Iyo juo kato urang tuo-tuo. Nan lalok makan nan jago, cadiak makan nan ongok. Karano itu, kicuah-mangicuah, tipu-tepok bajalan aman di nagari ko.
Itulah kasimpulan Tan Baro sasudah mambaco barita surek kaba 'Singgalang' pagi kapatang. Be-be-em nan bakurang di satiok es-pe-be-u manjadi paratian bana dek nyo. Salamo ko dalam pikiran Tan Baro nan takicuah tu cuma urang nan mambali minyak oto sajo. Karano memang, acok urang punyo kandaraan tapakiak minyak bensin atau solar indak cukuik ditarimo. Ruponyo toke be-be-em nan rato-rato urang cadiak juo kanai kicuah. Bensin jo solar nan ditarimonyo juo indak cukuik. "Indak panumpang se nan turun di jalan nampak dek ambo doh, minyak dalam tangki juo ado turun di jalan," kato Tan Baro "Turun di jalan baa, Tan?" Tanyo Angah Piyan. "Bensin jo solar tu indak cukuik sampai di es-pe-be-u. Iko lah tajadi sajak saisuak. Apo indak turun di jalan namonyo tu? Caliaklah oto umum. Sapanuah-panuahnyo oto dari terminal, pasti indak cukuik sampai tujuan. Beda jo kapa tabang, kalau saratuih urang dari Padang sabanyak itu juo sampai di Jakarta," kecek Tan Baro sambia maagiah contoh. Samo tamanuang kawan-kawan di lapau Uwo mandanga kato Tan Baro. Baa ka indak, kadang-kadang indak masuak aka bagai kalau minyak di tangki sagadang itu bisa kurang sampai tujuan. Karano katiko maisi ado pakakeh untuak maukuanyo. "Bocor tangki tu mah, Tan!" Sorak Kari. "Nan ka indak masuak aka je pandapek Kari mah. Di ma pulo sadoe tangki bocor," baleh Ajo Tondeh. "Eyayai. Kini ko urang lah cadiak sadonyo. Untuak mancari labo gadang, babagai caro ditampuah urang. Ado kawan pernah mangatoan ka ambo, dalam tangki tu dibuek lo tangki ciek lai. Katiko minyak di tangki gadang tu panuah, otomatis tangki ketek di dalamnyo juo panuah. Tapi katiko isi tangki gadang disalin ka bak es-pe-be-u, nan minyak dalam tangki ketek tingga. Ikolah nan mambuek bakurangnyo bensin atau solar sampai di es-pe-be-u. Jadi indak turun di jalan doh, dibao ka tampek lain. Laih jaleh dek Ajo?" kato Kari maagiah tau. Samo-samo tambah tamanuang urang dibueknyo. Kasadonyo mambayangkan baa bantuak tangki minyak pambao bensin, solar jo minyak tanah tu. "Baa caro mambueknyo tu?" Tanyo Uncu Labai. "Pai Uncu ka bengke, tanyo ka tukangnyo. Dek ambo maa jaleh, karano nan ambo kecek-an tadi tu juo kaba dari kawan," jawek Kari. Tan Baro maangguak-angguak surang tando paham kecek kawannyo. Dalam pikirannyo talinteh banyaknyo oto tangki nan masuak bengke. Tapi antah mampaelok-i nan rusak atau memang mambuek tangki ketek, indak pulo pasti dek nyo. Cuma sajo dulu inyo pernah mancaliak barita televisi, ado bengke di Jakarta nan maolah tangki-tangki minyak tu. "Kasimpulannyo, babaliak awak ka papatah urang tuo-tuo, nan lalok makan nan jago," kecek Tan Baro baliak. o Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---