Assalamualaikum w.w. para sanak sapalanta, Batua sakali penjelasan bung Armen ko. Ambo alah acok kali bana manjalehkan soal pitih saribu rupiah ko dan kaitannyo jo Gebu Minang, sahinggo alah mulai latiah rasonyo. Gebu Minang tu nan tadiri dari duo unsur nan babedo walau takaik satu samo lain, yaitu YAYASAN Gebu Minang untuak manguruih sagalo nan takaik jo akuntabilitas pitih mamitih, nan kini dipimpin dek pak Ir Azwar Anas Dt Rajo Suleman, dan LEMBAGA Gebu Minang, nan dipimpin dek Mayjen Pur Asril H Tanjung. Salanjuiknyo silakan dibaco penjelasan bung Armen jo penjelasan ambo dalam thread sabalun iko. Untuak dapek gambaran tantang Gebu Minang sacaro umum, ambo cubo manjalehkan bana po nan takana sabagai barikuik, bahaso salamo 20 tahun usia Gebu Minang alah dilalui babarapa babak.
1) Ado babak sumangaik bakobar-kobar, antaro tahun 1990 - 1997, dek karano pak Ali Akbar Navis tahun 1989 mangirim surek ka tokoh-tokoh Minang di Jakarta, bahaso separo dari jumlah nagari di Sumatera Barat masyarakatnyo miskin, walau alah dapek Parasamya Purnagraha Nugraha tahun 1984. Antah dek karano takajuik atau dek karano malu, mako sacaro baiyo bana dicarilah baa bantuaknyo mawujuikkan gagasan nan dipanciang dek pak Harto tahun 1982 tu. Bayangkan, mancari bantuak baa bantuan dari Rantau untuak Ranah nan basifat lintas-nagari tu sajo indak dapek salamo salapan tahun ! Dalam babak iko, dapek saran dari bp drs Abdulgani Dt Sidubalang untuak mandirikan BPR-BPR. Saran ko disatujui, bukan sajo jo mambantu mambuekkan akta notaris, dan maurus badan hukum sarato izinnyo ka Departemen Kehakiman, tapi juo ka Bank Indonesia; mancarikan pinjaman modal dari BUMN; sarato mandidik personalia direksi sarato staf BPR, sadonyo perai, indak ado pungli sarimih juo bagai doh. Salain tu juo dapek ditabikkan babarapo buku tentang Minangkabau, antaro lain buku himpunan foto tentang alam dan manusia Minangkabau dek fotografer kondang nan dikoordinir dek bung Ed Zulverdi, nan terkenal sebagai 'Mat Kodak'. Sasaran mambuek 100 BPR, tapi akhirnyo nan bisa hanyo sekitar 40-44 buah sajo. Sasudah tu alah kehabisan nafas. 2) Babak kaduo sasudah 1997 sampai 2001, sawakatu krismon malando Asia Tenggara, tamasuak Indonesia. Banyak usaho bangkrut, karano daya bali marosot, urang indak mampu mambayia hutang. Sekedar tambahan catatan: sacaro pribadi jo tabungan ambo, ambo sato mambuek ciek BPR di Jakarta untuak manolong urang awak nan bausaho dalam bidang mambuek jeans di Cipulir. BPR ko bangkrut, bukan sajo karano banyak debitur urang awak ko nan indak mambayia, lari ka kakampuangnyo, dan karano direksinyo mangkorup pilih Rp. 200 juta, sahinggo tadangek ambo dibueknyo. Basamo jo babarapo kawan, ambo bausaho manyalamaikkan BPR nan ikuik ambo dirikan ko jo manambahkan 'fresh money', sahinggo tabungan pribadi ambo sabana kempes takarak. Dalam manambah 'fresh money' ko kaluarga ambo sadonyo menentang, tapi ambo tetap jo pendirian bahaso komitmen jo harago diri labiah penting dari pitih. Cuma sasudah tu ambo sabana kapok. Saham ambo di BPR nan alah diselamatkan tu ambo suruah jua dek anak ambo, kabatulan surang akuntan, sahinggo ambo lai tahereang sajo, indak tatalungkuik doh. Sasudah tahun 2001 tu hampia indak ado kagiatan mambuek BPR baru. Nan taruih dilakukan adolah mambina manajemen BPR tu, supayo bisa hiduik taruih. Walaupun baitu ado juo nan taseok-seok. Sababnyo samo : manajemen. 3) Babak katigo adolah antaro tahun 2001-2005, dalam Mubes III nan mamiliah pak Fasli Jalal jadi Ketua Umum. Dek karano soal pitih saribu-saribu dan mambuek BPR-BPR ko indak mungkin dilajuikkan lain, mako diputuihkan marevisi missi dari 'Gerakan SERIBU RUPIAH Minang' manjadi 'Gerakan EKONOMI DAN BUDAYA Minang'. Singkatannyo samo. Baitulah di bawah kepemimpinan pak Fasli Jajal sabana banyak kegiatan dalam bidang kebudayaan ko, antaro lain maadokan pameran buku Minang dima-dima. 4) Babak kaampek adolah Mubes IV Gebu Minang di Sawah Lunto. Anggaran Dasar dipabarahui. Program karajo didesentralisasikan. Tiok programm dipicayokan ka surang pengampu. Tanyato ado nan jalan ado nan indak. Nan bisa dicatat sebagai prestasi dari kepengurusan Gebu Minang di bawah pimpinan Mayjen Pur Asril H Tanjuang ko adolah prakarsa untuak maadokan KKM/SKM GM untuak marumuskan ABS SBK nan salain sacaro informal alah ditarimo sabagai identitas kultural Minangkabau, juo manjadi dasar organisasi Gebu Minang, sesuai jo Pasal 4 Anggaran Dasar. Karajo gadang ko bana-bana manguras tanago, fikiran, dan pitih. Karano ambo nan manjadi Ketua Steering Committee dari KKM/SKM GM tu, ambo sacaro pribadi sabana dipasokokkan dek kalompok nan indak suko. Tapi Allah swt babuek sakahandak-Nyo. KKM gagal total, tapi SKM GM bajalan muluih. Kini bukunyo alah dicetak dan alah dilewakan, dan ateh kabaikan hati para sanak kito nan jadi admin website pakguruonline, alah ado dalam bantuak e-book nan bisa diunduh di saluruah dunia laweh ko. 5) Babak kalimo adolah Mubes V bisuak di Padang Panjang, nan sadang disiapkan panitia. SC di bawah Sanak Amri Azis dan OC di bawah bung Khairul Umaiya. Baa bantuaknyo nanti, kito caliak malah baa perkembangannyo nanti. Ringkasnyo, supayo jang balanjuik juo salah sangko jo cimeeh nan sabana manyakikkan hati, ambo ulangi baliak penjelasan ttg Gebu Minang ko. Gebu Minang adolah organisasi para sukarelawan dari para perantau nan basifat lintas nagari, bakarajo jo tanago, pikiran, dan jo pitih surang, babantuak badan hukum, dan batangguang jawab sacaro organisasi ka Mesyawarah Besar. Indak ado dapek subsidi doh, baiak dari APBN atau dari APBD Sumbar. Kalau geraknyo indak salincah nan diharokkan harap dimangarati, karano panguruih juo harus mancari nafkah untuak pariuak nasi surang-surang. Ambo mohon maaf nan sagadang-gadangnyo kok talantuang dek naiak, talendo dek turun. Wassalam, Wassalam, Saafroedin Bahar Soetan Madjolelo (Laki-laki, Tanjung, masuk 75 th, Jakarta) Taqdir di tangan Allah, nasib di tangan kita. --- On Sat, 7/2/11, Armen Zulkarnain <emeneschoo...@yahoo.co.id> wrote: From: Armen Zulkarnain <emeneschoo...@yahoo.co.id> Subject: Bls: [R@ntau-Net] Pitih nan dikumpuakan Gebu Minang >>> Antaro Siamang jo Simpai To: "rantaunet@googlegroups.com" <rantaunet@googlegroups.com> Cc: "Saafroedin Bahar Kampuang Dalam" <saaf10...@yahoo.com> Date: Saturday, July 2, 2011, 1:45 AM Assalamulaikum wr wb Pak Saaf nan alah ambo anggap bagai urang gaek surang sarato angku, mamak, bundo sarato adi dunsanak sapalanta RN nan ambo muliakan, Ambo kiro pertanyaan mengenai kama painyo pitih nan saribu ko kutiko mulai dikumpuakan hinggo manjadi BPR-BPR nan tersebar di ranah minang sampai baa pertanggungjawabannyo alah acok bana diulang-ulang taruih, apolai sepanjang 2010 nan lalu iko menjadi salah satu bahan cimeeh nan dipakai untuak mendiskreditkan Gebu Minang itu sendiri. Antah karano ambo nan memang kurang tinggi basikolah atau daya tangkok ambo nan alah mulai bakurang pulo, sabab alah disabuikan baulang-ulang kali bahasonyo pengawasan dari sekian banyak BPR mantun barado dalam wewenang Yayasan Gebu Minang. Sadangkan banyak pihak mananyokan hal iko kapado nan barado di organisasi Gebu Minang nan kini disabuik Gerakan Ekonomi & Budaya Minang. Ado nan salah persepsi ambo kiro disiko, sabab urusan ka simpai namun ditanyokan ka siamang. Baa kok baitu? Sabab bagi urang nan jaleh bedo antaro simpai jo siamang ambo kiro indak akan sasek untuak bantanyo, sabab simpai jo siamang nan ko iyo saroman tapi indak samo. Tantu bagi nan urang awak nan jarang pulang ka kampuang apolai jarang bana (mungkin indak pernah pulo), tantu indak lo jaleh apo beda antaro simpai jo siamang. Baitu pulo dengan Yayasan Gebu Minang jo Gerakan Ekonomi & Budaya Minang (Gebu Minang) nan kini, ambo kiro banyak pulo nan indak tahu. Nan tabedo, indak tahu namun sangan pulo mananyo. Nan labiah cilako, batanyo pulo urusan siamang ka simpai, tantu agak sangan pulo siamang nan ko manjalehkan sacaro rinci urusan dunsanaknyo nan saroman tapi tak samo ko. Ambo kiro, paralu bana pak Saaf manjalehkan siapo sajo nan barado di Yayasan Gebu Minang nan mengurus BPR mantun jo siapo pulo nan barado di Gerakan Ekonomi & Budaya Minang (Gebu Minang), sabab sasuai jo perjalanan yayasan jo organisasi nan ko, sarato lamonyo pak Saaf berkecimpung di organisasi Gebu Minang (dari Gerakan Seribu Minang hinggo ka Gerakan Ekonomi & Budaya Minang) sajak dulu hinggo kini, ambo kiro pak Saaf adolah urang nan sangat tapek untuak manjalehkan hal itu. Mungkin itu sajo tanggapan dari ambo nan mudo matah ko, maklumlah aka alun sampai, ilmu pun kurang pulo, banyak maaf. wasalam AZ/lk/33th/caniago Padang Simpai jo Siamang iyo saroman, baiak bantuaknyo, caro bapindah dari rantiang ka rantiang, dan lain sabagainyo Namun bedanyo sabana nyato, nan ciek sirah nan ciek lai hitam. primata jenis Siamang Assalamualaikum ww Sanak Chairul dan para sanak sapalanta, Walau thread Sanak ditujukan ka pak Darul, mungkin ado juo rancaknyo ambo sato manjawab apo nan Sanak tanyokan, karano kabatulan ambo sato sacaro aktif dalam Gebu Minang sajak jolong. Macam ko caritonyo. Sagalo sumbangan Rp. 1.000,- utk pembangunan Sumatera Barat melalui Gebu Minang ditaruihkan langsuang kapado BPR-BPR nan difasilitasi tagaknyo dek Gebu Minang. Jadi pitih tu indak balungguak di Gebu Minang doh. Untuak kaparaluan internal panguruih, dicari sumber lain, nan tantu sajo halal, antaro lain sumbangan/ badoncek. Pernah administrasi Gebu Minang ko agak kacau, karano kantua pak Azwan Hamir di Jl Gunung Sahari, Jakarta - nan mambantu administrasi - tapanggang. Sabagian dokumen musnah, untuang ado copynyo di anggota pengurus nan lain, sahinggo bisa dirapikan baliak. Ambo kenal jo sabagian gadang panguruih Gebu Minang sajak jolong, dan Alhamdulillah indak ado surang juo nan tipe NH doh. Pengelolaan keuangan dilakukan dek YAYASAN Gebu Minang sebagai badan hukum tersendiri, bukan dek LEMBAGA Gebu Minang nan dipiliah dan dibantuak dek Mubes. Dalam tiok kali Mubes, Yayasan ko manyampaikan laporan keuangan ka Mubes, nan alah diaudit dek akuntan publik. Ketua Yayasan ko kini Bp Ir Azwar Anas Dt Rajo Suleman. Khusus mengenai dana nan dikirimkan ka Gebu Minang sabalun iko dari sanak kito di Papua, tolong langkoki ambo jo data ttg ka sia dikirim, bilo dikirim, bara nan dikirim, kalau mungkin ado fotokopinyo. Akan ambo sampaikan ka Bendahara Yayasan Gebu Minang utk dicheck. Indak ado saham Gebu Minang doh karano Gebu Minang bukan perseoran terbatas (PT). Nan ado adolah saham tiok-tiok PT BPR tu surang-surang nan ado di bawah pengawasan Rapat Umum Pemegang Saham (RUPS). Sekedar tambahan, karano Gebu Minang ko adolah organisasi idealis dari para sukarelawan ( indak ado anggaran dan indak bagaji), nan bapaduli thd Sumatera Barat, kegiatannyo yo manuruik tasadionyo wakatu luang masing-masing panguruih. Biasonyo nan bisa aktif tiok wakatu adolah antaro 10-15 urang sajo. Kagiatan maningkek sabalun dan salamo Mubes. Ciri khas Gebu Minang nan mambedakannyo jo IKM-IKM adolah sifatnyo nan lintas-nagari. Jadi indak tabateh pado para sanak dari satu daerah sajo, karano tu mungkin labiah tapek manangani bidang sosial budaya. Memang itu nan diputuihkan dalam Mubes III th 2001, wakatu mamiliah pak Fasli Jalal sbg ketua umum, dilanjuikkan dek kapangurusan masa bhakti 2005-2010 di bawah pimpinan pak Asril Tanjung. Dlm Mubes V nan kadatang, SC di bawah pak Amri Aziz merencanakan membahas reposisi Gebu Minang utk manjawab perkembangan zaman. Apolagi dlm SKM GM Desember 2010 nan lalu alah disepakati visi Gebu Minang ttg ABS SBK, dan bukunyo alah salasai dicetak dan ditayangkan di internet dalam bantuak e-book dek website pakguruonline. Sagitu nan dapek dek ambo. Talabiah takurang mohon maaf. Wassalam, Saafroedin Bahar Taqdir di tangan Allah, nasib di tangan kita. -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
