Assalamu'alaikum warahmatullahi wabarakkatuh, Niniak Mamak adidunsanak palanta nan mulia,
Andaikan buliah ambo ba andai-andai satantangan Etek ambo nan hilang kutiko malapor ka kantua Kodim Bukittinggi di maso akhir PRRI saisuak. Dulu pernah ambo lapeh caritonyo ka lapau ko sahinggo Mak Ngah mananggapi lewaik japri sahinggo basambuik salam antaro Mak Ngah jo Papa ambo nan kaduonyo dakek jo pak Imam (Buya Natsir,alm.). Banyak hal nan ambo ketahui tantang parjalanan PRRI di maso awal dari Mak Ngah dan diimaso akhir dari papa ambo. Tentang pengkhiatan nan berefek gadang kapado perjuangan ukatu tu. Dan tarimo kasih banyak juo jo Pak Jacky dan Pak Saaf nan menanggapi pulo lewat japri lo maso tu. Tanyo nan ka ambo ulang baliak satantangan Etek ambo nan ilang tu 1. Jikok Etek ambo pai lari maninggakan anak, suami dan keluarganyo pai jo tantara pusek atau OPR, apokoh masuak aka sampai usia tuonyo kini indak kainginan macaliak anak bujang surang nan ditinggakan saisuak masih ketek umua 2 tahun ? Ambo raso kemungkinan iko indak bisa dipacik. 2. Jikok Etek ambo nan malapor ka kantua tu sampai sanjo indak kalua2 lai tu, apokoh dianiayo bahkan mungkin dibunuah? Dima lo ukatu tu Tantara Pusek atau mungkin OPR maandokkan mayik liau? 3. Apo indak pernah ado penelitian tantang urang yang hilang di maso itu? Apo dek karano hanyo disabuik di buku sejarah sekolah hanyo sebagai pemberontak? Tanyo ko barangkali juo manjawek tanyo Da Andiko nan mananyoan apo iyo khawatir urang tuo nan baanak gadih rancak akan dipabagai2kan dek tentara pusek nan mandompleng lo OPR(PKI). Jawek ambo : Jankan anak gadih rancak, istri urang nan mambawok anak ketek sarato lo jo mintuonyo pai malapor se bisa hilang indak tau rimbonyo laih sampai detik ko. Banyak bana keingintahuan ambo satantangan hal iko. Nan jaleh apopun itu nan disabuik parang iyo banyak manimbulkan korban, jiwa, materi dan perasaan. Kadang kalo basobok ambo jo Abang ambo nan Mamanyo hilang ukatu nyo masih ketek tu, atau jo Mak Datuak ambo nan kini ubannyo lah mamautiah sadonyo tu, ingin bana ambo batanyo baa perasaan mereka nan kahilangan tu? Tapi salalu suruik sajo, dek mancaliak roman muko mereka sajo hati alah lintuah sorang sajo. Apolagi kini ambo punyo anak ketek pulo, jankan bapisah batahun, saharian karajo sajo sorenyo se ambo alah taragak. Lintuah hati maagak-i. Nyampang kalo ado Niniak mamak adidunsanak palanta nan tau jo Etek ambo ko kebaradoannyo, ciri-ciri liau nan dibaritoan nenek ambo : Roman rancak manih putiah, di kampuang kami adolah cewek tercantik dimaso itu. Tahun 1960 ukatu hilang tu umua liau baru 20 tahun. Namo liau Mardiana asal Desa Tapi kenagarian Tilatang Kamang Bukittinggi. Namun sayangnyo ambo indak punyo Kodak liau, baitupun di kampuang dek sariknyo iduik di maso sari tu. Banyak maaf Wassalam Rina, 33, batam (Just sharing mengenang dia yang telah hilang) -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe