Nya karuuuhan ! Ting ceukeukeuk anu nareuleu, Ear budak araremprak, Ting cikikik nini-nini, Rame budak pada surak, Nareuleu burut si Lengser, Mani herang cara berenuk !
Si Lengser lumpat terus..... Eureun - eureun soteh, Inyana narajang tangkal jambe, Mani nilep, Lain tangkal jambe anu nilep, Tapi si Lengser ! Nilepna tilu tilepan ! Tapi heran, bolor inyana mah peureum terus ! Nyaaa atuh deuk dikumahakeun ari tunduh keneh mah ?! Laju inyana rumpu rampa.. Nya aya nu karampa... Karampa gugulantungan. Piker si Lengser: "Bende leutik!" Kajeun leutik geh asal bende.......! Laju ditakol ! "Aeh...aeh!" ceuk inyana "Bet bende ngaberele?" Ari bray teh mata inyana dibeuntakeun, Mani ngabuncelik, Ceuk si Lengser bari gigisik : "Singaiiing, singaing !" Lain bende, Geuning kanjut badot ki Lebe! Bende mah euweuh, Mending geh ku lisung!" Laju nitah ngumpulkeun lisung, Saban lembur tujuh lisung. Laju si Lengser nihtir Nihtiiir ! Nitir ! Nihtir teu eureun-eureun, Dua poe jeung sapeuting, Eureun-eureun soteh, Geus euweuh tabeuheun, Ancur lisung jadi suluh, Ledis kagaganden-gagandenna! Laju inyana culak cileuk, Sugan mitoha inyana aya deukeut..... Teunggeuleun.......! Ti dinya Si Lengser ngadeuheus ka raja , Leumpangna bari nyangegeng, Bujurna songgeng ka kenca, Cangkengna bengkok ka kenca, Taktakna dengdek ka kenca, Leungeunna kengkong ka kenca, Jeung mata teleng ka kenca, Urut nihtir beurang peuting! Ceuk raja "Kumaha Lengser?" Beres? ceuk Lengser: "Beres !" Kitulah..... Lilana satengah bulan mah, Disalikur lembur bakal mahal beas!" ceuk raja: 'Baruk mahal beas?" ceuk Lengser: "euweuh nu narutu!" Lisungna ledis kabeh dipake nihtir! ceuk raja : Ngaing teu nguruskeun beas, Nanya ogeh urusan perang ! ceuk siLengser: "kooomo eta mah !" Leuwih ti beres ! samemeh nihtir oge, balad geus taratonjolan, Hayang paheula-heula perang ! ceuk raja:"Hade ari kitu mah !" Urang papag nu deuk ngarurug ! Tapi teu hade, Mun perang dijero dayeuh, Sabab montong teuing di elehna, najan di unggulna ge, Loba banda kari urutna! Nyaeta, kaluluh ti waktu tarung Hade urang nyabrang, Perang ditegalan anu lega, Tunda! Kocapkeun ! Balad raja Sunda keur nyabrang, Kabeh nyabrang, ka peuntas ciliwung anu wetan, ka tegalan anu lega, Nyabrang saurang nyabrang dua urang nyabrang saaleutan nyabrang aleut-aleutan Laju arunggah ka tegalan nanggoan musuh anu deuk ngarugrug ! Kocapkeun musuh geus datang Der perang ! Perang, perang ! Perang batur,... perang ! Raja Sunda, perangna rosa jasa! Nu gagah dilawan gagah Nu sakti dilawan sakti nu parinteur dilawan ku akal karuhan anu barodo mah ! Ku polotot mani marodol! ku sentak mani jalengker! Nu ngarugrug diawut-awut nu ngahurup , diawut-awut, Kabeh diawut-awut, Mani paburisat....! Kai Cakra! Kai Jaya! Kai Asep! Kai Tubagus! Kai Mahmud! Wan Mahmud! Embah Anis! Embah Anom! Nu kasarohor dinagara sabrang kulon, Kabeh mundur dibuburak, Nu ti kulon mabur ka kulon. Nu ti kaler, mabur ka kulon. Nu ti wetan, mabur ka kulon. Nu ti kidul mabur ka kulon Marabur acir-aciran, Digogogan ku anjing kicik! Tunda deui ! Keun sina acir-aciran ka kulonkeun. Urang kocapkeun ayeuna dinagara sabrang kulon, Raja Banten ngeunah jasa angen, neuleu kabeh Papatih inyana geus marulang deui ! ceuk raja Banten: "He patih-patih !" Kumaha beres ? ceuk Uwan Bakar: "Beres, beresna mah !" Ceuk raja Banten,:"Disundatan?" ceuk Uwan Bakar:""Puguh baeee....!" Saha? ceuk Uwan Bakar:" Ja Kula !" ceuk raja Banten :"Dasar sia mah !" Teu uyahan tibarang datang ! Ngaing mah nanya geh raja Pajajaran ! Disundatan ku dia? ceuk ki Tubagus: "Boro-boro deuk beunang disundatan ! Kalah ka inyana deuk nyundatan deui kula kabehan ! Komo siLengser mah, Nyundatanana geh, deuk make kakatua! ceuk raja Banten: "Astagfirulloh al hadim!" Amun kitu bener gaaagaah... Bener saaakti tah,... si Kapir teh !" [Lajengkeuneun]
