Rina da Jepe, Roland jo Sanak palanta
Pagi dibukak jo langkah, manurun simpang nan tatumbuak di Rumah Sakik Achmad
Muchtar. Alah banyak urang ba siragam putiah lalu lalang. Jalanan mulai padek
dek anak sikola, turun naiak angkot. Dek raminyo, alah agak putiah jalanan dek
jilbab anak sikola. Di ayun langkah ka kida, manuju ka ngarai. Nan takana, nak
mancaliak bukti kesetiaan kabuik pagi jo marapi, di bulakang matoari mandaki
malu-malu. Alah agak lamo berpusing-pusing disinan, kodak kiri-kodak kanan,
ambo curitokan ka kawan sapajalanan, dimungko kito tahampa kini Koto Gadang,
nagari tampek lahianyo urang gadang.
Salasai basurah soal Koto Gadang, diurak selo di ayun langkah mandaki taruih ka
arah patuang Bung Hatta. Alah talewat tampek ko, di arahkan langkah ka Pasa
Bawah, mancaliak para pedagang mambukak galeh pagi. Bendi lalu lalang, baitu
pulo angkot, dari Pasa Banto nampak mulonyo.
Ndak jauah dari Pasa Banto, diarahkan kawan ka janjang legendaris, janjang nan
alah lamo manikam jajak, jajak anak nagari dari tigo luhak. Ambo curitokan,
janjang iko titik episentrum perjanjian anak nagari, disiko cinto mulai di
karang, dari siko juo cinto barangkek ka angku kali. Di janjang iko titik
pertemuan. Galak-galak manih kawan ambo ko. Kutiko kami mulai mandaki, ambo
suruah baliau ko mahetong jumlah anak janjang, iyokah bajumlah 40. Tapi alah
sasak angok dek mangetongnyo, indak batamu angko 40 itu, nan badan alah sampai
di puncak janjang, di bawah goba-goba nan bagonjong.
Sahabih sasak angok, diluncuakan langkah ka pasa lereng, disinan balirik urang manggaleh
seken, "Boutik" istilah kerennyo. Iseng-iseng kami ago, jeket bekas nan di
impor dari lua. Namun sayang haragonyo mulai maha, dek kapalo Ball kecek urang itu. Alah
lamo sigi manyigi, tatumbuak kami ka urang manggaleh bada kariang. Maco balang, maco aji,
ikan baledang jo sapek binguang, lamak tasusun si ikan siam. Ambo katokan ka kawan ko, jo
iko ambo jadi sarjana.
Alah tibo di jalan nan agak mandata, dilayangkan pandang ka los lambuang,
basususn urang manggaleh nasi kapau. Bakaluak tamusu jo usus, manggaretang si
dendeang kariang, barasok si gulai cubadak, sato pulo ma hao sirandang kariang.
Tapi dek ari masih pagi, yo ndak bajinguak doh. Di taruihkan langka ka ateh,
tatumpuak pandangan ka simpang raya, kasinan kini manuju. Alah duduak di dakek
steleng, jo galak manih urang lapau manyambuik, sambia batanyo, ka makan atau
minum sajo sanak ?. Oh nan kami kasiko mamak, yo ndak manjinguah mie abuih,
langkok sarato jo talua mato sapi, bakalinca jo dagiang gereng kariang, nan
mienyo, mi kuniang kasa, ba abuih jo sagalo bumbu, bapacah pulo talua di
dalamnyo. Nan minumnyo mak, kami yo nak nio Teh Talua, minuman adaik kalau
pulang kampuang, tolong piuahkan pulo limau kapeh salayang, nak jauah sagalo
nan anyiah, baitu jawab kami. Bagageh sakali urang lapau, bakucintang bunyi
dapua, mandasia bunyi kompor...ndak lamo alah tahidang Mie Abuih barasok-asok,
harum bateba sampai ka kaki jam gadang. Tataruang sakali urang lari pagi. Nan
ritual partamo ka manyantap mie abuih, di jangkau karupuak jangek di ujuang
meja, di cabiak palastik pambungkuihnyo, jatuah tatonggok karupuak, jatuah
lamak di uangguak mie, manggareok sakali galang-galang.
Alah salasai minum pagi, diarahkan langkah ka kampuang cino, sambia maurai
tambo Kurai, baa mangko pasa ateh mangko ado. Kutiko malangkah, mambulintang
jambatan limpapeh, mampatamukan benteang jo kabun binatang, disinan pajalanan
di langko'i. Diputa langkah ka Hotel Denai, basimpang jalan ka kida, disinan
langkah mandaki, mandaki taruih ka Benteang Ulando. Ndak lamo disinan, di
pandang pulo Bukiktinggi kutiko pagi. Salo manyalo, rumah jo kadai, langkok
sarato hotel jo ruko.
Dek lamak ota, alah sampi pulo kami di kabun binatang. Baru sajo masuak
kasinan, di suok manyambuik gajah, di kida buruang Merak manyusun bulu, nan di
mungko, tatumbuak pandangan ka anjuang rumah gadang. Nan rumah gadang ko sanak,
potongan Koto Piliang, gajah maharam guntiangnyo, bakaja-kaja paek maukia
dindiang, kaluak ba kalauak motif kaluak paku kacang balimbiang. Barangkiang
diantaronyo, langkok sarato jo tabuah larangan. Kok rumah mode iko bana,
mungkin Lareh Sungai Pua nan punyo zaman saisuak, iyo urang kayo balilik nan
kabuliah.
Salasai mamatuik-matuik rumah gadang nangko, diarahkan pulo baliak langkah ka
pasa ateh. Takajuik kawan ambo ko, tadi awak alah disiko pulo. Jo galak
sengeang ambo jalehkan, ikolah episentrum dari Bukiktinggi, Bukik Tinggi Koto
Rang Agam.
Salam
Andiko Sutan mancayo
