"Mancucuakan kayu bacupang" by : Jepe
Tadi siang manjalang sore ambo bajalan kaki kadalam rimbo di Sei Kebaro untuak mandata kayu alam nan masih tasiso dan bara potensi rotan nan masih ado sacaro umum, nan salamo ko dimanfaatkan dek masyarakat tempatan buek kerajinan rotan nan masih sederhana sajo baru produknyo yaitu mambuek karanjang along-along, tampek palatak sayua mayua jo kebutuhan sahari-sahari buek urang nan manggaleh babelok dari kampuang ka kampuang disiko tamasuak ka camp kami atau karanjang ko buek tampek buah sawit nan baru dipanen lalu dikumpuakan dalam karanjang rotan ko lah panuah kiri kanan dibaok jo sapeda motor katampek pengumpulan (toke ssawit) untuak ditimbang dan dijua masyarakat nan bakabun sawit. Itulah kegiatan ambo tadi, lah samacam resolusi lo dek ambo kok kalapangan baniekan bana,harus ikuik maambiak cabang olah tradisional "forester" bajalan kaki masuak hutan, ndak bisa ditampuah oto 4WD lai yo jalan kaki masuak hutan atau ka kampuang2 masyarakat badarai nan baru jalan satapak. Kalua dari hutan ambo jo karyawan camp ko duduak di tapi jalan tanah tampek oto parkir sambia maunjuakan kaki nan panek2 badan bakaringek aia mineral boto di daguak juo, dicaliak kompor ketek saganggam tangan, lai ado sinyal sagarih beteret-teret email masuak ka inbox, nan manarik dek ambo salah satunyo ungkapan si Andiko Sutan Mancayo sarupo ko "mode mancucuakkan kayu bacupang katanah, sungguah sarik, kalau indak tanago nan abih, yo kayu itu nan rangkah" Mambaconyo ambo nan lah rangkik-rangkik yo batambah sasak angok ambo, talalu dalam imajinasi ambo deknyo, raso ambo sadang duduak ko mancubokan kayu bacupang diujuangnyo ambo cucuakan ka tanah kareh tampek ambo duduak, yo sasak surang angok ambo deknyo itu alun mangarajokannyo lai baru mambayangkannyo sajo Ahaa iyo duo sajo kamungkinannyo jampang ambo nan lah litak bajalan ko mancubo mancucuakan kayu bacupang ko nan saruman cabang buek katapel tampek maikek karet sarawa kotok nabi jaman saisuak, takan ka takan kayu ko angok ambo nan kasasak Ambo cubolo mambayangkan dek tanago ndak ado, ambo ajak kawan ambo nan saduduak malapeh tarangah ko, jo sakuek tanago kami nan tasiso ko bakaokan juo mancucuakan kayu bacupang ko, ahaa nampak e indak kayu nan mahujam bumi bia tagaknyo nan kuek tapi cupang ko rangkah balipek duo data tanah Alah mah pren karajo sio sio mah mancucuakan kayu bacupang ka tanah kareh ndak bisa nampaknyo sumangaik nan ado didiri sajo karajo bantuak iko mah. Baa kok ka luluak nan lunak wak cucuakan, iko karajo sio2 juo mah, yo masuak kayu bacupang ko tapi ndak lamo tahannyo, kayu ko indak tagak tali dan kuek taganyo sabanta sajo lansuang miriang sudah tu sujuak katanah dek luluak indak talok manahan gaya barek kayu bacupang ko Jadi baa ndak sio2 karajo mancucuakan kayu bacupang ditanah kareh bisa tagak dan kuek, bantuak iko sajolah sanak yo jo niek nan sungguah2 wak karajokan nan sulik ko, kito gali lubang saleba cupang kayu ko agak dalam, lalu banamkan cupang ko ka dasar tanah nan digali, kalang jo batu diatehnyo antak2 stek bia ndak kuek tagaknyo sudah tu timbun jo tanah galian tadi, baonjak-onjak ria kito diateh tanah tu bia batambah padek, yo mantap tagak tali kayu bacupang ko, nah itu baru karajo ndak sio-sio ado landasan nan kuek kayu bacupang ko tagak e didasar tanah jaan dibuek atau dipasokan karajo ko dek sumangaik bakalabihan bana lah jaleh kayu ko bacupang nafasu gadang dicucuakan juo ka tanah kareh, kok lai patah cupang tu ndak baa, jampang mambaliak ka badan taantak lo dado dek ujuang kayu tabedo awak sakik nan dapek Onde mande..ambo sadang mangalai-ngalai maukua kasua lalok di camp, ha ha ha lah sasak dulu angok ambo mambayangkan mancucuakan kayu bacupang ko ka tanah kareh, bia indak panasaran ambo ko sobok kayu bacupang di lapangan bisuak yo ka ambo cucuakan ka tanah, baa bana raso e :) Tapi nan paliang pas nampaknyo kayu bacupang ko iyo untuak panjuluak buah nan agak tinggi nan indak tajangkau jo tangan, samisal mangga tatangga batangnyo tumbuah dilamannyo, nan cabang mangga ko condong kalaman awan, digapai jo tangan ndak sampai, manggako ranum2 tangguang nan bini sadang manganduang 5 bulan pulo akibaiknyo mangidam nan agak aneh pulo, mangga tetanggo ko lo nan Inyo kaninan (ndak baa do dari pado mangidam mancium baun bensin tapaso lo mambuka karburator sepeda motor deknyo ha ha ha), dipapanjang tangan lai jo kayu bacupang, pas tibo dimangga ujuang kayu nan bacupangko dipilin dirangguikan, nan mangga jatuah kalaman awak, diagiahkan ka bini nan mangidam tu..sabana riang gembira hatie, nan paruik maloyo-loyo ka muntah dapek mangga ko barubek lansuang bini awak deknyo,barakaik kayu bacupang lasuah maelo mangga tetangga nan condong karumah awak cabangnyo Lah mah ndak ambo bayangkan lai mancucuak kayu bacupang ko..mangalai-ngalai lai dikasua kok ka lai dapek sinyal sagarih ilang-ilang timbua Sei Kebaro, 21 Januari 2010 Sent from my BlackBerry® smartphone from Sinyal Bagus XL, Nyambung Teruuusss...! -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
