Ota nan menarik juo dari Lapau Uwo Pulin Singgalang OnLine, masalah nan acok didiskusikan di Palanta RN, mengenai mulai pudarnyo bahaso minang di kota2 gadang di Ranah kito cintai.
Tetapi sebagai perantau lai melestarikan bhasa awak ko jo sasamo awak di rantau, walau lah mulai ditinggan juo dek barumah tangga, tapaso anak2 indak panda bana babahaso awal lai (mangarati ilai, mengucapkannyo indak) apolai manuliskannyo. makan gue ciek lu <== gayak ABG pada kota ================================= "Alhamdulillah, lai aman awak!" Baitu Tan Baro mangecek surang, sambia mambaliak-baliak surek kaba 'Singgalang' di palanta lapau Uwo Pulin pagi kapatang. "Aponyo nan aman, Tan? Parang urang? Atau iyo ka tibo sunami tu?" Uwo Pulin lansuang pulo manyonsong apo nan dikatokan Tan Baro tadi. "Indak! Bahaso Minang nan awak pagunokan satiok hari ko lai aman posisinyo. Dari 746 bahaso daerah di nusantara ko, hanyo 13 se nan lai banyak pamakainyo. Salabiahnyo dalam status awas dan ado pulo nan alah punah," jawek Tan Baro. "Samo pulo jo gunuang barapi tu? Pakai status awas bagai," potong Uncu Labai. "Yo, baitulah kiro-kiro. Tapi, kalau awak inok manuangkan, memang urang awaklah nan lai konsisten mamakai bahaso daerah. Katiko ambo ka Jakarta tahun lapeh, di sapanjang pasa Tanah Abang tu, banyak tadanga dek ambo urang mamakai bahaso Minang. Malah, kabanyo di Aceh, ado ciek daerah nan bahaso sahari-harinyo adolah bahaso Minang," kato Tan Baro. "Manuruik ambo, walau aman, tapi bahaso Minang tu kini dalam status siaga," kecek Kari Garejoh pulo. "Baa tu?" "Caliaklah dalam iduik sahari-hari di nagari awak ko, banyak anak-anak nan mamakai bahaso nasional di rumahnyo. Di sabalah rumah ambo, induak-bapaknyo urang awak, tapi anak-anaknyo kasadonyo pakai bahaso Indonesia raya. Kadang-kadang ba sih dong kak, bagai di ateh rumah tu tadanga dek ambo," jawek Kari. "Basidongkak baa pulo ko, Kari? Bacakak anak-anak tu tiok hari?" Tanyo Mak Pono. "Indak basidongkak doh, Mak, tapi pakai logat Jakarta," jawek Kari baliak. Samakin lamo, samakin bakatuntang ota urang di lapau Uwo. Masalah bahaso daerah nan hanyo tingga 13 bahaso tu taraso lamak dipakecek-an. Apolai, urang-urang tu mancaliak jo mato kapalo surang dan mandanga lansuang, anak-anak ketek kini indak lai mamakai bahaso Minang. "Nan rumiknyo, katiko angku jo neneknyo datang dari kampuang batanyo jo bahaso kampuangnyo, tapi anak-anak indak mangarati. Baitu juo sabaliaknyo, anak-anak batanyo pakai bahaso Indonesia, nan urang gaek-gaek tu indak mangarati, sahinggo ciek ka ilia, ciek ka mudiak jadinyo. Ambo mandanga, kato neneknyo, tolong asak nasi tu lai. Tapi dijawek dek cucunyo: Kan baru siap makan, Nek. Ngapain masak lagi," kato Kari maagiah contoh dan disambuik jo galak dek kawan-kawannyo. "Dek ambo indak masalah anak-anak awak pakai bahaso Indonesia di rumah. Tapi, aja pulo bahaso Minang. Jo caro itu, anak-anak tu bisa bakomunikasi jo siapo sajo, tamasuak jo urang kampuang urang gaeknyo. Anak-anak ambo juo pakai bahaso Indonesia di rumah, tapi katiko batamu jo angku atau nenek sarato urang kampuang ambo, inyo pandai pulo bahaso kampuang," kato Tan Baro pulo. "Nan pakai sih, dong, lu, gue tu baa pulo, Tan?" Tanyo Uncu. "Kalau itu namonyo logat atau dialek. Samo se jo urang awak babahasa Indonesia, tapi masuak logat Minang. Umpamonyo, tidak ada saya membawanya doh," kecek Tan Baro langkok jo contohnyo. Walau ota bantuak itu, tapi urang-urang di lapau Uwo sabana basyukur bahaso Minang lai indak punah. Malah, ado kasapakatan mamakai bahaso Minang salain bahaso Indonesia di rumah surang-surang. Espe St.Soeleman --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Jika anda, kirim email kosong ke >>: berhenti >> [EMAIL PROTECTED] Cuti: >> [EMAIL PROTECTED] digest: >> [EMAIL PROTECTED] terima email individu lagi: >> [EMAIL PROTECTED] Webmail Mailing List dan Konfigurasi keanggotaan lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di -~----------~----~----~----~------~----~------~--~---