Tah geuningan, tos dikawitan pabinihan jejer revitalisasi budaya dina wangun carita keur barudak sakola. Teraskeun atuh kang Zam ku midamel rarangkayna, eta anu 2 bae heula: "Budak Aman nyieun Website" sareng "Isah miluan mailing list". Namung rupina, upami masih migunakeun "Aman" sareng "Isah", jst, kedah aya kasuluyuan heula sareng anu gaduh hak cipta TP (sigana soal hak cipta ieu oge boa aya boa heunteu di aranjeuna teh, maklum US teh sok handap asor; boa-boa hak ciptana teh aya di penerbitna, upamai teu lepat mah GANACO, kitu penerbitna teh?).
Ala kuli hal, jejer usulan Kang Zam ieu mataholangna mah taya lian ti pentingna revitalisasi budaya. Lengkah kahijina sakumaha numutkeun Kang Chaedar Al-Wasilah, revitalisasi teh dikawitan ku ngahartikeun (deui) kalawan jero dugi nuwuhkeun kasadarankana (NKDNK) "icon-icon" atawa ayat-ayat kabudayaan anu aya ku tafsir anyar anu luyu keur pangubutuh nyanghareupan tangtangan kahirupan kiwari. Keur ngigelan jeung ngigelkeun jaman tea. Ayat-ayat kabudayaan tiasa mangrupi paribasa, carita rakyat, lingkungan, seni, jrrd anu kaasup unsur budaya (aya tujuh numutkeun Prof. Koentjaraningrat mah). Revitalisasi dina lengkah nu kahiji, upamana, nambut (tambutan anu teu kedah dibayar rupina) pamendak Kang Chaedar Al-Wasilah deui bae, pikeun ayat "herang caina beunang laukna". Ieu paribasa anu sok jadi kasang tukang usaha anu tambuh laku alias teu ngahasilkeun nanaon dina nguruskeun hiji hal (da palaur paketrok tea-emut ka kang Dudi), ku cara ditafsir-ulang, tiasa dipaparin tafsir anyar salaku "kasanggupan pikeun ngawangun komunikasi anu efektif". Ayat "goong nabeuh maneh" anu sok jadi panghalang US maju ka hareup da palaur disebut adigung, saur Kang Chaedar, tiasa ditafsirkeun salaku ngebrehkeun "kompetensi" (kabisa, kamampuh, jst) diri. Kitu saterusna, revitalisasi tiasa diteraskeun keur ayat-ayat kabudayaan sejena. Upamana, anggapan US salaku suku bangsa anu handap asor (sakapeung upami ningali kaayaan di terminal atawa barudak ngora anu keur ngobrol jeung baturna anu teu nolih ka sepuh anu ngalangkung, rada cangcaya kana ieu anggapan teh), tiasa dipaparinan tafsir-ulang anu luyu jeung masalah anu disanghareupan dina alam kiwari. Catetan khusus ngeunaan sikep "handap asor" US (elehan-mut deui ka Kang Dudi). Mindeng kaayaan ieu teh "dimanfaatkeun" ku seler sejen, bukti-buktina geus sakitu nembrakna, US kageser dina widang-widang kahirupan kayaning padagang kaki lima, supir angkot, tug dugi ka anggota DaPuR Daerah (pakait deui bae meureung jeung ayat "goong nabeuh maneh"). Anu ditataan di luhur teh nembe saemet revitalisasi tina salah sahiji dahan unsur budaya basa (khususna paribasa). Mangkaning sakitu nebana unsur-unsur budaya anu sadaya mibanda ayat-ayat sewang- sewangan. Upamana legenda atawa carita rakyat. Loba anu nuduh US mindeng kabeurangan dina sagala rupa kagiatan da eta cenah nurutan Sangkuriang. Lebah dieu, tetela penting aya usaha revitalisasi pikeun legenda Sangkuriang. Tong boroning legenda Sangkuriang, dalah "SILAS" oge kungsi aya anu nyawad, eta cenah ayana SILAS anu jadi "icon" Propinsi Jabar teh ngabalukarkeun US karunyaan teuing (sigana dina ngahartikeun SILAS teh ngarandeg ukur tepi kana Silih Asih). Geuningan, SILAS oge perlu direvitalisasi (saleresna parantos aya anu ngahartikeun-ulang SILAS dugi ka masing-masing unsur SILAS mibanda 17 harti anu luyu jeung tangtangan kahirupan ayeuna-tingali bae upamana "Kasundaan Rawayan Jati" yasana Abah Surya). Nyutat Kang Chaedar deui bae, lengkah revitalisasi saterasna taya lian ti "ngararangkay sacara babarengan" (NSB atawa perencanaan kolektif), sareng "ngahudangkeun kreativitas" (NK atawa pembangkitan kreativitas). NBS dilaksanakeun ku cara sosialisasi, jembarna nyalabarkeun informasi ngalangkungan naon rupa media anu aya sareng ngawariskeun ajen-inajen, utamina ngalangkungan dunya atikan. Dina raraga NSB teh biasa diayakeun diskusi, seminar, kongres, tug dugi ka konferensi, disagigireun tangtu bae atikan, khususna "wajib belajar" tea. Kalayan bahan-bahan jeung kurikulum tina hasil revitalisasi lengkah kahiji tea. Mataholangna, ngawangun kabudayaan teh moal bisa sosorangan, kudu ngarupakeun kahayang jeung prak- prakan balarea. Pamugi bae, naon anu mekar dina milist ieu kelebet kana ieu lengkah revitalisasi. Sangkan tambah buleud hasil revitalisasi lengkah kahiji, diperlukeun NSB. Upama NKDNK jeun NSB geus prak dilaksanakeun, gede harepan lahirna kaayan lingkungan anu tiasa ngahudangkeun kreativitas (NK). Sajaba ti eta, kawajiban pamarentah oge pikeun nyadiakeun fasilitas sangkan tumuwuh subur NK. Kreativitas, tuda eta pisan jero-jerona kabudayan teh. Kreavitas enggoning ngajawab masalah anu disanghareupan. Heunteu kreatif hartina sasayogian katinggaleun tug tepi ka paitna pisan, ludes sacara budaya. Midamel buku carita keur barudak sakola, kalayan anu jadi jejer ngarupakeun kaayaan lingkungan budayana anu dieuyeuban ku tilu lengkah revitalisasi di luhur, ngarupakeun hiji usaha dina ngawangun budaya ngalangkungan basa (oge seni). Cag, manAR --- In [EMAIL PROTECTED], "Z.A. Muslim" <[EMAIL PROTECTED]> wrote: > > Mung jalaran jaman tos robah, budaya agraris tos robih janten budaya > industri, rupina buku-buku sapertos TP peryogi diropea deui. Utamina mah > disaluyukeun sareng kaayaan masarakat urang Sunda ayeuna. Teu pamohalan > upami dina buku TP wedalan ayeuna jejer "Aman ngabedahkeun balong" teh > digentos ku "Aman (budakna Aman meureun ayeuna mah) nyieun Website > Cicalengka" atanapi "Isah miluan mailing list", jst. > > tansah, > zam > > ------------------------ Yahoo! Groups Sponsor --------------------~--> $4.98 domain names from Yahoo!. Register anything. http://us.click.yahoo.com/Q7_YsB/neXJAA/yQLSAA/0EHolB/TM --------------------------------------------------------------------~-> Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
