“Baa, Tan. Apo barita angek kini?” Baitu tanyo Angah Piyan nan baru masuak lapau pagi kapatang. Tanyo saroman itu saolah-olah manjadi tradisi, sahinggo satiok nan mambaco surek kaba musti siap, kalau ado tanyo dari kawan nan baru datang.
Tan Baro nan sadang asik mambaco surek kaba ‘Singgalang', ndak lansuang manjawek. Diturunkan surek kaba saketek, sudah tu mamandang ka Angah Piyan nan baru masuak. Angah sadar, kabiasaan Tan Baro adolah indak bisa digaduah, kalau sadang sarius mambaco. Karano itu, dipabiakan sajo konconyo tu manyalasaikan bacaannyo. “Huhhh...., Nan angek indak ado doh, Ngah. Barita-barita hari kini kabanyakan soal parasaian dunsanak awak di kampuang,” jawek Tan Baro. “Parasaian apo tu?” “Saumua-umua, kinilah harago pupuak sampai duo ratuih ribu sakaruang atau kalau awak bagi dalam sakaruang tu limopuluah kilo, mako samo jo ampek ribu sakilo. Satau ambo salamo ko harago pupuak tu cuma saribu duo ratuih sakilo, jadi naiaknyo ampia ampek ratuih parsen. Baa indak marasai dunsanak awak nan punyo sawah dibueknyo tu,” Tan Baro manjawek tanyo Angah nan tadi alun bisa dijaweknyo. “Apo, Tan? Pupuak sampai duo ratuih ribu sakaruang? Lai ndak salah danga ambo? Dari apo dibuek pupuak tu? Dari ameh?” Mak Pono nan takajuik mandanga kato Tan Baro tadi. “Jan tanyo ka ambo, dari apo dibuek pupuak tu. Nan jaleh, dalam barita surek kaba ko, pupuak Urea ampia duo ratuih ribu sakaruang dan itu tajadi di kampuang Mak Pono,” baleh Tan Baro. “Kalau di kampuang Mak Pono, biaso tu mah. Karano, kampuang tu ndak masuak peta!” Kari Garejoh mamotong. “Batoh, Kari. Ijan mancari lawan pagi-pagi bantuak ko,” kecek Mak Pono. Baitulah suasana lapau Uwo. Dalam sarius, tibo-tibo ado garah jo kucindan, itu lah biaso. Karano jo caro itulah komunikasi jadi jalan dan ota batambah lamak. Walau tadinyo Kari bantuak indak kanai se jo masalah mahanyo pupuak Urea, tapi inyo sabana prihatin. Kalau pupuak bantuak itu mahanyo, jo apo dibali dek urang tani lai. “Pupuak maha, harago bareh awak diatur dek urang manggaleh, indak buliah maha. Pamarentah bantuak indak bapihak ka urang tani. Maha bareh saketek, nyo buek operasi pasa. Nyo jua bareh impor murah-murah. Kasudahannyo, bareh awak indak laku. Dek awak paralu pitih juo, daripado bareh indak tajua, bialah dijua murah se. Prinsipnyo daripado tatungkuik, bialah taereang. Baitulah satiok taun di nagari awak nan gemah ripah loh jinawi ko. Patani awak hanyo di nomor anam baleh se, jadi palengkap panderita satiok wakatu,” Mak Pono indak tahan lai untuak mangecek. Sakali mangecek, kalua bantuah abu vulkanik dari Gunuang Marapi. “Manuruik ambo, pamarentah tajam sabalah. Bak kecek Mak Pono tadi, katiko harago bareh maha, diadokan operasi pasa, sahinggo harago bareh awak turun pulo. Tapi, katiko pupuak maha, nan baliau tu anok-anok se. Kadang-kadang bantuak urang indak tau. Kok ditanyo wartawan, ado pulo nan manyalahan pihak lain. Padohal, baliau-baliau tu duduak se di balakang meja,” kato Tan Baro. Espe St.Soeleman [Singgalang] No virus found in this outgoing message. Checked by AVG Free Edition. Version: 7.5.516 / Virus Database: 269.20.7/1284 - Release Date: 17/02/2008 14:39 --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur & Lokasi anda pada setiap posting. - Hapus footer & bagian yg tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda pada Google Account di: https://www.google.com/accounts/NewAccount?hl=id Agar dapat melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
