Tayang ulang. Maaf bahaso Minangnyo asli Tilatang Kamang
From: rinapermadi [mailto:rinaperm...@gmail.com] Sent: Wednesday, March 24, 2010 11:31 AM To: 'rantaunet@googlegroups.com' Subject: SELEMBAR KENANGAN Assalamu'alaikum Warahmatullahi Wabarakaatuh, Selembar Kenangan By : Rina Permadi 'Pulang kini ko juo, indak buliah ikuik mangaji doh, ' kecek si Ustadz jo berangnyo. 'Tapi beko kanai berang wak Ustadz dek Apak kalo indak sato mangaji,' kecek si anak padusi ketek nan baru baumua 8 tahun tun nan babadan kiluih tu. 'Indak bisa ikuik mangaji kini do, sabalun kau baok pitih uang mangaji bulan ko, kini lah talaik mah, lah lewaik tanggal sapuluah,' batambah berang sang Ustadz. Salain anak padusi ko ado duo urang lih, kawan no nan kanai hariak dek Ustadz ko. Jo hati nan malu jo sadiah inyo kamehan Al Qur'an hadiah neneknyo nan indak ado kulik no laih. Bajalan basi-insuik kalua dari ruangan mangaji tu. Kawan-kawan samo gadang saparmainan mancaliak ka arah inyo jo hati ibo lo. Sampai di rumah no nan bajarak sapaimbauan dari Musajik tampek rumah mangaji tu barado, ditanyolah dek Amaknyo nan sadang sakik typus alah ampia sabulan. Mandakeklah ka amaknyo tu sambia manangih mangecek,' Mak... lai ado pitih tujuah ratuih limo puluah Mak? Wak ndak buliah dek Ustadz sato mangaji doh sabalun mambayia pitih mangaji tu.' Nan Amaknyo nan badan alah tingga tulang tun, tabik pulo ibo hati liau, basuruahlah anak gadih ketek liau ko batanyo kaleh Apak no. Turun dari tampek tidua Amaknyo nan sadang sakik tun, bagagehlah inyo mancari bapaknyo. Kironyo si bapak sadang manasah di balakang rumah, di dalam kamar mandi nan bakunci pintunyo. Kato Amak malu kito nampak dek urang jikok Apak kau manasah bagai. (Tok..tok..tok.) Paakk.,' si anak mamanggia bapaknyo.' 'Sia du? Kecek apak no di dalam kamar mandi, 'Upiak Pak..Upiak indak buliah mangaji di Ustadz doh.' Kalualah si bapak. Digendong anaknyo ko. 'Manga tadi di rumah mangaji? Tanyo si Apaknyo ko. 'Awak di suruah pulang dek Ustadz, indak buliah sato mangaji doh sabalun mambayia uang mangaji bulan ko, dek kini lah lewat tanggal sapuluah, jadi lah talambek,' isak si anak ko. Si Apak manurunkan anak no dari pangkuan no, lansuang Liau bajalan ka kamar, marosok-rosok saku sarawa nan tagantuang di baliak pintu kamar nan dari triplek tu. Indak ado tarosok dek Liau sirimih tio doh. Nan Amaknyo nan mancaliak an sen sadari cako tu, mangecek ka kaduo urang ko. 'Ndak mantun doh, ayam wak kan lai batalua juo, cubolah caliak ka kandang kok masih ado taluanyo nan bisa dijua ka lapau. Lapau Etek biasono lai ngamuah maambiak talua ka digalehan Liau.. huk..huk..huk ,' kecek si Amak sambia tabatuak-batuak. Bagagehlah si Apak maambiakkan talua ka kandang ayam nan talatak di manyampia di bulakang dapua di balakang rumah mereka. 'Ko ha ado tujuah buah, biaso no Etek tun maambiak bara ciek du? Tanyo si Apak ka bini Liau nan sadang sakik ko. 'Biasono saratuih limo puluah piah lai namuah Liau maambiak duh, suruahlah no pai ka Lapau kini ko juo,' sauik si Amak sambia batuak-batuak. Kadang-kadang damam Liau tinggi, talabiah jikok hari lah condong sanjo. Si Upiak ketek ko bagagehlah inyo bajalan mambaok talua ayam kampuang ka lapau Etek di dakek simpang jalan tun, sambia baharok gadang bisa dapek pitih pambayia iuran mangaji no tadi. Sampai di lapau kebetulan lai adoh Etek tun disinanduduak di lapau tun, dibaliak meja tampaik sagalo karupuak, panganan, kue-kue jo kacang tujin batungkuih karateh minyak bawarna-warni talatak di dalam toples-toples kaco batutuik sirah. 'Tek, kecek Amak mintak tolong maambiak talua ko, ado tujuah buah noh,' Kecek si upiak ketek tadi. 'Ndee.. Piak.. Etek baru maambiak talua lo baruh dari pakan kapatang. Masih banyak talua ayam di dalam karanjang, co lah caliak dek Upiak du, tumah tagantuang di dalam karanjang talua tun,' sambia manunjuak ka karanjang talua nan tagantuang di suduik lapau tu nan tabuek dari anyaman kawek nan bacat hijau tuo tun'. Kok nak ka iyo juo, lai buliah Etek bautang duluh, agak tigo ari laih ambiak pitih no kanyiak. 'Ndee Tek, pitih no kaparalu kini ko, bialah ditanyoan ka Amak duluh di Tek, mokasi banyak Tek, Assalamu'alaikum,' pamit si Upiak ka Etek lapau ko. Jo hati nan galau, inyo baliak ka rumah sambia masih mamakai baju kuruang nan dibuek an Amak no dari kain galeh urang di pasa Lereang Bukik. Baa lah kaka goah, talua indak laku doh, joa ka dibayia pitih iuran mangaji kuduh?," Kecek no dalam hati. 'Pakk. indak amuah Etek tun maambiak doh Pak, dek Liau baru lo maambiak talua dari pakan kapatang. Masih banyak talua di lapau liau kini du,"isak si Upiak nan mulai kadangaran lo baliak. 'Sudahlah Piak, bialah Apak mangecek jo Ustadz gau tu kuduh di Musajik,"kecek Si Apak mananangkan si bunsu ketek liau tun. Sabana no si Apak ko indak kapalang ibo ati Liau doh. Baa kok katimalangan bana nan sakaliko goh, indak ado sarimih tio pitih di saku doh. Tapi bialah, batin Liau, sabanta li lah kalua lo gaji den di tempaik karajo, tanggal satu kan lah ka ampia tibo,'kecek Liau dalam hati. Upiak tukalah baju gau tun Piak, bialah wak buek pamakan nasi talua ko agak duo buah, sambia bajalan ka dapua si Apak mulai mambuek talua dadar kocok nan di tambahan Liau jo giliangan nasi bagiliangan jo lado jo bawang supayo taba laweh dadar ko bekoh. Dek anak Liau balimo mangkonyo baakai baa harus cukuik samba untuak anak-anak Liau sado no. Pucuak ubi lai lo ado halaman balakang nan indak sabara ado tun, bauwokkan ka nasi nan sudah bakariah di dapua. Lah malam hari kutiko sasudah Insya sasudah maimami sumbayang Isya di Musajik di dakek rumah. 'Datuak,' sapo Apak katiko sumbayang Isya lah salasai di Musajik kutiko malam hari no. 'Yo Pak,' kecek Ustadz nan bagala Datuak ko.' 'Datuak kan lah ambo anggap anak ambo sajak Datuak mambantu di Musajik ko, tarutamo maaja mangaji di MIS kito ko. Kebetulan anak ambo si Upiak tadi pulang sabalun ukatu pulang. (dicaritoanlah a nan tajadi ka bakeh Ustadz ko). 'Ndee. Pak.. indak manyangko ambo doh sampai mode itu bana doh Pak, indak taniaik di hati ambo untuak mambuek Apak susah. Iyo lah baburuak sangko ambo ka anak Apak si Upiak. Ambo sangko Apak alah maagiah pitih kaleh inyo untuak pambayia iuran mangaji, dek inyo antah kok dipakai untuak balanjo-balanjo nan indak bakatantuan lo sangko ambo Pak.' Mintak maaf lah ambo ka Apak jikok iyo mantun caritonyo du. Apak iyolah banyak manolong ambo untuak bisa manatap di Musajik ko sambia ambo mancari hiduik di Nagari ko. Ndee Pak..indak tantu nan ka ambo sabuik laidoh.,' mambana Si Ustadz ko. 'Ndak mantun do Tuak, kok bisuak ambo usaoan duluh pitih tu dih, kan lai ndak baa doh Tuak? Tanyo Apak. 'Indak baa bagai doh Pak, sabana manyasa ambo manyuruah si Upiak pulang tadi tu, minta maaflah ambo Pak. 'Indak baa doh Tuak, kan itu lah tugas Datuak, ambo hanyo manyampaikan apo nan sabananyo sajo, supayo karajo Datuak indak tagaduah lo dek ambo. Samanjak Amak no sakik iyo samakin payah iduik ambo Tuak, mudah-mudahanlah Amak no lakeh siaik baliak, kok lai tolong Allah SWT ka kami. 'Yolah Tuak ambo baliak duluh, lamo naa lo ambo disiko ibo wak jo paja-paja tingga di rumah jo Amak no nan kadang kok lah malam ko batambah angek damam no, Assalamu'alaikum,' pamit si Apak. 'Waalaikumsalam warahmatullah,' jawek Si Ustadz jo hati nan gundah. (18 tahun sasudah tu) 'Ini untuk dihafalkan ya Mas,'kecek Si Ustadz sambia manyarahkan tulisan ijab qabul. 'O iya makasih Ustadz,' jawek si Mas 'Sabananyo Ustadz nak ka dilantik jadi Pejabat di Depag bisuak tumah jam sapuluah Piak, tapi dek lah janji jo Apak Upiak nan Ustadz anggap Apak sandiri, bialah urang manunggu di kantua Walikota tun. Ustadz raso sajam lai salasai acara Upiak bisuak tu mah. 'O mantun Ustadz, tarimo kasih banyak Ustadz, lah susah-susah lo,"kecek si Upiak nan kini lah nak kabatuka status ka jadi bini urang. 'Saya udah menganggap Bapak si Upik ini orangtua saya sendiri Mas, jadi saya mau saya yang menjadi Penghulunya besok di acara Nikah besok tu, walaupun acaranya hampir bertabrakan dengan acara pengangkatan jabatan saya di Depag besok, tapi tak apalah. Upiak sudah saya anggap seperti adik kandung saya sendiri, mohon Mas jaga baik-baik dia,"sambil bersalaman dengan Mas yang akan jadi pendamping si Upiak. (Didedikasikan untuk seorang Ustadz yang telah mengantarkan saya menjadi Juara MTQ di kampung, walau hanya setingkat kampuang, sudah sangat berharga bagi masa kanak-kanak dan mudah-mudahan pahalanya selalu terkirim dan tidak putus-putusnya, walau badan sudah tidak dikandung hayat, amin) Batam, March 24th, 2010 -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
