak-induak indak duo kali lipek.
 
Pak saaf , kalau indak keberatan baa lo trik manjago kautuhan rumah tangga manuruik bapak. Baiak untuak kaluarga dimano suami sen sabagai pencari nafkah, maupun kaduono samo mancari nafkah dilua rumah.
 
Itu sen dulu. Talabiah takurang mohon maaf
 
Wass
 
Hanifah Damanhuri
 
Do you Yahoo!?
Next-gen email? Have it all with the all-new Yahoo! Mail Beta.
Talk is cheap. Use Yahoo! Messenger to make PC-to-Phone calls. Great rates starting at 1¢/min.
--~--~---------~--~----~------------~-------~--~----~
*** Palanta RantauNet *** (cadangan)

Berhenti (unsubscribe), kirim email: [EMAIL PROTECTED]

Konfigurasi dan Webmail Mailing List: http://groups.google.com/group/RantauNet
Daftar dulu di: https://www.google.com/accounts/NewAccount
-~----------~----~----~----~------~----~------~--~---

Kirim email ke