Assalaamu'alaikum wa rahmatullahi wa barakaatuhu Ambo kiriman baliak tulisan jo diskusi di palanta awak ko sataun satangah nan lapeh pakaro Minyak di Nagari awak ko. Insya Allah kalau paralu biko ambo uleh pulo saketek lai..
Wassalamu'alaikum Lembang Alam MINYAK DI SINGKARAK (3) Jan 26, '07 3:21 AM for everyone From: Muhammad Dafiq Saib <[EMAIL PROTECTED]> To: [EMAIL PROTECTED]; Hayatun Nismah Rumzy <[EMAIL PROTECTED]> Cc: Sjamsir Sjarif <[EMAIL PROTECTED]>; Lapau <[EMAIL PROTECTED]> Sent: Friday, May 26, 2006 9:16:58 AM Subject: Re: [EMAIL PROTECTED] Minyak di Singkarak Assalamu'alaikum wa rahmatullahi wa barakaatuhu Jadi baa nan sabanano, apokoh minyak di Sijunjuang lai ado harapan untuak di manfaatkan dek awak? Tantu timbua tanyo sarupo itu jadino. Apo lai saolah-olah iko marupokan sasuatu nan dirahasiokan salamoko, lalu rahasioko kini dibukak dek mantan pagawai Caltex tu. Kabaradoan minyak di blok Singkarak nan di test dek Caltex di sumua Sinamar-1 bukanlah marupoan rahasio negara, atau rahasio parusahaan Caltex bagai. Satiok daerah nan ado kamungkinan manganduang minyak, alah di kapling-kapling dek Pertamina, nan sasudah itu di tawarkan ka perusahaan-perusahaan minyak untuk manaliti, untuak mangeksplorasi, untuak mausahokanno, di bawah suatu perjanjian karajo samo babagi hasia. Satiok perusahaanko diagiah wakatu untuk bakarajo di daerah nan diminatino, sasudah parusahaan itu mambayia pitih persetujuan ka nagara cq Pertamina (kini BPMIgas), dan sasudah manandotangani kontrak persetujuan ka babagi hasia taditu (PSC= production sharing contract). Mako perusahaanko ka mambagi-bagi jangko wakatu untuak mangarajoan daerah itu (di sabuik biasono 'block') muloi dari mampalajari, mangarajoan panalitian seismik, manggali sumua, mantest kabaradoan minyak atau gas bumi, mandeliniasi atau manaliti bara bana gadang potensi minyak saandaino minyak basuo, mambuek fasilitas untuak mamproduksi, tarakhir baru mamproduksi. Jangko wakatu kontrak dibuek kondisional, sakian taun untuak manaliti, sakian taun sampai mambor sumua, sakian taun kalau minyak basuo dan sataruihno-dan sataruihno. Katiko masiang-masiang wakatu tadi talampaui, dan saandaino kasimpulan parusahaan 'block' itu indak manariak, mako daerah itu dibaliak-an baliak ka Pertamina / pamarintah. Sudah itu daerah itu bisa sajo ditawarkan baliak ka perusahaan nan lain. Hal sarupo iko nan tajadi di dunia minyak, ciek block dikarajoan perusahaan nan satu sasudah nan lain baganti-ganti. Kontrak PSC akan panjang kalau minyak barasia di tamukan. Tapi adokalono baru sampai langkah kaduo, jo mangarajokan panalitian seismik alah bisa diambiak kasimpulan ado atau indak-adono 'prospect' di daerah itu. Saandaino indak ado, tantu perusahaan cako indak ka amuah maabih-abihan pitih untuk karajo barikuikno. Sabalun itu, katiko manando tangani kontrak, perusahaan musti mambuek persetujuan ka Pertamina (commitment), biasono sampai ka manggali sumua eksplorasi di block tadi. Mako, katiko sumua eksplorasi negative hasiano, sasudah dievaluasi ulang matang-matang, daerah tu di baliak baliak. Bisa sajo minyak basuo, tapi dek etong punyo etong, indak ekonomis jatuahno, tatap juo block sasudah jatuah tempo, di baliak-an baliak ka Pertamina. Singkarak Block ko alah di baliak-an Caltex sajak balehan taun lampau. Aa sajo karajo Caltex salamo barado disinan, jadi pangatahuan umum dek urang-urang 'minyak'. Itulah sababno ambopun lai pulo tau saketek-saketek. Jadi indak paralu mancari angku Karsani bana untuak mananyoan hal itu doh. Baliak ka pakaro kabaradoan minyak nan alah ditest Caltex, nan dikecek-an daulu dek Caltex dianggap indak ekonomis dek arago minyak murah. Tapi kini jo arago minyak 75 US dollar sa barrel? Elok awak bacarito fakta sacaro sistimatis. Minyak itu insya Allah alah tabukti ado. Banyakno, manuruik pakiroan sasudah dilakukan pangujian, sakitar 500,000 barrel di tambah jo gas alam. Apo aratino? Jumlah 500,000 barrel tu memang taetong saketek, manangguang. Itu baru hasia interpretasi tahap partamu. Paralu evaluasi labiah lanjuik untuak mangatahuino labiah jaleh jo mambor sumua deliniasi istilahno. Jumlahtu bisa-bisa batambah, bisa juo bakurang dari pado itu. Kalau kito asumsikan, memang sakitu adonono, harus awak sadari pulo bahaso jumlah taditu adolah jumlah minyak di dalam paruik bumi di bawah sinan, dan bukan kasadono bisa di kaluaan atau di produksi. Ado istilah Initial Oil In Place, ado istilah recoverable oil. Nan recoverable ko tagantuang jo sifaik fisika minyak biasono maksimum sakitar 50% dari jumlah mulo-mulo. Kecek-anlah kini iyobana 50% bisa diambiak, bararati sabanyak 250,000 barrel. Bararati saarago 75 x 250,000 dollar ado pitih talatak didalam sinan. 17.5 juta dollar. Kecek-an pulo ado gas nan saarago sakitu pulo labiah kurang. Bararati 35 juta dollar. Kan iyo banyak tampakno du? Jadi baa carono? Nan partamu adolah mandapek-an 'block' tu baliak ka BPMigas namono kini, badan pamarintah nan maatur karajo samo industri perminyakan, untuak mambuek kontrak bagi hasia. Baru manokok pintu sajo, awak alah musti mambayia. Bara awak musti mambayia, kurang jaleh di ambo. Sudah itu manandotangani kontrak bagi hasia. Isi kontraktu adolah mambagi hasia barasiah jo pambagian 85% untuak pamarintah, 15 % untuak nan mausahokan. Kecek-an sudah itu awak alah yakin sajo jo evaluasi Caltex tahun 1984, indak ado karajo seismik untuak evaluasi labiah jauah. Kecek-an awak alah ingin langsuang sajo nak mamproduksi minyak jo gas tu. Untuk maambiak minyak nan sabanyak itu, paralu di bor sumua tambahan. Sumua deliniasi atau nan bisa jadi sumua produksi sakali. Kito etong minimum sajo, ampek buah sumua lai. Ongkos manggali sumua sadalam 1800m sampai 2000 meter paliang kurang 3 juta dollar ciek Jadi 12 juta dollar. Ditambah sasudah itu jo biaya produksi. Jo ampek sampai limo buah sumua tu kecek-an awak dapek mamompa sakitar 1000 barrel saari. Lamo mamproduksi bararati indak kasampai sataun doh, alias sakitar 250 hari sajo. Nan labiah barek adolah mambuek fasilitas panampuangan minyak jo gas. Kalau pipa pulo nan kadielo dari Sijunjuang ka Taluak Bayua di Padang, raso-rasono indak ka takajaan di hasia nan kadiambiak doh. Harus dibuek tangki panampuangan dakek sinan. Harus dipikiakan caro maangkuikno ka tapi lauik. Ongkos mambuek tangki jo pengangkutan ka tapi lauik, jo tangki panampuangan pulo ciek lai di tapi lauik, atau kapa panampuang distand by kan disinan, iko nan ka labiah gadang cakakno. Iko indak di domain ambo lai do maetong biaya pambuatan tangki, alaik transport dan sabagaino tu. Tapi takok uok-uok ambo, alah ka mandakek-i angko 35 juta juo kasudahanno. Sainggo rasono iyo indak cerah bana prospekno doh. Ka pai ampok pulang aban sajo jadino. Aratino ka sarik mancari partner, perusahaan minyak nan kaamuah manyisiah-an pitihno mamodali karajoko. Baitu pulo dari fihak pamarintah. Kalau jo etongan sarupo diatehko, rasono pamarintahpun indak kayakin amuah malapehan karajo di blok Singkaraktu. Tapi antah lo lah, sia tau ado nan punyo naluri bisnis nan labiah ebaik. Satu info tambahan, bahaso minyak hasia test di sumua Sinamar-1 nan dominan, dari ciek lapisan adolah condensate. Iko jenis minyak ringan sangaik, hampia sarupo jo bensin nan dipakai untuak oto, nan indak paralu panyulingan barek lai doh. Samantaro dari lapisan nan lain minyak bumi biaso nan paralu disuliang. Paralu dibao ka kilang. Baa kok nan condensate sajo diproduksi? Bisa juo. Tapi tatap paralu fasilitas pandukuang produksi sarupo tadi juo. Baa kiro-kiro? Lai nan kalanteh angan mamuloi usao sabagai Minang Oil? Wassalamu'alaikum, Lembang Alam ----- Original Message ----- From: "Sjamsir Sjarif" <[EMAIL PROTECTED]> To: "Hayatun Nismah Rumzy" <[EMAIL PROTECTED]> Cc: "'Sjamsir Sjarif'" <[EMAIL PROTECTED]>; "Lapau" <[EMAIL PROTECTED]> Sent: Wednesday, May 24, 2006 10:58 AM Subject: Re: [EMAIL PROTECTED] Minyak di Singkarak > Ambo porowaikan barito ko baliak ka Lapau mudah-mudahan Angku Asnawi Bahar > tu dapek mancaliak namo Angku Karsani Aulia di Lapau dan dapek > mahubuanginyo. Kok ado Rang Lapau nan tahu jo Angku Asnawi Bahar tu tolong > sampaikan jo saluang, karano baiak Angku Asnawi maupun Angku Karsani indak > tadaftar di Lapau. Langkah di kito mampatamukan. > > Tarimo kasih Bundo Nismah. > Salam, > -- MakNgah Tags: email lamo edit delete 0 comments share MINYAK DI SINGKARAK (2) Jan 26, '07 3:19 AM for everyone From: Muhammad Dafiq Saib <[EMAIL PROTECTED]> To: [EMAIL PROTECTED]; [EMAIL PROTECTED] Sent: Thursday, May 25, 2006 8:06:29 AM Subject: Re: [EMAIL PROTECTED] Minyak di Singkarak Assalaamu'alaikum wa rahmatullahi wa barakaatuhu, Manariak nan dicaritoan dunsanak awak Yulnofrins Napilus ko. Bialah ambo ulang carito nan panah ambo singguang saketek pakaro 'industri perminyakan' ko. Minyak, nan diyakini dek ilimu pangatahuan moderen adolah barasa dari zat organic nan 'takondisikan' dibawah pangaruah tekanan, temperatur dalam kurun wakatu nan sangaik lamo, bajuta-juta tahun. Zat organic, jasad dari mukhaluak hiduik dalam jumlah banyak, terawetkan dalam jangko wakatu lamo tadi tu kabaradoanno umumno di dalam ayia, baiak di lauik ataupun di danau. Kumpulan zat organic tu awak tapek-i kini di dalam lapisan batuan sedimen namono dari jenis tanah liek atau lempung (bahaso Indonesiano) atau clay (bahaso inggirihno). Tampek nan favourit untuk basuono lempung organic tantulah di dasar lauik atau dasar danau. Dasar lauik atau dasar danau itu, dek pangaruh takanan sacaro bartahap, maharam juo no ka bawah, diimpok dek sedimen nan baru, nan dibao anyuik dek sungai-sungai dari darek, dalam jangko wakatu bajuta-juta tahun manumpuak jadi taba, bisa sampai baribu-ribu meter tabano, sarupo nan basuo di daerah Kalimantan Timur. Permukaan bumiko, indak pulono tatap sin taruih doh. Nan kini jadi lauiak, dek pageseran kulit bumi, dek takanan dari dalam paruik bumi, suatu katiko bisa talatak indak di lauik lai tapi ditangah daratan. Tampek lapisan sedimen nan maharam dalam jangko wakatu lamo tu di dalam industri perminyakan di sabuik urang 'cekungan' atau 'basin' dalam bahaso inggirihno. Dalam industri perminyakan ado tigo jinih lapisan batuan nan sangaik penting, indak buliah indak kabaradoanno. Nan partamo adolah nan disabuik urang batuan 'induak' , batuan sedimen organic tadi tu nan bapotensi untuk mambantuak molekul minyak bumi. Talatakno adolah didalam cekungan-cekungan. Mako cekungan-cekungan kolah nan mulo-mulo di cari dek urang perminyakan. Nan kaduo batuan reservoir namono. Minyak nan tabantuak dari zat organic tadi di dalam batuan induak, dek mangalami transformasi, barubah bantuakno, sifaikno, volumeno, takananno, bakacenderunganno untuak pindah atau bamigrasi namono mancari tampek nan ka bisa manampuangno. Tampektu disabuik sabagai batuan panampuang atau batuan reservoir. Sifaik dari batuan panampuang atau batuan reservoirko haruslah mampunyoi pori-pori atau porositas disabuik urang nan ka diisi dek partikel-partikel minyak nan bamigrasi taditu. Nan bisa manjadi batuan reservoirko misalno batu pasia. Jarak migrasi ko bisa dakek, bisa jauah takantuang dari media nan dilaluino. Nan katigo nan paralu pulo ado adolah batuan panutuik di ateh batuan reservoir, nan kamalindungi supayo minyak cako amuah takumpua, indak bamigrasi sin no taruih sampai ka muko bumi, sudah itu tabuang hanyuik. Batuan panutuikko kabalikan dari batuan reservoir, justru musti nan kedap ayia, nan impermeable, nan indak maluluihan cairan saketek juo. Batuan nan bisa jadi batuan panutuikko misalno adolah batuan lempung pulo. Di nagari awak Sumatera Baraik, kabaradoan cekunganko sangaik terbatas. Itu nan disabuik dek dunsanak awak tadi, dek karano daerah nagari awak itu mampunyoi ciri kegiatan tektonik nan aktif. Dalam volume ketek ado juo cekungan itu, sarupo cekungan Ombilin, nan talatak di tangah duo sisi 'gunuang' dan disabuik 'intra mountain basin'. Di dalam cekungan Ombilin tu ado sedimen lauik (marine sedimen), dek urang geologi disabuik formasi Ombilin (formasi ko adolah kumpulan batuan sedimen nan sa umua geologi). Formasi Ombilin ko sayangno indak taba. Di dalam basin nan samo ado pulo formasi lain nan barasa dari sedimen danau, kami sabuik formasi Sangkarewang, nan basuo di daerah Sijunjuang, Tanjuang Ampalu. Sifaik dari sedimen danauko biasono relative labiah kayo jo zat organik. Ikolah nan nan dipakiroan dek ahli-ahli perminyakan Caltex di awal tahun 80an nan mungkin punyo potensi di daerah Sijunjuang tu. Dan tabukti, memang iyo ado, sarupo nan basuo di sumua Sinamar-1 nan mareka karajoan tahun 1984 tu. Walaupun jumlahno indak banyak. Wassalamu'alaikum, Lembang Alam (ambo sandiri malakukan pemetaan untuak thesis geologi di Sijunjuang tu di taun 1978) ----- Original Message ----- From: "Yulnofrins Napilus" <[EMAIL PROTECTED]> To: <[EMAIL PROTECTED]> Sent: Wednesday, May 24, 2006 7:08 PM Subject: Re: [EMAIL PROTECTED] Minyak di Singkarak > Jika suatu daerah terlalu banyak patahannya, kemungkinan minyak utk 'tercebak' dalam lapisan-lapisan kulit bumi yg beragam jenisnya dibawah sana sangat kecil. Tetapi bukan berarti tidak ada sama sekali. Krn dia telah 'bocor' melalui patahan2 tsb yg terjadi bbrp ribu bahkan jutaan tahun lalu. sepanjang waktu hingga kini, dalam skala mm, cm ataupun lbh besar per tahunnya. > > Daerah kita Sumbar termasuk yg paling sulit dipetakan secara Geologi. Oleh karena itu, waktu tugas akhir, mahasiswa geologi asal Minang di ITB tidak ada satupun yg berani ambil tesis tugas akhir ke Sumbar, termasuk saya...:D Biasanya S2 keatas lah yg berani kasih analisa ttg daerah Sumbar. Tags: email lamo edit delete 0 comments share MINYAK DI SINGKARAK Jan 26, '07 3:18 AM for everyone From: Muhammad Dafiq Saib <[EMAIL PROTECTED]> To: [EMAIL PROTECTED] Sent: Wednesday, May 24, 2006 2:18:31 PM Subject: Re: [EMAIL PROTECTED] Minyak di Singkarak Assalaamu'alaikum wa rahmatullahi wa barakaatuhu Tahun 1984, Caltex mambor sumur eksplorasi Sinamar-1 di blok 'Singkarak' namono, nan talatak labiah kurang 15 km ka arah timur dari Danau Singkarak, di daerah Sijunjuang. Sumua ko banamo Sinamar-1, jo kadalaman sakitar 3000m. Lai basuo lapisan batu nan di pakiroan manganduang minyak. Caltex malakukan pangujian untuak mangatahui kamampuan mangaluaan minyak lapisan batuan nan manganduang minyak tu dan barhasil. Ado babarapo buah lapisan nan diuji, ado nan barasia, mangaluakan minyak bumi ado nan indak barasia. Duo dari test tu mangaluaan minyak bumi jo gas dan condensate jo gas. Gas manganduang CO2 sakitar 40%, taetong masih lumayan elok sacaro industri. Minyak bumi dalam kuantiti labiah saketek, tamasuak minyak ringan (36 deg API) dan condensate saketek labiah banyak, 60 deg API. Kamampuan mamproduksi sakitu itu dianggap ketek. Ahli reservoir mampakiroan cadangan minyak nan ado di dalam paruik bumi sumua Sinamar-1 sakitar 500,000 barrel sarato gas sakitar 27 BCF, jumlah nan indak talampau banyak. Minyak jo gas tu barado dikadalaman sakitar 1800m. Kalau ado nan baminaik untuak mamproduksi caro ketek-ketek, kok alun talambek, memang cukuik manariak tu. Cubolah! Wassalamu'alaikum, Lembang Alam Tags: email lamo edit delete 0 comments share DAERAH PENGHASIL MINYAK (2) Jan 26, '07 2:59 AM for everyone From: Muhammad Dafiq Saib <[EMAIL PROTECTED]> To: [EMAIL PROTECTED] Sent: Saturday, July 16, 2005 9:29:54 AM Subject: Re: [EMAIL PROTECTED] Daerah Penghasil Minyak, Alami Krisis BBM Parah Assalamu'alaikum wr.wb., Bialah ambo bukak-an 'rasio' nagari awak ko ciek lai. Mauruih minyak sajak dari dalam paruik bumi untuak sampai kalua tu sabanano indak bagai sarik-sarik bana do. Tapi iyo paralu pokok, paralu pitih nan gadang jumlahno. Ikolah nan salalu dikamukoan dek pamarentah awak untuak maijinkan modal asiang sarupo Caltex, sarupo Total datang bakarajo ka nagari awak. Sabab usaoko bak kecek awak dalam bahaso Indonesia 'padat modal'. Padohal ado contoh dari Cino, dari Thailand, dari Malaysia, baa mareka mangalola kontrak pangarajoan eksplorasi tu supayo labiah imaik, supayo labiah ketek biayono. Mareka sandiri mangarajoan sasudah sakian taun bakarajo samo jo modal asiang tu. Cino nan sangaik superstitious, nan picayo jo angko, jo fengshui, jo sagalo macam tadbir, mamiliah tanggal 8, bulan lapan, taun lapan puluah lapan untuak manyarah tarimoan karajo modal asiang tu ka tangan mareka surang. Urang asiang cukuik tingga ciek atau baduo sajo lai sakadar untuak manjagoi dari dakek. Tapi mareka iyo indak ado korupsi (mungkin sangaik minim) sainggo indak ado komplain dari nan punyo modal do. Banyak manfaaik bagi mareka sudah itu. Samakin ahli mareka, samakin barani, samakin picayo diri dalam mauruih minyak bumi tu. Kini Cino alah banyak nan datang manggantian / mambali parusahaan Amerika di nagari awakko. Itu pulo nan ditiru dek PTT Thailand, sabab mareka sadar bana bahaso minyak mareka indak banyak. Malaysia baitu pulo, labiah barani dalam barundiang jo pamodal asiang. Petronas Carigali (carigali, cari jo gali = bahaso Malaysia untuak eksplorasi) alah lamo go international, alah manapa ka nagari-nagari Afrika jo Timur Tengah. Samantaro awak sangaik lamah. Mulo-mulo mungkin ado urang nan cukuik kritis, cukuik njelimet, tapi digaretak-i no diurang saketek, diumbuakno jo jalan-jalan ka Houston, ka Paris, layua lidah panjabaik urang awak. Ambo nan alah labiah saparampek abaik bakarajo di dunia minyakko maraso mariangik mancaliak praktek-praktek sarupo iko. Di kantua ambo kini labiah duo ratuih urang jumlah urang asiang, sasuatu nan sangaik bakalabiahan. Padohal tanago awak sabanano cukuik mampu. Tapi kaputusan kan dari ateh datangno, aa nan ka dayo di awak. Wassalamu'alaikum wr.wb., Lembang Alam ----- Original Message ----- From: "boes" <[EMAIL PROTECTED]> To: <[EMAIL PROTECTED]> Sent: Saturday, July 16, 2005 9:02 AM Subject: Re: [EMAIL PROTECTED] Daerah Penghasil Minyak, Alami Krisis BBM Parah > wa alaykum salam Dave: > > minyak alias ameh itam memang digiloi dek sia nan > bakuaso.sampai ado filosofi tantang iko: negara nan mampu manguasoi > minyak, maka merekalah nan akan manguasoi dunia. > (nan ambo danga di bumi iraq tu ado sejenis minyak nan sangaik tinggi > kualitasnyo nan indak ado di tampek lain) > > mancaliek ruang karajo Dave di maso dulu, iyo runyam mato > ambo jo map² logging; gambar kulik tanah dll. > jadi ambo maklum kalau negara awak masih alun bisa > berdikari untuak mamproses minyak ko. > diparalukan bantuan teknologi tinggi saroman foto satelit dll > supayo mampaketek kegagalan dalam ma eksplorasi bumi ALLAH ko. > > tarimo kasi Dave, lah ma angkek 'cukilan' ambo manjadi carito minyak > jo latar bulakangnyo. mudah²an awak bukan tamasuak urang nan > mubazir dalam pemakaian bbm. Tags: email lamo edit delete 0 comments share DAERAH PENGHASIL MINYAK? Jan 26, '07 2:58 AM for everyone From: Muhammad Dafiq Saib <[EMAIL PROTECTED]> To: [EMAIL PROTECTED] Sent: Friday, July 15, 2005 10:42:49 PM Subject: Re: [EMAIL PROTECTED] Daerah Penghasil Minyak, Alami Krisis BBM Parah Assalamu'alaikum wr.wb., Angku Boes, Bacarito pakaro minyak pulo lah awak saketek. Maetong cadangan minyak nan ado dalam paruik bumiko iyo murah-murah sarik. Murah, kalau awak tau dimensi nyato (dalam kanyataanno jo kamajuan teknologi kini, jo interpretasi seismik 3D dan sabangsono, jadi samakin jaleh), tau awak sifaik fisika batu nan manganduang minyak tu, bara pori-porino atau porositasno, bara taba batu nan manganduang minyak tu etcetera-etcetera, mako dapeklah awak maetong bara cadangan minyak. Sulik, dek tampek dimaa minyak mungkin ditamui samakin jarang, ado fenomena geologi lain nan alun bisa dibaco hanyo sakadar dari interpretasi data seismik taditu sajo. Ahli geologi jo ahli reservoir salalu malindungi diri jo paretongan 'mini', 'mode', maxi' dalam maetong cadangan minyak ko katiko masih taraf awal minyak tu basuo. Dan biasono, dek 'range' no cukuik gadang, asia akhir iyo indak jauah dari salah ciek antaro mini, mode maxi tu doh. Minyak bumiko sakali waktu iyo pasti abih, sabab awakno iyo indak bisa dipabaharui doh. Minyak bumitu tajadi dalam proses fisika kimia nan masono jutaan tahun. Sadangkan ano dipakai sakali langsuang abih. Satiok kali awak maisi bensin untuak kandaraan, dipakai bajalan, mako abih indak ado bakehno lai. Namun ahli-ahli eksplorasi jo bahaso mareka nan agak 'takabua' mangecek-an, untuak satiok barrel nan di pagunoan, musti di cari barrel nan baru. Cadangan musti ditingkek-an taruih. Katiko lahan paburuan minyak bumi masih lapang, 'katakaburan' sarupo iko lai tapanuahi, walau mancari minyaktu samakin jauah ka daerah-daerah frontier, katangah lauik basa, ka tampek-tampek nan samakin sulik. Itupun akhiano pasti ka abih juo. Kiniko alah muloi urang mancari minyak ka pasakitaran kutub bumi baiak nan di utara maupun nan di selatan, untuak mamanuahi ambisi manggati satiok barrel nan dipakai tadi tu. Nan di nagari awak Indonesia, masih ado 'cekungan' nan masih alun dieksplorasi, masih ado harapan untuak mancari nan masih tahandok. Nan ado kiniko, baiak nan ado di Sumatera, di Jawa, di Kalimantan Timur, di Irian, masih bisalah diproduksi untuak sakitar duo puluah sampai tigo puluah tahun lai, namun tantu jo tingkek produksi nan samakin bakurang. Caltex di Sumatera Tengah panah sakali waktu (sakitar akhia tahun 70an) mangaluakan sajuta barrel saari, tapi kini hanyo sakitar 450 ribu barrel lai. Kalimantan timur panah mamproduksi minyak sakitar 250 ribu barrel sahari di awal tahun 80an, kini hanyo sakitar 80 ribu barrel sahari lai tingga. Kini produksi minyak bumi awak di Indonesia sakitar sajuta barrel sahari. Masih ado lapangan-lapangan baru nan alun diproduksi sarupo Cepu di Jawa Tengah nan masih dalam pasalisihan untuak mauruihno. Samantaro konsumsi awak kabano alah labiah dari sajuta barrel saari (iko paralu etongan nan njelimet / transparan pulo). Urusan pamarintah awak jadi labiah sulik sabab 90 % minyak awak tu urang asiang nan mangarajoan (Caltex, Total, Unocal), nan babagi hasia jo pamarintah, hasia barasiahno 85 - 15. Dek urang-urang asiangko, minyaktu dijuano kalua, dima pitih nan ka capek dapek, muskipun sabagian ketek ado juo kaharusan mareka manjua ka pamarintah di dalam nagari. Sasudah dietong pokok (biaya operasi, nan jumlahno lumayan gadang pulo, sainggo hasi akhirtu bisa sajo tingga hanyo 65% di pamarintah) mako minyak miliak Nagara awak tu bukanlah 850 ribu barrel par hari kini. Samantarotu salamoko dalam mauruih industri parminyakan di nagari awak, pamarintah awak banyak tabayia maha dek boros, dek salah uruih. Sakitu sajolah dulu. Wassalamu'alaikum wr.wb., Lembang Alam Tags: email lamo -- M.D.Saib --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
