Assalaamu'alaikum wa rahmatullaahi wa barakaatuhu
Alah lamo pulo seri 'Pangajian di Musajik Gurun' ko
indak kalua. Lah taragak lo ambo manaruihanno.
Wassalamu'alaikum
Lembang Alam
PANGAJIAN DI MUSAJIK GURUN (11)
BAWARIH
Alah lamo sangaik awak indak mandanga pangajian buya
Abidin. Dek awak nan indak pai ka musajik Gurun. Sabab
pangajian baliau tu lai bajalan juo taruih. Tapi
itulah, dek iman awak turun naiak, lah banyak nan
indak tasatoi wirid tiok patang Satu tu. Sakali ko
agak barek sabanano pangajian baliau. Pakaro wasiat
sarato pakaro arato warih. Pakaro baa mambagi warih
untuak anak jo katurunan sarato sia-sia sajo nan
buliah manarimo warih cako.
Sarupo ikolah sabagian dari kaji baliau tu.
Ado firman Allah Taala di dalam al Quran surek Al
Baqarah ayat 180 sarupo iko bunyino; Kutiba alaikum
itzaa hadharaa ahadakum ulmauta intaraka khairaa
nilwashiiyatu lil waalidaini wal aqrabiina bil
maruufi, haqqan alal muttaqiin. Wajib bagi kalian,
bilo alah dakek aja katibo, jikok ado awak baarato,
barwasiat untuak ibu bapak sarato kaum karabaik jo
caro nan maruf. Bawasiat ko wajib hukumno bagi
urang-urang nan bataqwa.
Awakko ka badakek-an sajo jo kamatian. Satiok saat
bisa sajo tibo kamatian tu. Mako disuruah awak
bawasiat. Maninggaan pasan ka urang-urang nan ka
ditinggaan di balakang awak. Tamasuak kaduo urang tuo
awak. Sarato karik kirabaik awak. Pasan supaya jaan
sampai timbua pitanah di balakang awak. Jaan sampai
tumbuah silang sangketo di balakang awak. Baiak di
antaro anak ataupun di antaro dunsanak. Mako tinggaan
pasan. Bawasiat. Apo sajo nan buliah diwasiatkan?
Sagalo sasuatu nan bahubuangan jo urang nan ka
ditinggaan buliah awak tinggaan pasan. Pakaro arato,
pakaro parawatan mayik awak sasudah mati. Bawasiat
sacaro makruf, sacaro baiak-baiak, sacaro adia. Indak
buliah awak bawasiat sacaro kabaliak-anno, sacaro
zalim, sacaro indak adia. Indak buliah awak bawasiat,
kalau mati den biko, arato den pamasuak-masuak-an ka
dalam kubua den. Atau arato den agiah-an kasadoanno
untuak si Anu, padohal ahli warih awak masih ado.
Indak buliah juo awak bawasiat supayo mayik awak biko
dibaka sajo, bitu nan ka sanang ati awak. Itu zalim
namono.
Bagi nan mandanga atau nan manarimo wasiat awak,
wajib pulo dino manjalankan sasuai jo nan awak
pitaruah-an. Itu di ayaik nan barikuikno. Sia sajo
nan marubah wasiat sasudah didangano, mako doso
tangguangan nan marubah ko. Adopun Allah, sungguah
Maha Mandanga Maha Mangatahui. Baitu bunyi ayat
barikuikno. Namun kalau wasiat cako nampak nan baraso
indak batua, indak adia, dek tadorong jo nafsu nan
bawasiat sajo, buliahlah nan tingga mameloki. Indak
mangarajoan sarupo bunyi wasiat cako. Mako sia nan
takuik bahaso urang nan maninggaan wasiat indak adia
atau babuek doso (jo pasanno) lalu nan tingga
bamufakaik indak mangarajoan (sarupo bunyi wasiatno
tu), mako indaklah mareka ko badoso. Sungguah Allah
Maha Pangampun Maha Panyayang.
Nan maa wasiat nan indak adia ? Sarupo nan awak
contohan cako. Ado urang kayo babinyi mudo, dek
tadorong bana kasiah ka binyi mudo, kasadoan arato ka
ditinggaan untuak binyi mudo iko sajo. Padohal ado
anak-anak jo binyi tuo. Ado nan lain nan mustino
manarimo pulo warih nan ditinggaan. Mako barundiang
ahli warih ko mameloki nan dipasanan dek nan maningga
ko, mameloki apo nan ditinggaanno sacaro indak adia,
sacaro kaliru manuruik aturan Allah. Iko buliah
dikarajoan.
Kini nan sarupo iko nan banyak ditinggaan urang. Nan
indak dikarajoan urang. Baiak bawasiat sacaro makruf
ataupun bapasan nan elok-elokko. Urang alah
mampaturuik-an baa nan rancak taraso dihatino sajo.
Ado nan pai ka muko notarih bagai, manjalehan bahaso
wasiat nan ditinggaanno adolah sasuai jo nan taraso di
hatino sajo. Akibaikno tajadilah sangketo. Tajadi
pasalisiahan. Baarato awak, jadi pitanah arato tu
sapaningga awak. Bacakak anak-anak nan ditinggaan.
Dan adia ko musti jo ukuran Allah. Dalam mambagi arato
warisan, kecek Allah bagian anak laki-laki duo kali
bagian anak padusi. Iko parintah Allah di dalam surek
An Nisa ayat 11. Allah mawasiatkan kapado kalian
pakaro pambagian warisan untuak anak-anak kalian.
Untuak anak laki-laki adolah dua kali untuak nan
padusi. YuushiikumulLahu fii auladikum, litztzakari
mitslu hazhzhil untsayaini
. Sarupo itu parintah
Tuhan Allah. Sabagai urang nan bariman indak paralu
awak babanyak tanyo lai. Itu kecek Tuhan Allah, itu
nan awak tarimo dan itu nan ka awak karajoan. Eh,
kalau baitu indak adia namono. Indak ado kasataraan
gender. Kaliru ayat ko go agakno. Atau ayat ko mungkin
untuak kondisi saisuak di tanah Arab sajo. Kok
nyampang kalua nan sarupo itu di muluik awak badoso
awak. Indak bariman namono awak ka ayat-ayat Allah.
Allah parintahan sarupo itu mako awak sabagai urang
nan bariman mustino, samina wa athana. Kami danga
dan kami patuah.
Itu sajolah dulu. Mungkin ado nan kaditanyoan bagai
agakno, kecek Buya Abidin.
Bialah ambo muloi Buya, kecek mak Marah. Nan kudian
ko bana. Pakaro mambagi arato sacaro adia. Kalau
katiko awak iduik, dibagi arato tu samo banyak di
antaro anak-anak awak baiak nan laki-laki atau nan
padusi samo banyak, kaliru awak namono du buya? tanyo
mak Marah.
Baragiah katiko awak masih iduik ka anak laki-laki jo
anak padusi, sasuai jo kabutuahanno masiang-masiang
buliah awak karajoan. Nan dimukasuik ayat taditu
adolah paninggalan warisan awak nan masih tapacik di
tangan awak katiko awak ka mati. Samaso awak masih
iduik, ado awak ba arato, tapi ado pulo awak ba
kawajiban ado ba tangguang jawab, mako dipanuahi
tangguang jawab awak cako sacaro adia. Baa carono?
Umpamono, anak padusi awak sakola di sakola dotor.
Paralu dino biaya sajuta rupiah sabulan. Dipanuahi
itu, itu namono kawajiban awak. Nan laki-laki sakola
insinyur. Paralu dino pitih salapan ratuih ribu rupiah
sabulan, dipanuahi pulo sakitu. Itu nan adia. Jadi
bukan dek anak padusi kaparaluanno sajuta, anak
laki-laki langsuang diagiah duo juta walaupun
kabutuahanno hanyo salapan ratuih ribu. Bukan baitu.
Nan padusi duo piriang nasi mangko ka kanyangno makan
dek badan no gadang. Nan laki-laki dek masih ketek,
sapiriang alah kanyang no. Jaan dipasoan pulo maagih
ampek piriang dek awakno laki-laki. Tapi katiko awak
mati, ado arato nan tingga, mako arato tu caro
mambagino sarupo parintah Tuhan Allah nan awak kaji
tu. Baa, lai paham Marah du kiro-kiro? tanyo Buya
Abidin.
Baa kalau alah gadang-gadang anak, alah baranak pulo
no masiang-masiang. Indak samo nasib tiok anak. Nan
surang lakino kurang barasaki. Lalu baragiah awak,
sarupo maagiah makan cako juo. Di labiahan kamari
saketek pado ka kian. Buliah du sarupo itu Buya?
batambah tanyo mak Marah.
Nan sarupo itu buliah. Paragiahan nan bukan sifaikno
mampabedo-bedoan anak dek karano kasiah ati sajo,
buliah. Tantu dikarajoan sacaro bijaksano. Saelokno
sacaro batarang-tarang. Dikumpuaan anak-anak.
Dikecek-an bajaleh-jaleh. Lah samo kalian caliak,
dunsanak kalian nan surang ko, kurang baruntuangno.
Agak sarik hiduikno. Dek karano itu bialah abak bantu
no saketek. Kalian nan lain indak abak agiah do dek
kalian lai bakacukuik-an. Nan sarupo iko indak baa.
Kalau awak batua-batua indak dek karano niaik nak
mampabedo-bedoan anak, mudah-mudahan ta tarimo dinan
lain. Sakali lai sarancakno dikarajoan jo caro-caro
nan arih bijaksano dan sadapekno batarang-tarang,
supayo nan lain mangarati. Kok ado nan ka mandakwa,
nan ka mamintak pulo kan dapek pulo awak mamikia-an.
Ambo lo batanyo Buya, kecek Sutan Bagindo.
Laluanlah Tan Gindo, kecek Buya.
Kalau awak masih sihaik, indak takana di awak
bawasiat. Tibo-tibo dek Allah bakahandak, mati awak.
Badoso jadino du awak dek indak bawasiat cako tu
Buya?
Itu mangko awak kaji sarupo kiniko Tan Gindo. Kini
dek alah didanga kaji, sugiro andakno di buek. Sabab
bak kecek Tan Gindo, sadang awak sihaik badagok
kiniko. kalau Allah nan bakahandak baraso alah sampai
janji awak indak dapek awak minta ancik saketek juo
doh. Jadi bueklah wasiat tu kini-kini. Indak dinanti
sampai awak alah talalok indak pandai manga baru ka
dibuek.
Baa kalau awak ba wasiat maninggaan bagian tubuah
awak untuak ka dipagunoan urang lain kalau awak mati
isuak, Buya. Misalno, mato awak, atau ginjal awak,
atau bagian tubuah nan maa sajo ka awak agiah an ka
urang lain kalau awak mati, tanyo Sutan Mantari pulo.
He..he.. iko barek tanyo Mantari ko gomah. Kalau di
ambo indak buliah do. Sabab manyakik-i mayik tu indak
buliah, baitu kecek Nabi. Baliau mangecekkan nan
bahaso mayik marasoan katiko awakno disakik-i tapi
awak indak tau. Nan dalam pamikiran awak kalau urang
alah mati kan indak kamarasoan apo-apo lai, sabab ano
alah mati, padohal kecek Nabi indak baitu. Jadi kalau
di ambiak matono, atau anggota tubuahno nan maa sajo,
tantulah awakno, si mayik cako ka marasoan sakik itu
taruih manaruih. Sarupo itu pandapek ambo. Wallahu
alam, jawab Buya Abidin.
Baliak ka tanyo Marah Sutan cako Buya, ambo tambahan
pulo saketek lai, kecek Malin Bandaro pulo.
Laluanlah Malin, apo pulo tu?
Dek anak-anak awak indak samo kasalesoan iduikno,
bawasiat awak maagiahan balabiah ka nan surang, nan
kurang elok rasakino ko, apo buliah nan sarupo itu
Buya?
Baragiah jo caro patuik, jo caro makruf buliah.
Disurek-an jaleh-jaleh niaik awaktu. Katiko awak ka
maninggaan warih, ka maninggaan arato, contoh nan
dikecek-an buliah dek Nabi SAW, duo patigo arato
taditu nan ka ditinggaan untuak ahli warih awak. Nan
sapatigo buliah awak agiah-an ka sia nan manuruik
panilaian awak patuik manarimono di jalan Allah.
Mungkin ado anak yatim bagai dakek awak. Antah
kamananakan awak bagai nan indak mampu. Apo lai pulo
anak kanduang awak. Buliah diagiah jo bagian nan
sapatigo dari arato nan ka awak tinggaan cako. Tapi yo
itu pulo. Musti jo niaik bukan untuak mapabedo-bedoan
antarao anak. Bukan dek kasiah tacurah ka nan surang
sainggo jadi indak adia. Nan intino bana, musti
dikarajoan jo caro nan makruf.
Ambo sambuang lo tanyo saketek Buya, kecek tek
Dalipah.
Aa, a pulo tu Atiak?
Nan manarimo arato warih ko salain anak-anak sia sajo
go Buya? Ado kamanakan bagai? Itu sin tanyo ambono.
Di surek An Nisaa ayat 11 cako tu dijalehan Tuhan
Allah. Panjang ayat no, alah awak kaji sabagian cako.
Mangko aratino; Allah mawasiatkan kapado kalian
pakaro pambagian warisan untuak anak-anak kalian.
Untuak anak laki-laki adolah duo kali untuak nan
padusi. Mako kalau anak-anak ko jumlahno labiah duo
urang, untuak mareka basamo duo partigo arato warisan.
Kalau anak padusi tungga, ano mandapek sapaduo. Untuak
ayah jo ibu masiang-masiang mandapek saparanam kalau
nan mati maninggaan anak. Kalau ano indak baranak, nan
mawarihi hanyo urang tuono sajo, mako untuak ibu
sapatigo, ayah duo patigo.. Kalau lai pulono
badunsanak, mako untuak ibuno saparanam. Pambagian
cako sasudah dibayia wasiat nan ditinggaanno sarato
utang-utangno. Ayah jo anak, indak tau angkau nan maa
nan labiah banyak mambela angkau. Iko adolah katatapan
Allah. Sungguah Allah Maha Mangatahui lagi Maha
Bijaksano. Sarupo itu bunyi parintah Allah di ayat
nan kasabaleh ko. Baa kadudukan binyi? Dia yat
barikuikno dijalehan Allah. Muloi jo, kalau nan
laki-laki nan manarimo warih dari binyi. Mako si laki
mandapek sapaduo saandaino indak ado anak. Kalau ado
anak, si laki mandapek saparampek. Kalau awak nan
laki-laki nan mati, binyi awak mandapek sapalapan.
Kalau binyi labiah dari surang, bagian mareka
sapalapan dibagi sabanyak binyi. Kan jaleh bana
aturanno du? Baa duduakno kamanakan? Buliah kok awak
nak ka baragiah tapi indak jo aturan nan sarupo jo
untuak anak-anak awak. Ado kamanakan awak, anak-anak
dari adiak padusi awak, raso-rasono patuik lo kok ka
disantuni hiduikno, buliah diambiak dari sapatigo nan
ka dibagi-bagi di antaro ahli warih nan disabuik-an di
ayat iko tadi. Sabab baragiah, indak ado laranganno
do di dalam agamo awak. Tantu sajo paragiahan nan
sifaikno untuak kabaikan di sisi Allah. Itupun sarupo
nan alah awak kaji ado bateh jumlah nan musti
ditinggaan.
Agak kurang jaleh di ambo saketek Buya. Untuak
anak-anak disabuik cako kalau ano labiah dari duo
urang mandapekno duo patigo. Untuak ibu bapak duo kali
saparanam bararti sapatigo. Dimaa bagian binyi lai du
Buya, tanyo etek Saripah.
Bagian binyi kan alah disabuikan di ayat duo baleh,
sapalapan. Jadi pambagianno dietong sarupo itu. Nan
pasti mandapek warih, nan partamu adolah anak-anak.
Nan kaduo, urang tuo. Nan katigo binyi atau pasangan
hiduik awak. Jo pambagian sarupo itu tadi labiah
kurangno. Kini kecek-an kasadoanno ado. Anak labiah
dari duo urang. Urang gaek masih cukuik kaduono. Binyi
ado pulo baduo. Misalno go eh. Dijumlahan sin baliak
dulu sarupo cako. Duo patigo ditambah sapatigo
ditambah sapalan. Kan jadi balabiah dari ciek no du
jadino, jadi ciek sapalapanno. Atau sambilan par
salapan bagian. Mako bagian anak sabanano manjadi duo
patigo dari salapan par sambilan. Bagian anak-anak
basarikat, basamo adolah 16/27. Bagian urang gaek, ibu
jo ayah 8/27. Bagian binyi basarikat pulo 3/27. Sarupo
itu mambagino. Jadi baretong matematika pulo awak jadi
no mah. Lai jaleh di atiak du. Kok indak jaleh ancak
awak batanyo bana caro mambagino biko ka nan santiang
baretong. Sainggo iko pulolah dulu kaji awak.
*****
St. Lembang Alam
____________________________________________________________________________________
Sucker-punch spam with award-winning protection.
Try the free Yahoo! Mail Beta.
http://advision.webevents.yahoo.com/mailbeta/features_spam.html
--~--~---------~--~----~------------~-------~--~----~
Kami mengundang sanak untuk hadir dalam acara: "Wartawan mengajak Berdoa
Bersama untuk Keselamatan Negeri" pada tanggal 8 April 2007 jam 08:00 di Masjid
Istiglal. Acara ini terpicu oleh musibah terbakarnya Ustano Pagaruyuang dan
Gempa di Sumbar.
Berhenti (unsubscribe), kirim email ke: [EMAIL PROTECTED]
Konfigurasi dan Webmail Mailing List: http://groups.google.com/group/RantauNet
Daftar dulu di: https://www.google.com/accounts/NewAccount
-~----------~----~----~----~------~----~------~--~---
