Ado nan babeda di lapau Uwo Pulin sakali ko. Surek kaba ‘Singgalang’ nan biaso diparabuik-an, kini dipabiakan sajo talatak di ateh meja. Indak itu se doh, urang-urang nan ado di dalam lapau nampak samo-samo tamanuang. Dalam pado itu, tibo-tibo Tan Baro masuak. Sarupo biaso, satibo dalam lapau nan ditanyo partamo adolah barita angek.
“Kini ijan batanyo barita angek, Tan. Ko kami nan ado dalam lapau kini ko, angek kasadonyo,” Kari Garejoh manjawek tanyo kawannyo tu. Tantu sajo heran Tan Baro mandanga jawek konco palangkinnyo nan agak senjang. Indak biaso kawan-kawannyo bantuak itu. Dalam pikiran Tan Baro, pastilah ado nan indak beres. “Baa kok bantuak tabali kain cabiak se kasadonyo, Wo?” Tan Baro maaliahan tanyo ka Uwo Pulin. “Antahlah! Ambo juo heran. Tibo-tibo se urang-urang tu basianok se kasadonyo,” jawek Uwo sambia maangkek bahu. Karano memang indak ado nan mangecek surang juo, Tan Baro lansuang se manyemba surek kaba ‘Singgalang’ di ateh meja. Ciek-ciek barita tu dibaco elok-elok. “Haaa...., saragi se barita kini mah! Dulu, katiko zaman Pak Harto pitih iyo sabana baarago. Harago dolar murah, sagalo nan dibali murah pulo. Kini, isi barita ko lah sagalo naiak. Ameh naiak, tapuang tarigu naiak, kacang kadele naiak, simin jo bahan bangunan naiak pulo. Yo, tambah sansai awak nan ketek-ketek ko, mah.” Baitu Tan Baro birunguik surang diri sasudah mancaliak sakalian barita di halaman partamo. “Lai ado nan turun, Tan!” Sorak Kari masih jo nada nan indak lamak didanga. “Apo tu?” Baleh tan Baro nio tau. “Harago diri!” Tan Baro tamanuang sabanta. Dicubo bapikia, iduik kini samakin payah. Sakalian kaparaluan iduik lah sabana maha. Lai bana urang tani batanam padi atau sayua, tapi haragonyo indak naiak-naiak. Kini, justru pupuak lah dan maha sarik pulo. “Kok dipikia-pikia, sabananyo iyo rancak juo iduik di zaman Pak Harto dulu. Barang-barang kaparaluan iduik awak indak maha, bahan bangunan murah. Nio mambuek rumah dari kayu atau dari beton, bahan-bahannyo murah didapek dan murah pulo haragonyo. Kini, kasadonyo maha,” Tan Baro masih mangecek surang. “Iko pambunuahan barancana mah, Tan. Kalau harago kaparaluan iduik awak maha dan indak tabali lai, tantu ciek-ciek di antaro awak ko mati kalaparan. Kalau urang-urang bansaik bantuak awak ko lah mati, tantu tingga urang kayo-kayo se lai. Di situlah negara ko barubah nasib dari bangsa nan bansaik manjadi bangsa kayo. Karano urang nan iduik adolah nan kayo-kayo se,” Angah Piyan mulai bukak suaro. Ruponyo barita ‘Singgalang’ soal naiaknyo harago-harago kaparaluan iduik tu nan mambuek saluruh tamu lapau Uwo bantuak urang kamatian. Lai nio mangecek atau mamakiak bagai, tapi indak tau, ka sia harus mangadu. Ka de-pe-er-de, ka gubernur, ka de-pe-er pusat, atau ka pamarentah pusat? Rasonyo indak ka didanga. Harago barang-barang tu kan taruih juo naiak. “Bae bana-lah! Nan punyo gigi, gigik taruih sampai takulayak. Nan punyo ladiang tajam, catuak bana-lah! Naiak-an se harago barang-barang tu kasadonyo! Baraa talok,” kato Kari samakin emosi. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.4/1226 - Release Date: 15/01/2008 18:19 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
