Komar,
Bener emang nyang ente bilang, masalah ini mustinya jadi urusan pemda.
Selaen daripada itu Bekasi inih kalu menurut aye gejala-gejalanya udah mirip
jakarta.
Disinih tumplek semua orang dari macem-macem suku dan budaya nyang
masing-masing ngasih warna, termasuk budaya sunda. Budaya sunda itu sendiri
kenape lebih marak disini itu kagak lepas dari pengaruh administratif
dimana Bekasi masuk Jawa Barat, ditambah lagi waktu mula-mula Kabupaten ini di
bentuk pan masih sedikit orang kita yang melek jadi mao kagak mao supaya
pemerintahan disinih jalan di kirim dah tuh pegawe-pegawe dari tanah
parahiyangan sonoh -- itu juga dulu banyak nyang pada kagak mao, soalnya mirip
tempat jin buang anak---.
Sekarang karena secara daerah ngikut ke Jawa Barat nyang emang dari sononya
mayoritas sunda makanya kemudian muatan daerah nyang diajarin di sekolah juga
Bahasa Sunda. Dari segi pembangunan budaya aye kira ini sah-sah aja malah jadi
bagus bisa nambain corak ragam budaya asli. cuman masalahnya posisi budaya
aslinya itu sendiri sekarang kaya gimana? Padahal secara kultur ama daerahnya
lebih deket ke Betawi. Catatan Sebelon Kabupaten Bekasi kebentuk, kata engkong
aye kita tuh masuk Kecamatan Jatinegara. Aye ngomong gini bukan berarti anti
ama budaya sunda, cuma aye pengen nich budaya kita jadi tuan rumah di daerah
sendiri ( begitu istilah kerennya) supaya orang-orang seabis kita nanti ngerti
akar budayanya.
Nyinggung masalah pembangunan budaya nyang ente urain, sebenarnya bisa enggak
sih kalu kita minta ama Pemda dalam hal ini Depdiknas Kab/Kota Bekasi supaya
bahasa daerah di kita diisi ama bahasa bekasi dan kesenian bekasi. Masalah
isinya, ya kita minta dinas budaya dan dinas parawisata untuk studi dan
ngumpulin orang-orang nyang ngerti banyak seperti rekan Away (Ali Anwar). Aye
kawatir lama kelamaan ikon-ikon di kita abis kagak ada bekasnya.
Sebenernya bukan topeng blantek aja nyang ilang, Ujungan (sejenis lomba adu
kekuatan dengan senjata rotan) sekarang udah kagak kedengeran lagi, padahal
dulu setiap abis 17 an di gedong tinggi (gedung Juang) itu nyang jadi tontonan
gratis, belon lagi ngadu bedug (festival bedug setiap habis lebaran) ala bekasi
sekarang dikit-dikit udah kagak kedengeran.
ngomong-ngomong ketemuan, nti siang jam 13.00 kalu kagak salah kan ada acara di
one center, Insya Allah aye rencananya mao dateng sambil nanyain sama si Away
dan tuker pikiran, disitu jugakan banyak temen-temen nyang duduk di PEMDA baik
di Kota/Kab yang notabene orang alumni kita seperti H.Entah orang Cibitung,
Suwarly , Junaedi, belom lagi SEKDA nyang baru kan alumni kita juga.
Salam
MIK
